മാത്യൂസ് ആർപ്പൂക്കര
യൂറോപ്യന്‍നദികളില്‍ രണ്ടാംസ്ഥാനമുള്ള ഡാന്യൂബ്‌നദി പടിഞ്ഞാറന്‍ ജര്‍മനിയിലെ ബ്ലാക് ഫോറസ്റ്റ് കുന്നുകളില്‍നിന്നുദ്ഭവിക്കുന്ന ബ്രെഗ് എന്ന നദിയില്‍നിന്നാണ് പിറവിയെടുക്കുന്നത്. മധ്യയൂറോപ്പിലും കിഴക്കന്‍ യൂറോപ്പിലുമായി ഡാന്യൂബ് ഒഴുകുന്നു. ജര്‍മ്മനി, ഓസ്ട്രിയ, സ്ലോവാക്യ, ഹംഗറി, ക്രൊയേഷ്യ, സെര്‍ബിയ, ബള്‍ഗേറിയ, റുമേനിയ, മൊള്‍ഡോവ, യുക്രെയ്ന്‍ എന്നീ രാജ്യങ്ങളിലൂടെ ഒഴുകുന്ന ഈ നദിയുടെ നീളം 2850 കിലോമീറ്ററാണ്. ഇത് കരിങ്കടലില്‍ പതിക്കുന്നു.
യൂറോപ്പിന്റെ രാഷ്ട്രീയ വിപ്ലവചരിത്രങ്ങളൊക്കെ കണ്ടൊഴുകിയതാണീ ചരിത്രനദി. മാറിമാറിവന്ന സാമ്രാജ്യങ്ങള്‍ കോട്ടകളും കൊട്ടാരങ്ങളും പടുത്തുയര്‍ത്തിയത് ഈ നദിയുടെ തീരങ്ങളില്‍ത്തന്നെ. വലുതും ചെറുതുമായ ഒട്ടനവധി പോഷകനദികളുള്ള ഡാന്യൂബ്‌നദി ജലഗതാഗതത്തിനും പേരുകേട്ടതാണ്. പ്രത്യേകിച്ച്, മധ്യയൂറോപ്പിലെ രാജ്യങ്ങള്‍ തമ്മിലുള്ള ഗതാഗതത്തിന്.
