ഡോ.റോണി ബെന്സണ്
സ്തനാര്‍ബുദം ഇന്ന് ലോകമെമ്പാടുമുള്ള സ്ത്രീകളില്‍ ഏറ്റവും കൂടുതലായി കണ്ടുവരുന്ന കാന്‍സറുകളില്‍ ഒന്നാണ്. സമയബന്ധിതമായി കണ്ടെത്തിയാല്‍ ചികിത്സിച്ചു ഭേദമാക്കാവുന്ന രോഗമാണിത്. പക്ഷേ, കൃത്യമായ ബോധവത്കരണത്തിന്റെ അഭാവംമൂലം രോഗം പലപ്പോഴും വൈകിയാണു തിരിച്ചറിയുന്നത്. മാര്‍ സ്ലീവാ മെഡിസിറ്റിയില്‍ ''ശലഭം'' എന്ന പദ്ധതിയിലൂടെ സ്തനാര്‍ബുദബോധവത്കരണത്തിനും പ്രതിരോധത്തിനുമായി വിപുലമായ പ്രവര്‍ത്തനങ്ങള്‍ക്കു തുടക്കം കുറിച്ചിട്ടുണ്ട്.
എന്താണ് സ്തനാര്‍ബുദം?
സ്തനത്തിലെ കോശങ്ങളുടെ വളര്‍ച്ച നിയന്ത്രണംവിട്ട് അസാധാരണമായി വളരുമ്പോളാണ് സ്തനാര്‍ബുദം ഉണ്ടാകുന്നത്. ഈ കോശങ്ങള്‍ സമീപഭാഗങ്ങളിലേക്കോ മറ്റ് ഭാഗങ്ങളിലേക്കോ പടരാനും സാധ്യതയുണ്ട്. സ്തനാര്‍ബുദത്തിന് തടയാന്‍ സാധിക്കുന്ന കാരണങ്ങളും തടയാന്‍ സാധിക്കാനാകാത്ത കാരണങ്ങളുമുണ്ട്. പൊണ്ണത്തടി, അമിതവണ്ണം, വ്യായാമത്തിന്റെ കുറവ്, കുട്ടികള്‍ ഇല്ലാതിരിക്കുന്നത്, മുലയൂട്ടല്‍ കാലാവധി ചുരുക്കുക, മദ്യപാനം, ഹോര്‍മോണ്‍ ചികിത്സ എന്നിവയാണ് തടയാന്‍ സാധിക്കുന്ന കാരണങ്ങള്‍. 60% -70% തടയാന്‍ സാധിക്കാത്ത കാരണങ്ങളുണ്ട്. പ്രായം കൂടുന്നതനുസരിച്ച് സാധ്യത കൂടുന്നു, നേരത്തെ തുടങ്ങുന്ന ആര്‍ത്തവം, വൈകി വരുന്ന ആര്‍ത്തവവിരാമം, കുടുംബത്തില്‍ ആര്‍ക്കെങ്കിലും ബ്രസ്റ്റ്, ഓവേറിയന്‍ കാന്‍സര്‍ ഉണ്ടെങ്കില്‍ എന്നിവയാണ് ഇത്തരത്തിലുള്ള കാരണങ്ങള്‍. ബി.ആര്‍.സി.എ. 1, ബി.ആര്‍.സി.എ. 2 എന്നീ ജീനുകളുടെ തകരാര്‍ മൂലമാണ് പാരമ്പര്യമായി കാന്‍സര്‍ ഉണ്ടാവുന്നത്. ബി.ആര്‍.സി.എ ടെസ്റ്റിലൂടെ സ്തനാര്‍ബുദങ്ങളുണ്ടാകുന്ന സാധ്യത മുന്‍കൂട്ടി മനസിലാക്കി അത് തടയാന്‍ സാധ്യത കൂടുതലാണെങ്കിലും നേരത്തെ മനസിലാക്കി, നേരത്തെ കണ്ടെത്തി ചികിത്സ തുടങ്ങാന്‍ സഹായിക്കുന്നു.
സ്തനാര്‍ബുദത്തിന്റെ ലക്ഷണങ്ങള്‍
സ്തനങ്ങളിലോ കക്ഷത്തിലോ ഉണ്ടാകുന്ന മുഴകള്‍, നാരങ്ങയുടെ തൊലിപോലെ സ്തനത്തിന്റെ ചര്‍മ്മത്തില്‍ അനുഭവപ്പെടുന്ന വ്യത്യാസം
മുലക്കണ്ണ് ഉള്ളിലോട്ട് വലിഞ്ഞ് പോകുക, സ്തനങ്ങളില്‍ പാല്‍പോലെയോ രക്തമയമായോ സ്രവം വരുന്നു, കൂടിയ സ്റ്റേജുകളില്‍ മഞ്ഞപ്പിത്തം, പുറംവേദന, തലവേദന എന്നിവയൊക്കെ സ്തനാര്‍ബുദത്തിന്റെ ലക്ഷണങ്ങളാണ്.
സ്തനാര്‍ബുദം കണ്ടെത്താന്‍ സ്വയം പരിശോധന (സെല്‍ഫ് ബ്രസ്റ്റ് എക്‌സാമിനേഷന്‍) നടത്താവുന്നതാണ്. ഇതിന്റെ സ്റ്റെപ്പുകള്‍ ചുവടെ ചേര്‍ക്കുന്നു.
സ്റ്റെപ്പ് ഒന്ന് - സ്തനങ്ങളുടെ കൃത്യമായ ഘടന കണ്ണാടിയുടെ സഹായത്തോടെ പരിശോധിക്കുക. സ്തനങ്ങളില്‍ നിറവത്യാസം, രൂപമാറ്റം, മുഴകള്‍, ചുവന്ന പാടുകള്‍, തിണര്‍പ്പുകള്‍, കക്ഷങ്ങളുടെ ഭാഗത്ത് വീക്കം എന്നിവയുണ്ടോ എന്നു പരിശോധിക്കണം. നിപ്പിളുകള്‍ ഉള്ളിലേക്കു വലിഞ്ഞുനില്‍ക്കുന്നതും അപകടസൂചനയാണ്.
സ്റ്റെപ്പ് രണ്ട് - മുകളില്‍ പറഞ്ഞ കാര്യങ്ങള്‍ പരിശോധിച്ച ശേഷം കൈകള്‍ രണ്ടും മുകളിലേക്കുയര്‍ത്തുക. എന്തെങ്കിലും വ്യത്യാസം സംഭവിക്കുന്നുണ്ടോ എന്ന് പരിശോധിക്കണം.
സ്റ്റെപ്പ് മൂന്ന്-നിപ്പിളിലൂടെ അസാധാരണമായി വെള്ളം പോലെയോ മുലപ്പാല്‍പോലെയോ പുറത്തേക്കു വരുന്നുവെങ്കില്‍ ജാഗ്രത വേണം. മഞ്ഞ നിറത്തിലോ രക്തംപോലെയോ തോന്നിപ്പിക്കുന്ന ദ്രാവകങ്ങള്‍ കണ്ടാല്‍ ഡോക്ടറെ സമീപിക്കണം.
സ്റ്റെപ്പ് നാല് - ഒരു കൈ തലയ്ക്ക് മുകളില്‍ ഉയര്‍ത്തിയശേഷം മറ്റേ കൈ ഉപയോഗിച്ച് സ്തനങ്ങളില്‍ തടവി നോക്കണം. അസ്വാഭാവികമായ മുഴകളോ ഏതെങ്കിലും ഭാഗം കട്ടിയായി നില്‍ക്കുന്നതോ ശ്രദ്ധയില്‍പെട്ടാല്‍ സൂക്ഷിക്കണം. അടുത്ത കൈ ഉയര്‍ത്തി മറുഭാഗവും പരിശോധിക്കണം.
സ്റ്റെപ്പ് അഞ്ച് - മലര്‍ന്നു കിടന്ന ശേഷം വലതുകൈ ഉയര്‍ത്തി ഇടത് കൈ കൊണ്ടു വലതുവശത്തെ സ്തനത്തിന് മുകളില്‍ തടവി നോക്കുക. കട്ടിയുള്ളതോ ഉള്‍വശത്ത് മുഴകള്‍ പോലുള്ള ഭാഗങ്ങളോ തോന്നിയാല്‍ ശ്രദ്ധിക്കണം. ഇടതുകൈ ഉയര്‍ത്തിയശേഷം വലതുകൈകൊണ്ട് ഇടതുവശത്തെ സ്തനവും പരിശോധിക്കണം.
വൈദ്യപരിശോധന തേടേണ്ട സാഹചര്യങ്ങള്‍
സ്തനങ്ങളിലോ കക്ഷങ്ങളിലോ മുഴകള്‍ കണ്ടാല്‍
സ്തനങ്ങളിലോ നിപ്പിളുകളിലോ വേദന അനുഭവപ്പെട്ടാല്‍
ചെറിയ കുരുക്കള്‍ പോലെ സ്തനങ്ങളുടെ ചര്‍മത്തില്‍ കണ്ടാല്‍
സ്തനങ്ങളില്‍ കട്ടിയോ വീക്കമോ അനുഭവപ്പെട്ടാല്‍
നിപ്പിള്‍ സ്തനങ്ങളുടെ അകത്തേക്ക് വലിഞ്ഞിരുന്നാല്‍
ഗര്‍ഭിണികളോ മുലയൂട്ടുന്നവരോ അല്ലാത്ത സ്ത്രീകളുടെ സ്തനങ്ങളില്‍ പാല്‍പോലെയോ, രക്തമയമായതോ ആയ ദ്രാവകരൂപത്തിലുള്ള ഡിസ്ചാര്‍ജ് കണ്ടാല്‍ ശ്രദ്ധ പുലര്‍ത്തുക.
സ്തനാര്‍ബുദം ഭയപ്പെടേണ്ട രോഗമല്ല. നേരത്തെ കണ്ടെത്തിയാല്‍ ചികിത്സയിലൂടെ വേഗം തിരിച്ചെത്താം. സ്ത്രീകള്‍ സ്വയം പരിശോധനയും വര്‍ഷത്തില്‍ ഒരിക്കലെങ്കിലും മെഡിക്കല്‍ പരിശോധനയും നടത്തുന്നത് ജീവിതചര്യയുടെ ഭാഗമാക്കുക. ആധുനികമെഡിക്കല്‍ രംഗത്ത് സ്തനാര്‍ബുദത്തിന് ഏറെ ഫലപ്രദമായ ചികിത്സകളും ലഭ്യമാണ്.
ലേഖകന്‍ പാലാ മാര്‍ സ്ലീവാ മെഡിസിറ്റിയില്‍ മെഡിക്കല്‍ ഓങ്കോളജി വിഭാഗം സീനിയര്‍ കണ്‍സള്‍ട്ടന്റാണ്.
