ഡോ. ഡേവിസ് സേവ്യര് 
ഭാഷാശാസ്ത്രം പരിചയപ്പെടുത്തിയ ഒരു സാങ്കേതികസംജ്ഞയാണ് കത്രിക്കല്‍ അഥവാ ക്ലിപ്പിങ്. ഛേദനം എന്നും മൊഴിമാറ്റം നടത്താം. ''അര്‍ഥം മാറാതെ ഘടകപദങ്ങളെ ചുരുക്കിയോ ചെറുതാക്കിയോ പുതിയ പദസൃഷ്ടി നടത്തുന്നതിനെയാണ് ക്ലിപ്പിങ് എന്നു പറയുന്നത്.* മൂലപദത്തിന്റെ അര്‍ഥം മാറാതെയാവണം പദഛേദനം നടത്തേണ്ടത് എന്ന വ്യവസ്ഥ പാലിക്കണം.
(ബ്രദര്‍ - ബ്രോ, സിസ്റ്റര്‍ - സിസ്, സഹോദരന്‍ - സഹോ, സംഘപരിവാര്‍ - സംഘി(സങ്കി) കമ്മ്യൂണിസ്റ്റ് - കമ്മി, കോണ്‍ഗ്രസ് - കൊങ്ങി. ഇവിടെയെല്ലാം പദത്തിന്റെ അന്ത്യഭാഗമാണ് ലോപിച്ചുപോകുന്നത്. അന്ത്യ (സ്വന) ലോപം (അുീരീുമശേീി) എന്ന് ഈ പ്രവണതയെ വിശേഷിപ്പിക്കാം. ബാക്ക് ക്ലിപ്പിങ് (ആമരസ രഹശുുശിഴ)എന്നും വ്യവഹരിക്കാറുണ്ട്. തനി മലയാള (ദ്രാവിഡ) പദങ്ങളിലും പദപരപിന്‍ ലോപം കാണാവുന്നതാണ്. പലക - പല, പൂവ് - പൂ, പായ - പാ, കായ് - കാ, നായ - നാ, അരിശി - അരി, പേയ് - പേ എന്നിങ്ങനെ ചുരുങ്ങുന്നതും ഇതേ നയമനസരിച്ചുതന്നെ. ചുരുങ്ങിയ രൂപങ്ങളെല്ലാം പ്രകൃത്യംഗമാണ് എന്നൊരു പക്ഷം സി.വി. വാസുദേവഭട്ടതിരിക്കുണ്ട്.** ദീര്‍ഘസ്വരത്തിലാണ് അവസാനിക്കുന്നതെങ്കില്‍ ആഗമിക്കുകയാണ് ചെയ്യുന്നതെന്ന കേരളപാണിനിയുടെ നിരീക്ഷണത്തിനുള്ള മറുപടിയായാണ് ഭട്ടതിരിക്ക് ഇങ്ങനെ പറയേണ്ടിവന്നത്.
കത്രിക്കല്‍ അന്ത്യഭാഗത്തുതന്നെയാവണമെന്നില്ല. ഒരു പദത്തിന്റെ മുന്‍ഭാഗം മാത്രം ലോപിക്കുന്ന പദമുന്‍ലോപം (ഫോര്‍ക്ലിപ്പിങ്) ഉദാ: കള്ളുകുടിയന്‍ - കുടിയന്‍. മധ്യഭാഗം മാത്രം നിലനിര്‍ത്തി മുന്നും പിന്നും ലോപിക്കുന്ന മുന്‍പിന്‍ ലോപം (മിഡില്‍ ക്ലിപ്പിങ്) ഉദാ: ഇപ്പോള്‍ - 'പ്പോ' (സംസാരഭാഷയില്‍ മാത്രം). ഇവിടെ ഇകാരവും ളകാരവും ലോപിക്കുന്നു. രണ്ടു പദങ്ങള്‍ ചേര്‍ത്ത് പുതിയ പദം ഉണ്ടാക്കുമ്പോള്‍ പൂര്‍വോത്തരപദങ്ങളില്‍നിന്ന് കുറച്ചുഭാഗം നീക്കി പുതിയ പദം ഉണ്ടാക്കുന്ന സങ്കീര്‍ണ്ണഛേദനം (കോംപ്ലക്‌സ് ക്ലിപ്പിങ്) ഉദാ: മുഹമ്മദ്കുട്ടി - മമ്മൂട്ടി. എന്നിങ്ങനെ കത്രിക്കല്‍ പലവിധം സംഭവിക്കുന്നു.
*ബിന്ദു, ഡി. ഡോ. സമാസപഠനം, കേരളഭാഷാ ഇന്‍സ്റ്റിറ്റ്യൂട്ട്, തിരുവനന്തപുരം, 2024, പുറം - 126
** വാസുദേവഭട്ടതിരി, സി.വി., കേരളപാണിനീയപാഠങ്ങള്‍, ഡി.സി. ബുക്‌സ്, കോട്ടയം, 1985, പുറം - 26.
