ഡോ. ഡേവിസ് സേവ്യര് 
അനര്‍ഥമെല്ലാവര്‍ക്കുമുണ്ടാമേകദാ
ബുദ്ധിയുമപ്പോള്‍ മോഹിതാ (എല്ലാവര്‍ക്കും ഒരിക്കല്‍ അനര്‍ഥം വന്നകൂടും. അപ്പോള്‍ ബുദ്ധി മന്ദീഭവിക്കും.) ഇവിടെ പരാമൃഷ്ടമായ ഏകദാ എന്ന ശബ്ദത്തിന് ഒരിക്കല്‍ എന്നോ ഒരുസമയം എന്നോ അര്‍ഥം പറയണം. ഏകദാ ഉച്ചാരണത്തിലും എഴുത്തിലും ''ഏകതാ'' എന്നും ''ഏകധാ'' എന്നും മാറിമറിയാം. എന്നാല്‍, അവ രണ്ടും ഏകദാ എന്ന പദത്തിനു തുല്യമാകുന്നില്ല.
ഏകതയ്ക്ക് ഏകത്വം, ഐക്യം, ഒരുമിപ്പ്, ഒരുമ എന്നെല്ലാമാണ് വിവക്ഷിതങ്ങള്‍. ഏകതഃ എന്നതിനാകട്ടെ ഒരു വശത്തുനിന്ന് (ഒരു വശത്ത്) എന്നാണര്‍ഥം. ഏകതഃയുടെ വിപരീതം അപരതഃ എന്നുവരും. ''പോകുമെങ്ങള്‍ പുനരേകതോ, മനസി/ മോഹിച്ചിങ്ങു വന്നു ബഹുലാഭം.** പുനഃ എങ്ങള്‍ പോകും (വീണ്ടും ഞങ്ങള്‍ പുറപ്പെടും) ഏകതഃമനസി ബഹുലാഭം മോഹിച്ചിങ്ങു വന്നു (ഒരിടത്തുനിന്ന് മനസ്സില്‍ ഏറെ ലാഭം ആഗ്രഹിച്ചാണ് ഇവിടെ വന്നത്) എന്നിങ്ങനെ ഏകതഃ ഉണ്ണായി വാര്യര്‍ പ്രയോഗിച്ചിട്ടുണ്ടല്ലോ.
ഏകത, ഏകദാ എന്നിവയ്ക്കും പകരം ഏകധാ പ്രയോഗിച്ചുകൂടാ. ഏകധാ, ഏകപ്രകാരേണയാണ്. അതായത്, ഒരേ പ്രകാരത്തില്‍ അഥവാ ഒരു തരത്തില്‍ എന്നു പൊരുള്‍. ''ക്രിയാ പ്രകാരമര്‍ത്ഥത്തില്‍/ ധാ സംഖ്യാവാചകങ്ങളില്‍''*** എന്നു മണിദീപികാകാരന്‍ വ്യക്തമാക്കിയിട്ടുണ്ട്. ഏകധാ= ഏകപ്രകാരേണ, ദ്വിധാ=ദ്വാഭ്യം പ്രകാരാദ്യം, ശതധാ=ശതേന പ്രകാരൈഃ എന്നിങ്ങനെ പദവും പൊരുളും പരസ്പരം ബന്ധപ്പെട്ടിരിക്കുന്നു. ചുരുക്കത്തില്‍ ഏകത, ഏകദാ, ഏകധാ ഇവ വെവ്വേറെ രൂപവും അര്‍ഥവും നല്‍കുന്ന പദങ്ങളാണ്. ഉച്ചരണത്തില്‍ വ്യത്യാസം തെളിഞ്ഞില്ല എന്നു വരാം. പക്ഷേ, എഴുത്തില്‍ അങ്ങനെയല്ലല്ലോ. (ബുദ്ധി സംസ്‌കൃതത്തില്‍ സ്ത്രീലിംഗമായതുകൊണ്ട് മോഹിതാ എന്നതും സ്ത്രീലിംഗത്തില്‍ പ്രയോഗിച്ചു.)
* ഉണ്ണായിവാര്യര്‍, നളചരിതം ആട്ടക്കഥ, കൈരളീവ്യാഖ്യാനം, പ്രൊഫ. പന്മന രാമചന്ദ്രന്‍നായര്‍, കറന്റ് ബുക്‌സ്, കോട്ടയം, 2001, പുറം - 463
** ഉണ്ണായിവാര്യര്‍, നളചരിതം ആട്ടക്കഥ, കൈരളീ വ്യാഖ്യാനം, പ്രൊഫ. പന്മന രാമചന്ദ്രന്‍നായര്‍, കറന്റ് ബുക്‌സ്, കോട്ടയം, 2001, പുറം - 457
*** രാജരാജവര്‍മ്മ, ഏ.ആര്‍. മണിദീപിക, കേരളസാഹിത്യ അക്കാദമി, തൃശൂര്‍, 1987, പുറം - 261, 262.
