ഡോ. സിറിയക് തോമസ്
തികഞ്ഞ ഭാഷാസ്‌നേഹിയും മലയാളത്തിലെ ബാലസാഹിത്യശാഖയുടെ പിതാവുമായ പത്മശ്രീ മാത്യു എം. കുഴിവേലി അന്തരിച്ചിട്ട് ഒക്ടോബര് 27 ന് അരനൂറ്റാണ്ട്.
പാലായുടെ ആധ്യാത്മിക-രാഷ്ട്രീയ-കാര്‍ഷിക- വാണിജ്യപാരമ്പര്യങ്ങളെക്കാള്‍ ഒട്ടുംതന്നെ പിന്നിലല്ലല്ലോ ഈ പ്രദേശത്തിന്റെ സാഹിത്യ-സാംസ്‌കാരിക പൈതൃകവും. മലയാളസാഹിത്യത്തില്‍ വഞ്ചിപ്പാട്ടുണ്ടാക്കിയത് രാമപുരത്തു വാര്യരാണെങ്കില്‍ മലയാളത്തിലെ ആദ്യത്തെ സഞ്ചാരസാഹിത്യഗ്രന്ഥം-വര്‍ത്തമാനപ്പുസ്തകം - രചിച്ചത് പാറേമ്മാക്കലച്ചനാണല്ലോ. അദ്ദേഹം സുറിയാനിസഭയുടെ ഗോവര്‍ണദോറുമായിരുന്നു.
പില്‍ക്കാലത്ത്, മഹാകവി കട്ടക്കയത്തില്‍ ചെറിയാന്‍ മാപ്പിളയും മഹാകവി പാലാ നാരായണന്‍നായരും മഹാകവി പ്രവിത്താനം പി.എം. ദേവസ്യയും ലളിതാംബിക അന്തര്‍ജനവും സിസ്റ്റര്‍ മേരി ബനീഞ്ഞായും മലയാളസാഹിത്യപ്പന്തലിലെ മുന്‍നിരക്കാരായെങ്കില്‍ അവരെ തുടര്‍ന്നുവന്നവരും ഒട്ടും മോശക്കാരായിരുന്നില്ലല്ലോ. വെട്ടൂര്‍ രാമന്‍നായരും സക്കറിയയും ഏഴാച്ചേരി രാമചന്ദ്രനുമൊക്കെ പുതിയ കാലത്തിന്റെ സാഹിത്യപ്രതിഭകളാണ്. എന്നാല്‍, ഇവര്‍ക്കെല്ലാമിടയില്‍ ഒരു കുത്തബ്മീനാര്‍പോലെ ഉയര്‍ന്നുനില്ക്കുന്ന സമാനതകളില്ലാത്ത ഒരു മഹാപണ്ഡിതനാണ് പത്മശ്രീ മാത്യു എം. കുഴിവേലി. ഭാഷാവിജ്ഞാനീയശാഖയോടായിരുന്നു കുഴിവേലിയുടെ പഥ്യം. അധ്യാപകനായിരുന്നു അദ്ദേഹം. ഭാഷാപഠനത്തിന്റെ മഹോപാധ്യായനും. പാലാ സെന്റ് തോമസ് ടീച്ചേഴ്‌സ് ട്രെയിനിങ് സ്‌കൂളിന്റെ ആദ്യത്തെ പ്രധാനാധ്യാപകനും കുഴിവേലിസാറായിരുന്നു. മലയാളത്തിലെ പ്രഥമ ഭാഷാവിജ്ഞാനകോശം തയ്യാറാക്കിയതിന്റെ ക്രെഡിറ്റും കുഴിവേലിക്കുതന്നെ. 1973 ല്‍ രാഷ്ട്രം അദ്ദേഹത്തെ പത്മശ്രീ നല്‍കി ആദരിച്ചു.
1905 ഏപ്രില്‍ 20 നായിരുന്നു ജനനം. പാലാ ളാലം പഴയപള്ളിയുടെ സ്ഥാപകകുടുംബങ്ങളിലൊന്നായിരുന്നു കുഴിവേലില്‍. മത്തായി കുഴിവേലിലും മറിയവുമായിരുന്നു മാതാപിതാക്കള്‍. പാലാ സെന്റ് തോമസ് സ്‌കൂളിലും ചങ്ങനാശ്ശേരി എസ്.ബി. കോളജിലും പഠിച്ചശേഷം പാളയംകോട്ട സെന്റ് ജോസഫ്‌സ് കോളജില്‍നിന്ന് എല്‍.റ്റി. ബിരുദമെടുത്തു. തുടര്‍ന്ന്, പാലാ സെന്റ് തോമസ് ഹൈസ്‌കൂളില്‍ അധ്യാപകനായി. പിന്നീട്, അവിടെത്തന്നെ സെന്റ് തോമസ് ട്രെയിനിങ് സ്‌കൂളിന്റെ ഹെഡ്മാസ്റ്ററുമായി. അക്കാലത്ത്, പാലായില്‍നിന്ന് സ്‌കൂള്‍ മാസ്റ്റര്‍ എന്നപേരില്‍ ഒരു മാസികയും അദ്ദേഹം പ്രസിദ്ധീകരിച്ചിരുന്നു. കട്ടക്കയത്തില്‍ ചെറിയാന്‍മാപ്പിള ആയിരുന്നു പ്രധാന സഹായി. നിലവാരമുള്ള ഒരു പ്രസിദ്ധീകരണമായിരുന്നു സ്‌കൂള്‍ മാസ്റ്റര്‍.
പില്‍ക്കാലത്ത്, തിരുവിതാംകൂര്‍ യൂണിവേഴ്‌സിറ്റി സ്ഥാപിതമായപ്പോള്‍ മാത്യു എം. കുഴിവേലി അവിടെ പബ്ലിക്കേഷന്‍ ഡിപ്പാര്‍ട്ടുമെന്റിന്റെ ചുമതലക്കാരനായി. പകരം, ട്രെയിനിങ് സ്‌കൂള്‍ ഹെഡ്മാസ്റ്റര്‍പദവിയില്‍ വന്നത്, പിന്നീട് പാലാ രൂപതയുടെ പ്രഥമമെത്രാനായിത്തീര്‍ന്ന മാണിക്കുട്ടിയച്ചന്‍ എന്ന ഫാദര്‍ സെബാസ്റ്റ്യന്‍ വയലില്‍ ആയിരുന്നു.
മലയാളത്തിലെ ബാലസാഹിത്യശാഖയുടെ പിതാവും കുഴിവേലിസാറായിരുന്നുവെന്നു പറയാം. ബാലന്‍ പ്രസിദ്ധീകരണങ്ങള്‍ എന്ന ബാനറിലാണ് അദ്ദേഹം കുട്ടികള്‍ക്കായി പഞ്ചതന്ത്രകഥകളും ഈസോപ്പു കഥകളും യവനകഥകളും അറബിക്കഥകളുമൊക്കെ പ്രസിദ്ധീകരിച്ചത്. അക്കാലത്ത് അതു വളരെ സാഹസികമായ ഒരു സംരംഭംതന്നെയായിരുന്നു. അദ്ദേഹത്തിന്റെ ബാലനായിരുന്ന മകന്‍ ബാലന്റെ (പില്‍ക്കാലത്ത് ഡോ. ബാലന്‍ കുഴിവേലി) പേരാണ് മാത്യുസാര്‍ തന്റെ ബാലസാഹിത്യപ്രസിദ്ധീകരണ സംരംഭത്തിനു നല്‍കിയത്. അങ്കമാലി പാറയ്ക്കല്‍ അന്നമ്മ ആയിരുന്നു കുഴിവേലിസാറിന്റെ പത്‌നി. നാല് ആണ്‍കുട്ടികളും അഞ്ചു പെണ്‍കുട്ടികളുമായിരുന്നു മക്കള്‍.
കാഴ്ചയില്‍ അതിസുഭഗനായിരുന്നു മാത്യു എം. കുഴിവേലി. ചുവപ്പുകലര്‍ന്ന വെളുപ്പുനിറം. നല്ല പൊക്കം. എപ്പോഴും ശുദ്ധശുഭ്രവസ്ത്രധാരി. മുണ്ടും ജുബ്ബയും കഴുത്തു ചുറ്റി ഇടുന്ന കവണിയുമായിരുന്നു കുഴിവേലി മാത്യുസാറിന്റെ ഡ്രസ്‌കോഡ്. വലിയ അഭിമാനിയായിരുന്നു. നീണ്ടുനിവര്‍ന്നു പ്രൗഢമായ നില്പും ആത്മവിശ്വാസത്തോടെയുള്ള നടപ്പും വാക്കും സംസാരവും.
ഭാഷയോടുള്ള ഭക്തിയും ആരാധനയുമായിരുന്നു കുഴിവേലി മാത്യുസാറിന്റെ ജീവവായു. സര്‍വകലാശാലയില്‍ ജോലിയിലിരിക്കേ അധികാരികളോട് അനുവാദം ചോദിക്കാതെ സ്വന്തനിലയില്‍ ഭാഷാ വിജ്ഞാനകോശം പ്രസിദ്ധീകരിക്കുവാന്‍ തയ്യാറാ യതിന്റെ പേരില്‍ അദ്ദേഹത്തിനെതിരേ ശിക്ഷണനടപടിക്കുപോലും ശ്രമമുണ്ടായി. വിജ്ഞാനകോശത്തിന്റെ ആദ്യവാല്യം പ്രസിദ്ധീകരിക്കുന്നതിനുള്ള സാമ്പത്തികഭാരം അദ്ദേഹത്തിനു താങ്ങാവുന്നതിനുമപ്പുറമായിരുന്നു. ഒടുവില്‍ താന്‍തന്നെ ഡ്രൈവ് ചെയ്തു പൊന്നുപോലെ കൊണ്ടുനടന്നിരുന്ന ഇഷ്ടവാഹനമായിരുന്ന മോറീസ് മൈനര്‍ കാര്‍ വിറ്റിട്ടാണ് വിജ്ഞാനകോശത്തിന്റെ ആദ്യവാല്യം അച്ചടിക്കാനുള്ള പണം കണ്ടെത്തിയതെന്നറിയുമ്പോഴാണ് മലയാളത്തിലെ ആദ്യ വിജ്ഞാനകോശപ്രസാധകന്റെ ഭാഷാസ്‌നേഹത്തിന്റെ ആഴമറിയുന്നത്. 1956 ല്‍ കവടിയാര്‍ കൊട്ടാരത്തില്‍ അമ്മ മഹാറാണിയുടെയും മകള്‍ കാര്‍ത്തികതിരുനാളിെന്റയും കേണല്‍ ഗോദവര്‍മ രാജായുടെയും സാന്നിധ്യത്തില്‍ അന്ന് തിരു-കൊച്ചി രാജപ്രമുഖനായിരുന്ന ശ്രീ ചിത്തിരതിരുനാള്‍ മഹാരാജാവാണ് വിജ്ഞാനകോശത്തിന്റെ പ്രഥമവാല്യം ഔപചാരികമായി പ്രകാശിപ്പിച്ചത്.
തിരുവനന്തപുരത്തായിരിക്കേ 'ട്രിവാന്‍ഡ്രം ലെറ്റേഴ്‌സ്' എന്ന പേരില്‍ ഒരു ഇംഗ്ലീഷ്മാസികയും 'കുഴിവേലി പത്രിക' എന്നൊരു മലയാളപ്രസിദ്ധീകരണവും മുടങ്ങാതെ നടത്തിപ്പോന്നിരുന്നു. മാത്യു എം. കുഴിവേലിയുടെ ഭാഷാവിജ്ഞാനകോശപ്രസിദ്ധീകരണപരിശ്രമങ്ങളെ 'ഭഗീരഥപ്രയത്‌നം' എന്നാണ് പ്രൊഫ. സുകുമാര്‍ അഴീക്കോട് പ്രകീര്‍ത്തിച്ചത്. അതിനെതിരേ സര്‍വകലാശാലാധികൃതര്‍ നടത്തിയ തടസ്സശ്രമങ്ങളെ അഴീക്കോടു കണക്കിനു പരിഹസിക്കുകയും ചെയ്തു. ഏഴു വാല്യങ്ങള്‍ കുഴിവേലിസാര്‍ പൂര്‍ത്തിയാക്കി. പതിനായിരത്തോളം പേജുകള്‍. തനിക്ക് ആ വകയില്‍ ഉണ്ടായ ഭീമമായ സാമ്പത്തികബാധ്യതകള്‍പോലും കുഴിവേലിസാറിനെ ലക്ഷ്യത്തില്‍നിന്നു പിന്തിരിപ്പിച്ചില്ല. ഒരര്‍ഥത്തില്‍പ്പറഞ്ഞാല്‍, അത് ഒരു ഒറ്റയാള്‍യജ്ഞമായിരുന്നു.
1972 ല്‍ അന്നത്തെ രാഷ്ട്രപതി വി.വി. ഗിരി തിരുവനന്തപുരത്തെത്തി ഭാഷാവിജ്ഞാനകോശത്തിന്റെ ബാക്കി വാല്യങ്ങള്‍ ഔപചാരികമായി പ്രകാശിപ്പിച്ചു. ഗവര്‍ണര്‍ വി. വിശ്വനാഥന്‍ അധ്യക്ഷനായി. രണ്ടുപേരും കുഴിവേലിസാറിനുമേല്‍ പ്രശംസാവാക്കുകള്‍കൊണ്ടു ധാരകോരി. പിറ്റേവര്‍ഷം, രാഷ്ട്രം മാത്യു എം. കുഴിവേലിയെ പത്മശ്രീ നല്‍കി ആദരിക്കുകയും ചെയ്തു. അപ്പോഴും വിജ്ഞാനകോശത്തിന്റെ എട്ടാം വാല്യത്തിന്റെ പണിപ്പുരയിലായിരുന്നു സാത്വികനായിരുന്ന ആ ഭാഷാഭക്തന്‍.
നിര്‍ഭാഗ്യവശാല്‍ അവസാനവാല്യം പൂര്‍ത്തിയാക്കുംമുമ്പ് 1974 ഒക്ടോബര് 27 ന് അദ്ദേഹം കാലത്തെ കടന്നുപോയി. പാലാ നഗരസഭ മുനിസിപ്പല്‍ ലൈബ്രറി, പത്മശ്രീ മാത്യു എം. കുഴിവേലി സ്മാരക ലൈബ്രറി എന്നു നാമകരണംചെയ്താണ് ജന്മനഗരത്തിന്റെ ആദരവു പ്രകടമാക്കിയത്. മാത്യു എം. കുഴിവേലിസാറിന് അദ്ദേഹത്തിന്റെ കര്‍മക്ഷേത്രമായ തിരുവനന്തപുരത്ത് ഉചിതമായ ഒരു സ്മാരകം ഉയരേണ്ടിയിരിക്കുന്നു.
