അഡ്വ. ചാർലി പോൾ
ചിറ്റാരിക്കാല്‍ കോട്ടമല എം.ജി. എം.എ.യു.പി. സ്‌കൂളിലെ പ്രഥമാധ്യാപിക ഇക്കഴിഞ്ഞ ഒക്ടോബര്‍ 19 ന് സ്‌കൂള്‍ അസംബ്ലിയില്‍വച്ച് അഞ്ചാം ക്ലാസ് വിദ്യാര്‍ഥിയുടെ മുടി മുറിച്ച സംഭവം പത്രങ്ങളില്‍ വാര്‍ത്തയായിരുന്നു. നീട്ടിവളര്‍ത്തിയ മുടി മുറിക്കാന്‍ അധ്യാപകര്‍ വിദ്യാര്‍ഥിയോടാവശ്യപ്പെട്ടത് അനുസരിക്കാത്തതിനാല്‍ പ്രഥമാധ്യാപിക നേരിട്ടു മുടി മുറിക്കുകയായിരുന്നു. ബാലാവകാശനിയമം, പട്ടികജാതി, പട്ടികവര്‍ഗാതിക്രമനിരോധനനിയമം എന്നിവപ്രകാരം പ്രഥമാധ്യാപികയുടെ പേരില്‍ പോലീസ് കേസെടുത്തിട്ടുണ്ട്.
മുടി മുറിച്ചതിനെത്തുടര്‍ന്ന് വിദ്യാര്‍ഥി സ്‌കൂളില്‍ പോയിരുന്നില്ല. മുന്‍കാലങ്ങളില്‍ സ്‌കൂള്‍ അസംബ്ലികളില്‍ ഇപ്രകാരം പലവിധ ശിക്ഷാവിധികള്‍ നടപ്പാക്കിയിരുന്നു. ഇത്തരം പ്രാകൃതശിക്ഷാരീതികള്‍ ഒരുതരത്തിലും ഗുണം ചെയ്യില്ല എന്ന തിരിച്ചറിവില്‍ 2009 ല്‍ വിദ്യാഭ്യാസാവകാശനിയമത്തിലെ 17-ാം വകുപ്പുപ്രകാരം ശാരീരികശിക്ഷകളും മാനസികപീഡനങ്ങളും നിരോധിച്ചിട്ടുള്ളതാണ്. 2002 ല്‍ത്തന്നെ സുപ്രീം കോടതി സ്‌കൂളുകളില്‍ അടിയും മറ്റു ശിക്ഷാനടപടികളും നിരോധിക്കുകയും കുട്ടികളുടെ അന്തസ്സ് കാത്തുസൂക്ഷിക്കുന്ന സൗഹാര്‍ദപരമായ അന്തരീക്ഷം ഉറപ്പുവരുത്തണമെന്നാവശ്യപ്പെടുകയും ചെയ്തിട്ടുണ്ട്. 2019 ജൂണ്‍ 28 ന് കേരളസംസ്ഥാന ബാലാവകാശക്കമ്മീഷന്‍ ചൂരല്‍വടി പ്രയോഗം നിരോധിച്ച് കര്‍ശനനിര്‍ദേശം നല്‍കിയിട്ടുണ്ട്. കേരളസര്‍ക്കാര്‍ പ്രത്യേക സര്‍ക്കുലറിലൂടെ 2016 നവംബര്‍ 19 മുതല്‍ ഹയര്‍ സെക്കന്‍ഡറി വിഭാഗത്തിലും ശാരീരിക-മാനസികശിക്ഷാനടപടികള്‍ പാടില്ലെന്നു വിലക്കിയിട്ടുണ്ട്. കുറ്റക്കാരെ പരസ്യമായി അസംബ്ലിയില്‍വച്ചു മാപ്പു പറയിപ്പിക്കുക, സഹപാഠികളുടെ മുന്നില്‍വച്ച് അധിക്ഷേപിക്കുക, സ്റ്റാഫ്‌റൂമില്‍ പരസ്യകുറ്റവിചാരണ നടത്തുക തുടങ്ങിയ ശിക്ഷാനടപടികള്‍ വിലക്കിയിട്ടുമുണ്ട്. മാനസികപീഡനംമൂലം ചില ഹയര്‍സെക്കന്‍ഡറി വിദ്യാര്‍ഥികള്‍ ആത്മഹത്യ ചെയ്തതിനെത്തുടര്‍ന്നാണ് ഇപ്രകാരം സര്‍ക്കുലര്‍ പുറപ്പെടുവിച്ചത്.
ശാരീരികപീഡനങ്ങളെക്കാള്‍ ആപത്കരങ്ങളാണ് മാനസികപീഡനങ്ങള്‍. പരസ്യമായ വഴക്കുപറച്ചില്‍, കളിയാക്കല്‍, കുറ്റപ്പെടുത്തല്‍, താഴ്ത്തിക്കെട്ടല്‍, ഭീഷണിപ്പെടുത്തല്‍, ഭയപ്പെടുത്തല്‍, പരിഹസിക്കല്‍, ശാപവാക്കുകള്‍ പറയല്‍, അവഗണിക്കല്‍, താരതമ്യംചെയ്യല്‍, മുടിമുറിക്കല്‍പോലെയുള്ള ശിക്ഷാനടപടികള്‍, സ്‌കൂളില്‍നിന്നു പുറത്താക്കല്‍, പൊക്കം, വണ്ണം, നിറം, ജാതി, മറ്റു വ്യക്തിത്വവൈകല്യങ്ങള്‍ ചൂണ്ടിക്കാട്ടി അധിക്ഷേപിക്കല്‍ എന്നിവയെല്ലാം കുട്ടികളുടെ മനസ്സില്‍ വലിയ മുറിവുകള്‍ സൃഷ്ടിക്കും. അത് വ്യക്തിത്വവൈകല്യങ്ങള്‍ക്ക് ഇടവരുത്തും. ശരീരത്തിനേറ്റ മുറിവുകള്‍ ഒരുപക്ഷേ, ഉണക്കാന്‍ കഴിഞ്ഞേക്കും. പക്ഷേ, മനസ്സിനേറ്റ മുറിവുകള്‍ ഉണക്കാന്‍ കഴിയില്ലെന്ന സത്യം മറക്കരുത്. മുറിവേല്പിക്കുന്നവരില്‍നിന്നു കുട്ടികള്‍ അകലും. വേദനയുടെ തീവ്രതയനുസരിച്ച് അകല്‍ച്ച കൂടിയോ കുറഞ്ഞോ ഇരിക്കും. പലരും അന്തര്‍മുഖരാകും. കോപം, വെറുപ്പ്, പ്രതികാരചിന്ത എന്നിവ ഉടലെടുക്കും. ആത്മാഭിമാനത്തിനു ക്ഷതമേറ്റ ഇക്കൂട്ടര്‍ വിഷാദരോഗികളായി മാറിയേക്കാം. ക്ഷമയില്ലാത്തവരുടെ ആയുധമാണ് തല്ലി നേരേയാക്കലും തളര്‍ത്തി നേരേയാക്കലും. ഇതു കുട്ടികളുടെ മനസ്സില്‍ നോവുകള്‍ ഉണ്ടാക്കുകയും മനോവികാസത്തില്‍ താളപ്പിഴകള്‍ സൃഷ്ടിക്കുകയും ചെയ്യും.
റിയാലിറ്റിഷോകളിലും മറ്റും പങ്കെ ടുത്ത കുട്ടികള്‍ക്കു മാനസികാധിക്ഷേപത്തെത്തുടര്‍ന്ന് പാനിക് ഡിസോര്‍ഡര്‍, ഉത്കണ്ഠ ഉള്‍പ്പെടെയുള്ള മാനസികപ്രശ്‌നങ്ങള്‍ സംഭവിച്ചിട്ടുണ്ട്. ദീര്‍ഘകാലപരിചരണത്തെത്തുടര്‍ന്നാണ് അവരില്‍ ചിലരെങ്കിലും സൗഖ്യത്തിലേക്കു തിരിച്ചുവരിക. ചിലര്‍ അതോടെ ജീവിതത്തെ ഫലപ്രദമായി നേരിടാന്‍ കഴിയാതെ കൂമ്പടഞ്ഞുപോകാനിടയുണ്ട്. ശാരീരിക - മാനസികപീഡനങ്ങള്‍ ഒരുതരത്തിലും കുട്ടികളെ വളര്‍ത്തുകയില്ല. ആളുകളുടെ മുന്നില്‍ തുറന്നുകാട്ടി നാണംകെടുത്തിയല്ല പ്രശ്‌നങ്ങള്‍ പരിഹരിക്കേണ്ടത്. സ്വകാര്യത മാനി ക്കുന്നുവെന്ന വിശ്വാസമാണു തിരുത്തലിനു കരുത്തേകുന്നതും മാര്‍ഗനിര്‍ദേശങ്ങള്‍ കേള്‍ക്കാനുള്ള മനസ്സൊരുക്കുന്നതും. ചെയ്ത തെറ്റ് എന്താണെന്നു ശാന്തമായി ബോധ്യപ്പെടുത്തി കുട്ടിയെ തിരുത്താന്‍ സഹായിക്കുകയാണു വേണ്ടത്.
'തന്റെ മുന്നിലിരിക്കുന്ന കുട്ടി തന്റേതല്ലെന്നു തോന്നുന്നത് എപ്പോഴാണോ അപ്പോള്‍ അധ്യാപകന്‍ വിദ്യാലയത്തിന്റെ പടിയിറങ്ങണം' എന്നു പറഞ്ഞത് ഗുരു നിത്യചൈതന്യയതിയാണ്. സ്വന്തം കുട്ടിയായിരുന്നെങ്കില്‍ പ്രഥമാധ്യാപിക അസംബ്ലിയില്‍വച്ച് മുടി മുറിക്കുമായിരുന്നോ? വിദ്യാലയത്തിന്റെ പടിയിറങ്ങേണ്ടവരായി മാറാതിരിക്കുക. ഗുരു നിത്യചൈതന്യയതിയുടെ ഗുരുവായ നടരാജഗുരു പറഞ്ഞു: ''ആജ്ഞാപിക്കുകയും അനുസരിപ്പിക്കുകയും അരുത്, മനസ്സിലാക്കുകയും അംഗീകരിക്കുകയുമാണു വേണ്ടത്.'' ഈ ഉപദേശം ശിക്ഷണശാസ്ത്രത്തില്‍ പ്രായോഗികമാക്കാവുന്നതാണ്.
