അവസാനം നീതി മധുവിനെ തേടി വന്നു. അട്ടപ്പാടി മധുവധക്കേസില്‍ 14 പ്രതികള്‍ കുറ്റക്കാരെന്നു കോടതി കണ്ടെത്തി ശിക്ഷ വിധിച്ചിരിക്കുന്നു. 2018 ഫെബ്രുവരി 22 നാണ് മോഷണക്കുറ്റം ആരോപിച്ച് ആള്‍ക്കൂട്ടം  ആദിവാസിയായ മധുവിനെ മര്‍ദിച്ച് കൊലപ്പെടുത്തുന്നത്.
രോഗവും പട്ടിണിയും തന്മൂലമുള്ള മരണവും വിശപ്പും അവഗണനയും കൊടികുത്തിവാഴുന്ന കേരളത്തിലെ ആദിവാസി ഊരുകളിലും ഒരു നേരത്തെ ഭക്ഷണത്തിനു ബുദ്ധിമുട്ടുന്ന ആളുകളിലും മോഷണചിന്ത മുളപൊട്ടുന്നത് ജീവന്‍ നിലനിര്‍ത്തുന്നതിന്റെമാത്രം പ്രശ്‌നമായാണെന്നു പറഞ്ഞാല്‍ തള്ളിക്കളയാനാവുമോ? കേരളത്തിലെ പലയിടങ്ങളിലും ഒരു നേരംമാത്രം ഭക്ഷണം കഴിക്കുന്നവര്‍ വളരെയധികമുണ്ട്.
കേരളത്തിലെ പല സ്ഥലങ്ങളിലും പല സംഘടനകളും ഭക്ഷണപ്പൊതികള്‍ വിതരണം ചെയ്യുന്നുണ്ട്. പട്ടിണി ഇല്ലാതെയാണോ ഇത്തരം ജീവകാരുണ്യപ്രവൃത്തികള്‍ നടന്നുവരുന്നത്? പട്ടിണിയും തൊഴിലില്ലായ്മയും കടക്കെണിയും കൂലിത്തട്ടിപ്പും കടുത്ത അവഗണനയും അവമതിപ്പും ചൂഷണവും മദ്യാസക്തിയും ബാലവേലയും അധികൃതരുടെ നടപടികളും വന്യമൃഗങ്ങളുടെ ആക്രമണങ്ങളുമെല്ലാം നേരിട്ടാണ് കേരളത്തിലെ ആദിവാസിജനത ജീവിക്കുന്നത് എന്ന പരമസത്യം മധുവിന്റെ കൊലപാതകം ലോകത്തെ അറിയിക്കുന്നു.
അട്ടപ്പാടിയിലെ മധുവിനെപ്പോലെ വയനാട്ടിലെ വിശ്വനാഥനും ആള്‍ക്കൂട്ടവിചാരണയ്ക്കു പിന്നാലെ കൊല്ലപ്പെട്ടു. മധുവും വിശ്വനാഥനും പ്രതിനിധീകരിക്കുന്ന അധഃസ്ഥിതവിഭാഗത്തെ വീണ്ടും വീണ്ടും കല്ലെറിഞ്ഞതും അവര്‍ക്കര്‍ഹതപ്പെട്ട അവകാശങ്ങളെ അവരില്‍നിന്നു പിടിച്ചുപറിച്ചതുമല്ലാതെ മറ്റെന്തു മാറ്റമാണ് ഇത്രകാലംകൊണ്ടു കേരളത്തിലുണ്ടായത്? കേരളത്തിലെ പൊതുസമൂഹത്തിന് ആദിവാസികളെ മനുഷ്യരായി അംഗീകരിക്കാന്‍ കഴിയുന്നില്ലെന്നുതന്നെയാണ് ഇത്തരം സംഭവങ്ങള്‍ തെളിയിക്കുന്നത്. ചരിത്രപരമായി മുഖ്യധാരാമനസ്സുകളില്‍ അടിഞ്ഞുകൂടിയ ജീര്‍ണതയാണ് എപ്പോഴും മറനീക്കി പുറത്തുവരുന്നത്.
ആദിവാസികളും പട്ടിണിയും
കേരളത്തിലെ ആദിവാസിചരിത്രം എന്നു പറയുന്നത്, അവകാശികള്‍ എന്ന നിലയില്‍നിന്ന് സ്വന്തം ഭൂമിയില്‍ അഭയാര്‍ഥികളും ആശ്രിതരുമായതിന്റേതാണ്. അതായത്, വിഭവനിയന്ത്രണമുണ്ടായിരുന്ന ഒരു ജനത ജനിച്ചുവളര്‍ന്ന ഭൂമിയില്‍ അഭയാര്‍ഥികളും ആശ്രിതരുമായി മാറിയ ചരിത്രം. ആദിവാസികളില്‍ ദാരിദ്ര്യം കൂടുന്നതും പോഷകാഹാരക്കുറവുണ്ടാകുന്നതും പട്ടിണിമരണങ്ങളുണ്ടാകുന്നതും പണമില്ലാത്തതുകൊണ്ടല്ല എന്നര്‍ഥം. പണമൊഴുക്കുണ്ടായി, ആദിവാസിപ്രദേശങ്ങള്‍ വികസിച്ചു, വളര്‍ന്നു. പക്ഷേ, ആദിവാസികള്‍ തളര്‍ന്നു. കേരളത്തിലെ വികസനപ്രവര്‍ത്തനം എന്നുപറയുന്നത് ആദിവാസിപ്രദേശങ്ങള്‍ വളര്‍ന്നതിന്റെയും ആദിവാസികള്‍ തളര്‍ന്നതിന്റെയുമാണ്. വികസിച്ച പ്രദേശങ്ങളില്‍ ഭൂമിയും വനവും വെള്ളവും മറ്റുള്ളവരുടെ കൈയിലേക്കു പോകുന്നു.
പട്ടിണിമരണങ്ങളുടെ യഥാര്‍ഥകാരണം തേടിക്കൊണ്ടുള്ള ചര്‍ച്ചകള്‍ ക്ഷേമപദ്ധതികളിലും അതിന്റെ നടത്തിപ്പിലും ചുറ്റിത്തിരിയുമ്പോള്‍ നാം യാഥാര്‍ഥ്യങ്ങളില്‍നിന്നു വ്യതിചലിക്കുകയാണു ചെയ്യുന്നത്. പട്ടിണിമരണങ്ങള്‍ അടയാളപ്പെടുത്തുന്നതു ചരിത്രപരമായ അസമത്വങ്ങളിലാണ്. അതുകൊണ്ടാണ് കേരളത്തില്‍നിന്ന് അപ്രത്യക്ഷമായി എന്നു നാം കരുതിയ പട്ടിണിമരണങ്ങള്‍ അട്ടപ്പാടിയിലും ഇനിയും അറിയപ്പെടാത്ത ആദിവാസി ഊരുകളിലും അടയാളപ്പെടുത്തുന്നത്.
പാഴാക്കിക്കളയുന്ന ഭക്ഷണസംസ്‌കാരം
മധുവിന്റെ കൊലപാതകം വിരല്‍ചൂണ്ടുന്നത് പാഴാക്കിക്കളയുന്ന ഭക്ഷണസംസ്‌കാരത്തിലേക്കാണ്. കേരളത്തില്‍ ഏറ്റവും കൂടുതല്‍ ഭക്ഷണം പാഴാക്കിക്കളയുന്നത് എവിടെയാണെന്നറിയാമോ? ഏതെങ്കിലും ഹോട്ടലിനെയൊ കല്യാണപരിപാടികളെയോ കുറ്റം പറയുന്നതിനുമുമ്പ് ഒന്നാലോചിച്ചു നോക്കൂ... അതു വീടിനുള്ളില്‍ത്തന്നെയാണ്. ആവശ്യത്തിലധികം ഭക്ഷണമുണ്ടാക്കി പാഴാക്കിക്കളയുന്ന ഒരു സംസ്‌കാരം ഇവിടെയുണ്ട്. ഓരോ ദിവസവും നമ്മുടെ വീടുകളില്‍ ഭക്ഷണം പാഴാക്കുന്നതിന്റെ കണക്കെടുക്കണം. ശരാശരി 2000 രൂപയുടെ ഭക്ഷണം ഓരോ മാസവും മലയാളി പാഴാക്കുന്നുണ്ട്. ഇതുപയോഗിച്ച് പട്ടിണിമരണങ്ങള്‍ തടയാം. ആവശ്യത്തിലധികം ഭക്ഷണമുണ്ടാക്കുകയും, ബാക്കിവരുന്നതു കുഴിച്ചുമൂടുകയും ചെയ്യേണ്ടിവരുന്ന അവസ്ഥ ഇല്ലാതാക്കാന്‍ ബോധപൂര്‍വമായ ശ്രമങ്ങള്‍ ആരംഭിക്കേണ്ടിയിരിക്കുന്നു.
പ്രതിവര്‍ഷം 1.3 ബില്യണ്‍ ടണ്‍ ഭക്ഷണം പാഴാക്കപ്പെടുന്നു
ഭക്ഷണം പാഴാക്കുന്നതിന്റെ ഞെട്ടിക്കുന്ന കണക്കുകള്‍കൂടി അറിയണം. ഫുഡ് ആന്റ് അഗ്രിക്കള്‍ച്ചറല്‍ ഓര്‍ഗനൈസേഷന്റെ (എഅഛ) കണക്കുപ്രകാരം ലോകത്താകമാനം പ്രതിവര്‍ഷം 1.3 ബില്യണ്‍ ടണ്‍ ഭക്ഷണമാണ് പാഴാക്കപ്പെടുന്നത്.  ഇതില്‍ ഒന്നാം സ്ഥാനത്ത് യു.എസ്.എ. ആണെങ്കിലും ഇന്ത്യയില്‍ ഉത്പാദിപ്പിക്കപ്പെടുന്ന ഭക്ഷ്യവസ്തുക്കളുടെ 40 ശതമാനവും പാഴായിപ്പോവുകയാണ്. അതായത്, ഇന്ത്യയില്‍ പാഴാക്കപ്പെടുന്ന ഭക്ഷ്യവസ്തുക്കളുടെ മൂല്യം പ്രതിവര്‍ഷം 92000 കോടിയാണ് എന്ന് യു.എന്‍. റിപ്പോര്‍ട്ടു ചെയ്യുന്നു.  പാഴായിപ്പോകുന്ന ഭക്ഷ്യവസ്തുക്കളുടെ നാലില്‍ ഒരു ഭാഗംമാത്രംമതി ലോകത്തെ 870 ദശലക്ഷം പേരുടെ ദാരിദ്ര്യമകറ്റാന്‍ എന്ന എഫ്.എ.ഒയുടെ കണ്ടെത്തലും പ്രസക്തമാണിവിടെ.
സമ്പന്നരാജ്യമായ അമേരിക്കയില്‍പ്പാലും അഞ്ചു ദശലക്ഷം പേര്‍ക്ക് ആവശ്യത്തിനു പോഷകാഹാരമില്ലെന്ന് യുഎന്‍ പറയുമ്പോള്‍ ഇന്ത്യയില്‍ 78% പേര്‍ക്കും ആരോഗ്യകരമായ പോഷകാഹാരലഭ്യതയില്ലെന്നതും ഓര്‍മിക്കേണ്ടതുണ്ട്. ലോകജനസംഖ്യയില്‍ 69 കോടി പേര്‍ കടുത്ത പട്ടിണിയില്‍ കഴിയുന്നു. ലോകത്തു ലഭ്യമായ ഭക്ഷണത്തിന്റെ അഞ്ചിലൊന്നു പാഴാക്കുന്നതായിട്ടാണ് പഠനങ്ങള്‍ പറയുന്നത്. അമിതമായി കഴിക്കുന്നതോ വലിച്ചെറിയുന്നതോ ആയ രീതിയില്‍ 20 ശതമാനം ഭക്ഷണമാണ് ആര്‍ക്കും ഉപകരിക്കാതെ പോകുന്നതെന്ന് ഇംഗ്ലണ്ടിലെ എഡിന്‍ബറോ സര്‍വകലാശാലയിലെ ഗവേഷകരുടെ പഠനങ്ങള്‍ പറയുന്നു.
ആദിവാസി അസമത്വങ്ങളും ഭയവും
ഭൂരഹിതരായും സമൂഹത്തിന്റെ വിവിധ ശ്രേണികളില്‍ തിരസ്‌കരിക്കപ്പെട്ടവരായും ജീവിക്കുന്നവരെ പട്ടിണിമരണങ്ങള്‍ നിരന്തരമായി വേട്ടയാടുന്നത് ഘടനാപരമായ അസമത്വംകൊണ്ടാണ്. ഈ  അസമത്വത്തെ പരിഹരിക്കാനുള്ള ഏതു ശ്രമവും കേരളത്തില്‍ പരിമിതമാണ്. അഥവാ ചരിത്രപരമായ അസമത്വത്തോടു സമവായം നടത്തുന്ന സാംസ്‌കാരികമായ സുരക്ഷിതത്വബോധമാണ് ഏറെ അപകടകരം.
അതുകൊണ്ടാണ് അട്ടപ്പാടിപോലുള്ള ഊരുകളിലെ കുഞ്ഞുങ്ങളുടെ മരണം കേരളത്തിന്റെ പൊതുസമൂഹത്തിനു പ്രശ്‌നമാകാത്തത്. കടുവയെയും സിംഹത്തെയും കീഴടക്കുന്ന ആദിവാസി ഒരു റവന്യൂ ഇന്‍സ്പെക്ടറുടെ മുന്നില്‍നിന്നു വിറയ്ക്കുന്നു. കാരണം, അയാള്‍ ഭരണകൂടപ്രതിനിധിയാണ്. ഭരണകൂടത്തെ ആദിവാസികള്‍ക്കു ഭയമാണ്. അതൊരു പുതിയ കാര്യമല്ല.
നവോത്ഥാനകേരളം, പുരോഗമനം എന്നെല്ലാം പറയുമ്പോഴും ആദിവാസിവേട്ടയുടെ കാര്യത്തില്‍ ഇതൊന്നും കാണാനില്ല. വിശന്നുവലഞ്ഞപ്പോള്‍ അല്പം ഭക്ഷണം അനുവാദം ചോദിക്കാതെ എടുത്തുകഴിച്ചതിനാണല്ലോ മധുവിനെ നാമുള്‍പ്പെടുന്ന പരിഷ്‌കൃതസമൂഹം കൈകെട്ടിയിട്ടു മര്‍ദിച്ചുകൊന്നത്? നാടിനെ ഭയന്ന്, കാടിന്റെ പരിമിതമായ സൗകര്യത്തില്‍മാത്രം ജീവിക്കാന്‍ അവരുടെ മനസ്സ് താദാത്മ്യം പ്രാപിച്ചിരിക്കുന്നു. അതിനപ്പുറത്തേക്ക് അവര്‍ക്ക് ഒന്നുമറിയില്ല, ഒന്നും ആഗ്രഹിക്കുന്നുമില്ല. അക്കാരണത്താല്‍ അവര്‍ക്കായി വിഭാവനം ചെയ്തിരിക്കുന്ന പദ്ധതികള്‍ ഗതിമാറിപ്പോകുകയും അഴിമതിയുടെ കൂത്തരങ്ങായി മാറുകയും ചെയ്യുന്നു.
ഒരു രാഷ്ട്രീയപ്പാര്‍ട്ടിയും ആദിവാസികളുടെ കാര്യത്തില്‍ ശ്രദ്ധിക്കുന്നില്ല. കേരളത്തിലെ  മുഖ്യധാരയുടെ മനുഷ്യവിരുദ്ധത ഇപ്പോഴും നിലനില്‍ക്കുന്നുണ്ട്. ആദിവാസികളിലെ പോഷകാഹാരക്കുറവും കുട്ടികളുടെ മരണവും പരിഹരിക്കുകയെന്ന ഒരു ചെറിയ പ്രശ്നമല്ല ഇത്. മൊത്തത്തിലുള്ള വികസനം എങ്ങനെ എല്ലാവരെയും ഉള്‍ക്കൊള്ളുന്നതാക്കാമെന്നതാണ്. അതിനു മൗലികമായ, ഘടനാപരമായ മാറ്റങ്ങള്‍ കൊണ്ടുവരേണ്ടിയിരിക്കുന്നു. അതിന് ഇവിടുത്തെ ശക്തരും അവരെ പിന്തുണയ്ക്കുന്നവരും സമ്മതിക്കുമോ?