•  29 Feb 2024
  •  ദീപം 56
  •  നാളം 50

ഇന്ത്യന്‍ജനാധിപത്യത്തെ കശാപ്പുശാലയാക്കരുത്


*

*

ന്ത്യന്‍ജനാധിപത്യം വീണ്ടുമിതാ കളങ്കിതമായിരിക്കുന്നു. ജനുവരി 30 ന് ചണ്ഡിഗഡ് മേയര്‍ തിരഞ്ഞെടുപ്പില്‍ നടന്ന ക്രമക്കേടുകളുടെയും നീതിനിഷേധങ്ങളുടെയുംപേരില്‍ ജനാധിപത്യത്തിന്റെ ശ്വാസമിടിപ്പുള്ള ഓരോ ഇന്ത്യന്‍പൗരനും ശിരസ്സു താഴ്ത്തി ലജ്ജിക്കാതെ തരമില്ല. അത്രമാത്രം മൂല്യക്രമങ്ങള്‍ ഇന്ത്യന്‍ജനാധിപത്യകൂടാരങ്ങളില്‍നിന്നും ഭരണമണ്ഡലങ്ങളില്‍നിന്നും പടിയിറങ്ങിപ്പോയിരിക്കുന്നു. ചണ്ഡിഗഡ് മേയര്‍ തിരഞ്ഞെടുപ്പില്‍ ബിജെപി സ്ഥാനാര്‍ഥിയെ മേയറാക്കാന്‍ വരണാധികാരിതന്നെ നടത്തിയ നഗ്നമായ കുറ്റകൃത്യങ്ങളാണ് ഇന്ത്യന്‍ജനാധിപത്യത്തിന്റെ അസ്തിവാരമിളക്കുന്ന തരത്തില്‍ തീരാക്കളങ്കമായിരിക്കുന്നതും വെല്ലുവിളിയുയര്‍ത്തുന്നതും. ജനാധിപത്യത്തെ അവഹേളിക്കുന്നതു കണ്ട് ഞെട്ടിപ്പോയെന്നും ജനാധിപത്യത്തെ കശാപ്പു ചെയ്യാന്‍ ആരെയും അനുവദിക്കില്ലെന്നും സുപ്രീംകോടതി ചീഫ് ജസ്റ്റീസ് ഡി.വൈ. ചന്ദ്രചൂഡ് നടത്തിയ പരാമര്‍ശം അപൂര്‍വങ്ങളില്‍ അപൂര്‍വമായി ചരിത്രം രേഖപ്പെടുത്തിയേക്കാം.
'ഇന്ത്യ' സഖ്യരൂപീകരണശേഷം ആം ആദ്മി പാര്‍ട്ടിയും കോണ്‍ഗ്രസും ഒന്നിച്ചു മത്സരിച്ച ആദ്യപരീക്ഷണമായിരുന്നു ചണ്ഡിഗഡിലെ മേയര്‍ തിരഞ്ഞെടുപ്പ്. ആകെയുള്ള 35 അംഗങ്ങളില്‍ എഎപിക്ക് പതിമ്മൂന്നും കോണ്‍ഗ്രസിന് ഏഴും കൗണ്‍സിലര്‍മാരാണ് ഉണ്ടായിരുന്നത്. ബിജെപിക്കാകട്ടെ പതിന്നാലു കൗണ്‍സിലര്‍മാരും. അകാലിദളിന്റെ ഒരു വോട്ടും, ചണ്ഡിഗഡ് എംപിയുടെ വോട്ടുംകൂടി ചേര്‍ന്നാല്‍ ബിജെപിക്ക് പതിനാറ് വോട്ടാകും. 20-16 എന്ന നിലയില്‍ എഎപി - കോണ്‍ഗ്രസ് സഖ്യത്തിനു വ്യക്തമായ ഭൂരിപക്ഷം ഉറപ്പായിരിക്കെയാണ് 'ബിജെപിക്കാരനായ' വരണാധികാരി അധികാരദുര്‍വിനിയോഗത്തിലൂടെ വളരെ ആസൂത്രിതമായി മൂന്നാംകിടരാഷ്ട്രീയം കളിച്ചത്. ആംആദ്മിയുടെ എട്ട് വോട്ടുകള്‍ വരണാധികാരി തന്നെ വെട്ടും തിരുത്തും വരുത്തി അസാധുവാക്കിയെന്നതാണ് ആരോപണം. വരണാധികാരി ബാലറ്റുപേപ്പറുകളില്‍ ക്രമക്കേടു കാട്ടുന്നതിന്റെ വീഡിയോദൃശ്യങ്ങള്‍, ആരോപണം വ്യക്തമായി തെളിയിക്കുന്നതാണെന്ന് ചീഫ് ജസ്റ്റീസ് പറയുന്നുണ്ട്. 20 ല്‍ എട്ട് വോട്ട് അസാധുവായതോടെ, 16 വോട്ടു കിട്ടിയ ബിജെപിക്കാരനെ വരണാധികാരി മേയറായി പ്രഖ്യാപിച്ചു. രാഷ്ട്രീയത്തിമിരം ബാധിച്ച ജനാധിപത്യജീര്‍ണതയുടെ നഗ്നമായ എഴുന്നള്ളിപ്പാണ് അക്ഷരാര്‍ഥത്തില്‍ ചണ്ഡിഗഡില്‍ നടന്ന മേയര്‍തിരഞ്ഞെടുപ്പും സ്ഥാനാരോഹണവും. 
രാജ്യം മറ്റൊരു പൊതുതിരഞ്ഞെടുപ്പിനെ അഭിമുഖീകരിക്കാന്‍ ഒരുങ്ങുന്ന വേളയിലാണ് വരണാധികാരിയുടെ നെറികെട്ട രാഷ്ട്രീയക്കളി രാജ്യത്തിനാകെ അപമാനവും ആശങ്കയും വരുത്തിവച്ചിരിക്കുന്നത്. മാത്രമല്ല, നീതിപൂര്‍വവും നിഷ്പക്ഷവുമായ തിരഞ്ഞെടുപ്പിന്റെ സാങ്കേതികസംവിധാനങ്ങള്‍ക്കു മുഴുവനുമുള്ള വെല്ലുവിളിയും മുന്നറിയിപ്പുംകൂടിയാണിത്. 
ഭരണം കൈയാളുന്നവരുടെ അറിവും ആജ്ഞയുമാണ് വരണാധികാരിയുടെ അസാധാരണനടപടിക്കു പിന്നിലെന്നു പറഞ്ഞാല്‍, അതില്‍ അസ്വാഭാവികതയൊന്നും തോന്നേണ്ടതില്ല. ലോകത്തിലെ ഏറ്റവും വലിയ ജനാധിപത്യരാജ്യമായ ഇന്ത്യയിലെ ഇത്തരത്തിലുള്ള കുത്സിതപ്രവര്‍ത്തനങ്ങള്‍ തിരഞ്ഞെടുപ്പുകമ്മീഷന്റെതന്നെ വിശ്വാസ്യതയ്ക്കാണ് മങ്ങലേല്പിച്ചിരിക്കുന്നത്. സ്വതന്ത്രവും നീതിപൂര്‍വവുമായ തിരഞ്ഞെടുപ്പിനു കളമൊരുക്കി, നമ്മുടെ ജനാധിപത്യസംവിധാനത്തെ ധാര്‍മികക്കരുത്തോടെ നിലനിര്‍ത്തുകയെന്ന മഹനീയോത്തരവാദിത്വം തിരഞ്ഞെടുപ്പുകമ്മീഷനോ ഭരണനേതൃത്വത്തിനോ രാഷ്ട്രീയപ്പാര്‍ട്ടികള്‍ക്കോ മാത്രമായുള്ളതല്ല,  ഓരോ പൗരന്റെയും അടിസ്ഥാന ഉത്തരവാദിത്വമായി മാറണം.
ഇക്കൊല്ലത്തെ പൊതുതിരഞ്ഞെടുപ്പിലൂടെ വീണ്ടും അധികാരത്തിലെത്തുമെന്നും അപ്പോള്‍ അടുത്ത ആയിരം വര്‍ഷത്തേക്കുള്ള ഇന്ത്യയുടെ അടിത്തറ പണിയുമെന്നും പ്രധാനമന്ത്രി നരേന്ദ്രമോദി പാര്‍ലമെന്റില്‍ വാചാലനാകുന്നത് രാജ്യം കൗതുകത്തോടെ നോക്കിക്കണ്ടു. ഈ വാചാലതയ്ക്ക് അല്പമെങ്കിലും അര്‍ഥമുണ്ടെങ്കില്‍, ചണ്ഡിഗഡ്‌സംഭവത്തിന്റെ നിന്ദ്യമായ ആവര്‍ത്തനങ്ങള്‍ രാജ്യത്തു മറ്റൊരിടത്തും നടക്കാതിരിക്കാനുള്ള അതിജാഗ്രതയുടെ ആയിരം കണ്ണുകള്‍ അദ്ദേഹത്തിനുണ്ടായേ പറ്റൂ.

 

Login log record inserted successfully!