•  29 Feb 2024
  •  ദീപം 56
  •  നാളം 50
ചെറുകഥ

ജോണിയപ്പൂപ്പന്‍

ന്റെ ശവസംസ്‌കാരത്തെക്കുറിച്ചുള്ള ചര്‍ച്ചയിലായിരുന്നു ജോണിയപ്പൂപ്പന്‍. അടക്കു കഴിഞ്ഞ് അപ്പവും ആടും കൊടുക്കണം എന്നാണ് തന്റെ ആഗ്രഹം. ഫ്‌ളക്‌സ് വയ്ക്കരുത്. കാരണം, വയ്ക്കാനുള്ള ഉത്സാഹം, മാറ്റാന്‍ കാണിക്കുന്നില്ല. ഉത്തരവാദിത്വമില്ലാത്ത ഈ ജനത. അതുപോലെ പൂക്കള്‍ ബംഗളൂരുവില്‍നിന്നു നേരത്തേ കൊണ്ടുവരണം. അതുവച്ച് റീത്തുണ്ടാക്കാന്‍ കിരണ്‍ ഫ്‌ളവേഴ്‌സിനെ ഏല്പിച്ചു. ഗാനാലാപനത്തിന് കോട്ടയം സിംഫണി മെലഡീസ്. ശവസംസ്‌കാരച്ചടങ്ങ് നടത്തുന്നത് കൊച്ചുമകന്‍ ഫാ. ജോണി പാലത്തുങ്കല്‍.
അനുസ്മരണപ്രഭാഷണം ഉറ്റസുഹൃത്ത് അരവിന്ദന്‍. പെട്ടിയെടുക്കേണ്ടത് ഒരേ പൊക്കമുള്ള മഞ്ഞ ജൂബ ധരിച്ച ആരോമല്‍ ഇവന്റ് മാനേജ്‌മെന്റ്. പെട്ടി താഴേക്കിറക്കാന്‍ യന്ത്രം അവര്‍ കൊണ്ടുവരും. അതിനുശേഷം കുഴി മൂടാനുള്ള മണ്ണ് നമ്മുടെ പുരയിടത്തില്‍നിന്ന് അവര്‍തന്നെ റെഡിയാക്കിവച്ചിട്ടുണ്ട്.
അവസാനം ആരും മൃതദേഹത്തില്‍ ചുംബിക്കാനില്ലാത്തതിനാല്‍ വാടാമല്ലിപ്പൂക്കള്‍ വിതറിയാല്‍ മതി. അതിന്റെ ഉത്തരവാദിത്വം സഹോദരപുത്രി കത്രീനായ്ക്കും അവളതു നിര്‍വഹിക്കുന്നുണ്ടോ എന്നു നോക്കേണ്ടത് സഹോദരപുത്രന്‍ മാത്തുക്കുട്ടിയുമാണ്. മൊത്തം പരിപാടി ഒരു കാരണവശാലും ഒന്നര മണിക്കൂറില്‍ കൂടുതല്‍ പാടില്ല. അകലെനിന്നു വന്നവര്‍ക്ക് യാത്രാസൗകര്യത്തിനു ബുദ്ധിമുട്ടുണ്ടാകാതെ മലബാറിലെ സാബു വേണ്ടതു ചെയ്യണം. എല്ലാ ബന്ധുക്കളെയും അത്യാവശ്യം അറിയാവുന്നത് അവനാണല്ലോ. മരണശേഷം 'മൂന്നു' നടത്തിയാല്‍ മതി. അതിനാരെയും നിര്‍ബന്ധിക്കേണ്ട കാര്യമില്ല. അതോടെ തന്റെ മരണവുമായി ബന്ധപ്പെട്ട ചടങ്ങുകള്‍ അവസാനിപ്പിക്കാം. തന്റെ ചിരിക്കുന്ന ഫോട്ടോ വരച്ച് നേരത്തേതന്നെ ഭിത്തിയില്‍ തൂക്കിയതിനാല്‍ അതിനെക്കുറിച്ചുള്ള ബുദ്ധിമുട്ടൊഴിവായി.
അങ്ങനെ തന്റെ  മരണാനന്തരം നടക്കേണ്ട  കാര്യങ്ങള്‍ കൃത്യമായി അദ്ദേഹം അറിയിച്ചു.   പങ്കെടുത്ത എല്ലാ ബന്ധുക്കള്‍ക്കും ഒന്നാന്തരം സദ്യ ഒരുക്കിയ ജോണിയപ്പൂപ്പന്‍ ഒരു കാര്യംകൂടി ചോദിച്ചു:
''ഇനി ആര്‍ക്കെങ്കിലും എന്തെങ്കിലും പറയാനുണ്ടോ?''
''വില്‍പ്പത്രം?'' സഹോദരന്‍ അവറാന്‍ അതും തുറന്നുചോദിച്ചു.
''നഗരനടുവില്‍ ആളുകള്‍ക്കു നടക്കാനായി ഒരു പാര്‍ക്ക് നിര്‍മിക്കാന്‍ സന്നദ്ധതയുള്ള തോട്ടം ഗാര്‍ഡനേഴ്‌സിനെ ആ തുക ഏല്പിച്ചുകഴിഞ്ഞു. മറ്റു തുകകള്‍ മരണാനന്തരം നിങ്ങളുടെ പെര്‍ഫോമന്‍സ് കണ്ടതിനുശേഷം നിങ്ങളുടെ അക്കൗണ്ടില്‍ എത്തും. പിന്നെ ഇവിടെനിന്നു പിറുപിറുക്കാനും മറ്റൊരു ചര്‍ച്ചയ്ക്കു സ്ഥലമൊരുക്കാനും ഞാന്‍ ഉദ്ദേശിക്കുന്നില്ല. ഭക്ഷണം കഴിച്ചതിനുശേഷം എല്ലാവര്‍ക്കും പോകാം. വന്നതിന് ഒത്തിരി നന്ദി.'' 
എല്ലാക്കാര്യങ്ങളും സാമാന്യം നന്നായി ചെയ്യണമെന്ന് ആഗ്രഹമുള്ള  ജോണിയപ്പൂപ്പന്‍ എപ്പോഴും പറയുന്ന കാര്യം ഒന്നുമാത്രം:
''ഏതു കാര്യത്തിന്റെയും  അവസാനം നമ്മള്‍ നന്നായി ചിന്തിക്കണം. ദീര്‍ഘവീക്ഷണമില്ലാത്ത മനുഷ്യനതു മറക്കുന്നു.''
എല്ലാവരും മടങ്ങിയപ്പോള്‍ അരവിന്ദന്‍മാത്രം അവശേഷിച്ചു.
''ഇനി എന്താ അടുത്ത പരിപാടി?''
''എല്ലാം കഴിഞ്ഞു എന്റെ അരവിന്ദാ. ഞാന്‍ എല്ലാം കണ്ടു, ആസ്വദിച്ചു, മരിക്കാന്‍ ഒരുങ്ങുന്നു. നീ പോയി അനുസ്മരണപ്രഭാഷണം തയ്യാറാക്കി എന്നെയൊന്നു കാണിക്ക്. ഞാന്‍ പോയി മരിക്കട്ടെ.''
''മരിക്കാനോ? നിന്റെ ഇതുവരെയുള്ള വട്ടുകളൊക്കെ ഞാന്‍ ശ്രദ്ധിച്ചു. സഹിച്ചു. പക്ഷേ,  ഇത്രയും പ്ലാനിങ്ങ് ജീവിതത്തിന് വേണോ?''
''ഉം.. നിനക്ക് എല്ലാം തമാശയാണ്. ഈ ഭൂമി വളരെയധികം മാറിക്കഴിഞ്ഞിരിക്കുന്നു. നമ്മള്‍ പ്ലാന്‍ ചെയ്തില്ലെങ്കില്‍ എല്ലാ കുഴഞ്ഞുമറിയും. എന്നെ ബാധിക്കുന്ന എല്ലാ കാര്യത്തിനും എനിക്ക് അഭിപ്രായം ഉണ്ടായിരുന്നു.  മരണവും അങ്ങനെതന്നെ.''
''ഇനി എങ്ങനെ മരിക്കുമെന്ന് എനിക്കറിയില്ല. പക്ഷേ, നമ്മുടെ അവസാനപരിപാടി ജോറാക്കണം.''
''നിന്റെ ഈ പരിപാടിയില്‍ ഒരു കാര്യത്തിനുമാത്രം കുറവുണ്ട് ജോണി!''
''എന്തിന്റെ കുറവ്''
''സ്‌നേഹത്തിന്റെ.'' അരവിന്ദന്‍ കൂളായി പറഞ്ഞു.
''ഓ.. ഞാന്‍ അതിന് ആരെയും സ്‌നേഹിക്കുന്നില്ലെടാ... കാരണം, എല്ലാ സ്‌നേഹവും നമ്മുടെ നോര്‍മല്‍ ജീവിതത്തിന്റെ താളം തെറ്റിക്കും. അതുകൊണ്ട് സ്‌നേഹം അല്ല വേണ്ടത്. മറ്റുള്ളവര്‍ക്ക് അവര്‍ അര്‍ഹിക്കുന്ന പരിഗണന. അതുമാത്രം മതി ജീവിതത്തിന്. ഇല്ലെങ്കില്‍ കുറച്ച് സന്തോഷിക്കാനും കൂടുതല്‍ നേരം കരയാനുമായി ഒരു ജീവിതം ഇവിടെ അവശേഷിക്കും. ആ തെറ്റ് ആര്‍ക്കും സംഭവിക്കരുത്.''
''ഞാന്‍ പറയാനുള്ളതു പറഞ്ഞു. നിനക്കു തീരുമാനിക്കാം.''
പെട്ടെന്നാണ് ആ ഫോണ്‍ കോള്‍ ജോണിയപ്പൂപ്പനെ തേടിവന്നത്.
ഫോണില്‍ സംസാരിച്ചശേഷം ശാന്തമായി അയാള്‍ പറഞ്ഞു:
''മലബാറിലെ സാബു പെട്ടെന്ന് അറ്റാക്കു വന്നു മരിച്ചു. അതുകൊണ്ട് എന്റെ മരണശേഷം എല്ലാ ബന്ധുക്കളെയും അറിയിക്കേണ്ട ഉത്തരവാദിത്വം നമ്മുടെ ഓപ്ഷന്‍ ബി ആയ കുട്ടിയമ്മയെ ഏല്പിക്കണം.''
''എടാ ദ്രോഹീ... ഞാന്‍ ഇപ്പം  മരിച്ചാല്‍  നിന്റെ  അനുസ്മരണപ്രഭാഷണം ആരു നടത്തുമെടാ?''
''ആദ്യം നീ ചാകട്ടെടാ... അപ്പോള്‍ ഞാന്‍ എന്റെ  ഓപ്ഷന്‍സ് വെളിപ്പെടുത്താം.''
ചിരിച്ചുകൊണ്ട് അകത്തേക്കു പോകുന്നതിനിടയില്‍ ജോണിയപ്പൂപ്പന്‍ പറഞ്ഞു.

 

Login log record inserted successfully!