എല്ലാം ശരിയാകും എന്നാണു കരുതിയത്. തളര്‍ച്ചയും തകര്‍ച്ചയും മാത്രം നല്‍കിയ ഒരു വര്‍ഷം കടന്നു പോയി. ഇനിയുള്ളത് ഉയര്‍ച്ചയുടെയും തിരിച്ചുകയറ്റത്തിന്റെയും വര്‍ഷം എന്നു പ്രതീക്ഷിച്ചു. പ്രതീക്ഷകളെ തകിടം മറിച്ചുകൊണ്ടാണു കൊവിഡ് രണ്ടാം തരംഗം എത്തിയിരിക്കുന്നത്.   
അപ്രതീക്ഷിതമായി വന്നു, അതിവേഗം പടര്‍ന്നു. ഫെബ്രുവരിയില്‍ രാജ്യത്തു പ്രതിദിന കൊവിഡ് ബാധ പതിനായിരത്തിനടുത്തായിരുന്നു. ഏപ്രില്‍ 20-ലെ രോഗബാധ 2.73 ലക്ഷം. കേരളത്തില്‍ മാര്‍ച്ച് 15-ന് രോഗബാധ 1054. ഏപ്രില്‍ 20 നു രോഗബാധ 13,644 പേര്‍ക്ക്. 
ലോകത്തിലെ ഏറ്റവും കൂടിയ നിരക്കില്‍ രോഗബാധ വര്‍ധിക്കുന്നതോടെ രാജ്യത്തെ ആരോഗ്യ സേവനരംഗം പ്രതിസന്ധിയിലാകുകയാണ്. ചികിത്സയിലുള്ള രോഗികളുടെ എണ്ണം 18 ലക്ഷത്തിലേക്കടുക്കുന്നു. ഡല്‍ഹി, മുംബൈ, ബംഗളുരു തുടങ്ങിയ മഹാനഗരങ്ങളില്‍പ്പോലും ഇങ്ങനെയൊരു മഹാമാരി അതിവേഗം പടരുമ്പോള്‍ മതിയായ ചികിത്സാസൗകര്യമില്ല. പെട്ടെന്ന് ഒരുക്കാവുന്ന സംവിധാനങ്ങള്‍ക്കും പരിമിതിയുണ്ട്. ആശുപത്രിക്കിടക്കകള്‍ കുറവ്; വെന്റിലേറ്ററുകള്‍ കുറവ്; ഓക്‌സിജന്‍ സിലിണ്ടറുകളും മെഡിക്കല്‍ ഓക്‌സിജനും കുറവ്; കോവിഡ് പ്രതിരോധവാക്‌സിനുകളും ചികിത്സയില്‍ ഉപയോഗിക്കുന്ന മരുന്നുകളും കുറവ്. ഡോക്ടര്‍മാരും നഴ്‌സുമാരും പാരാമെഡിക്കല്‍ സ്റ്റാഫും കുറവ്.
ഒരു മാസം മുമ്പുവരെ ലോകത്തിനു മുഴുവന്‍ വാക്‌സിന്‍ നല്‍കുന്ന വാക്‌സിന്റെ ആഗോളദാതാവായി ഇന്ത്യ മാറി, വാക്‌സിന്‍ നയതന്ത്രത്തില്‍ ഇന്ത്യ ചൈനയെ തുരത്തി എന്നെല്ലാം അവകാശവാദം ഉയര്‍ന്നിരുന്നതാണ്. പക്ഷേ, അതിവേഗം രോഗബാധ വര്‍ധിച്ചപ്പോള്‍ അവകാശവാദങ്ങളെല്ലാം ആവിയായി.
ഇപ്പോള്‍ വാക്‌സിന്‍ ഇറക്കുമതിക്കു രാജ്യം ശ്രമിക്കുന്നു. വാക്‌സിന്‍ കയറ്റുമതി വിലക്കി. ചികിത്സയില്‍ ഉപയോഗിക്കുന്ന റെംഡെസിവിറിന്റെ കയറ്റുമതിയും നിരോധിച്ചു.  
വാക്‌സിന്‍ ഉത്പാദനശേഷി കൂട്ടാന്‍ തീവ്രശ്രമം ആരംഭിച്ചപ്പോള്‍ നിര്‍ണായകഘടകങ്ങള്‍ കിട്ടാനില്ല. വാക്‌സിന്റെ രോഗപ്രതിരോധശേഷി വര്‍ധിപ്പിക്കാനുള്ള അഡ്ജുവാന്റ് അമേരിക്കന്‍, യൂറോപ്യന്‍ കമ്പനികളില്‍ നിന്നു കിട്ടാനില്ല. അവിടങ്ങളിലെ കയറ്റുമതിനിരോധനം തന്നെ കാരണം. രാജ്യത്തെ പ്രമുഖ വാക്‌സിന്‍ നിര്‍മാണ ക്കമ്പനിയായ സെറം ഇന്‍സ്റ്റിറ്റിയൂട്ടിന്റെ ഉടമ അഡാര്‍ പൂനാവാല നേരിട്ട് യുഎസ് പ്രസിഡന്റിനോടു കയറ്റുമതിവിലക്ക് നീക്കണമെന്ന് ആവശ്യപ്പെട്ടിരിക്കുകയാണ്.
ചുരുക്കം ഇതാണ്: കൊവിഡിന്റെ ഈ രണ്ടാം തരംഗത്തെ നേരിടാന്‍ രാജ്യം ഒരുങ്ങിയിട്ടില്ല. രോഗവ്യാപനം പിടിവിട്ടു. ചികിത്സയ്ക്കു വേണ്ടത്ര സജ്ജീകരണമില്ല. പ്രതിരോധ കുത്തിവയ്പ് (വാക്‌സിനേഷന്‍) ഇനിയും 10 ശതമാനം പേര്‍ക്കുപോലും ലഭിച്ചിട്ടില്ല.
തുടക്കത്തില്‍ അബദ്ധങ്ങള്‍
കഴിഞ്ഞ വര്‍ഷം കൊവിഡ് പുതിയ കാര്യമായിരുന്നു. എങ്ങനെ കൈകാര്യം ചെയ്യണമെന്നറിവില്ലായിരുന്നു. രോഗം, പ്രതിരോധം, ചികിത്സ തുടങ്ങിയവയെപ്പറ്റി ചൈനയും ലോകാരോഗ്യസംഘടനയും നല്‍കിയ തുച്ഛമായ വിവരങ്ങള്‍ മാത്രമായിരുന്നു അവലംബം.
രോഗവ്യാപനം തടയാനും കൊവിഡിനെ തുരത്താനുംവേണ്ടി രണ്ടു മാസത്തോളം രാജ്യം സമ്പൂര്‍ണ ലോക്ഡൗണില്‍ കഴിഞ്ഞു. എല്ലാ പ്രവര്‍ത്തനങ്ങളും മുടക്കി. കോടിക്കണക്കിനു ജനങ്ങള്‍ക്കു പണിയും വരുമാനവും ഇല്ലാതാക്കി. ഫാക്ടറികള്‍ അടച്ചിട്ടു. ഗതാഗതം മുടക്കി. വിദ്യാലയങ്ങള്‍ വിലക്കി. ആരാധനാലയങ്ങള്‍ പൂട്ടിയിട്ടു.
ഇങ്ങനെ ചെയ്താല്‍ രണ്ടു മാസംകൊണ്ടു കൊവിഡ് ഇല്ലാതാകുമെന്ന് ആരോ പറഞ്ഞു കേള്‍പ്പിച്ചതുവച്ചാണു കേന്ദ്രം വിനാശകാരിയായ ലോക്ഡൗണ്‍ നടപ്പാക്കിയത്. അഞ്ഞൂറിലേറെ രോഗികള്‍ മാത്രമുണ്ടായിരുന്നപ്പോഴാണ് ലോക്ഡൗണ്‍ പ്രഖ്യാപിച്ചത്. പിന്‍വലിച്ചപ്പോള്‍ പ്രതിദിനരോഗബാധ 10,000 കടന്നിരുന്നു.
ദാരിദ്ര്യത്തിലേക്കു വീണ്ടും വീഴ്ച
തെറ്റായ പ്രതീക്ഷകളുടെ അടിസ്ഥാനത്തില്‍ അനവസരത്തില്‍ ലോക്ഡൗണ്‍ നടപ്പാക്കിയത് രോഗവ്യാപനം തടഞ്ഞില്ല. പക്ഷേ, ജനങ്ങളുടെ പണിയും വരുമാനവും കളഞ്ഞു. 12.2 കോടി പേര്‍ക്കു തൊഴില്‍ നഷ്ടമായി. ഒരു വര്‍ഷം പിന്നിട്ടിട്ടും ഇവരില്‍ ഭൂരിപക്ഷത്തിനും പഴയ വരുമാനം കണ്ടെത്താന്‍ കഴിഞ്ഞിട്ടില്ല. പ്യൂ (ജലം) റിസര്‍ച്ച് സെന്ററുകാരുടെ സര്‍വേ പ്രകാരം ഇന്ത്യയില്‍ കഴിഞ്ഞ വര്‍ഷം 3.2 കോടി ജനങ്ങളാണു ദാരിദ്യരേഖയ്ക്കു താഴോട്ടു പതിച്ചത്. ലോകത്താകമാനം 5.4 കോടി ജനങ്ങള്‍ ദാരിദ്ര്യത്തിലേക്കു വീണതില്‍ 60 ശതമാനവും ഇന്ത്യക്കാര്‍. ദിവസം 150 രൂപയില്‍ താഴെ വരുമാനമുള്ളവരെയാണു ദാരിദ്ര്യരേഖയ്ക്കു താഴെയുള്ളവരായി കണക്കാക്കുന്നത്. ഇന്ത്യയിലെ ഇടത്തരക്കാരുടെ എണ്ണം മുപ്പതു ശതമാനം കുറഞ്ഞെന്നും അവര്‍ കണ്ടെത്തി. ജോലി നഷ്ടപ്പെട്ടില്ലെങ്കിലും ശമ്പളം വെട്ടിക്കുറയ്ക്കപ്പെട്ടും ജോലി പോയിട്ടു പിന്നീടു കുറഞ്ഞ വേതനമുള്ള ജോലിയില്‍ കയറിയുമൊക്കെ മുന്നോട്ടുപോകുന്നവരാണ് ഇതില്‍ പെടുന്നത്.
പ്രതീക്ഷകള്‍ പാളി
കഴിഞ്ഞ ധനകാര്യവര്‍ഷം ഇന്ത്യയുടെ ജിഡിപി (മൊത്തആഭ്യന്തരോത്പാദനം) 7.5 ശതമാനം ഇടിഞ്ഞെന്നാണ് റിസര്‍വ് ബാങ്കും കേന്ദ്രസര്‍ക്കാരും കണക്കാക്കുന്നത്. 2019-20 - ല്‍ 204.42 ലക്ഷം കോടി രൂപ ഉണ്ടായിരുന്നു ഇന്ത്യയുടെ ജിഡിപി. 2020-21 - ല്‍ ഇത് 224.89 ലക്ഷം കോടിയാകുമെന്നു പ്രതീക്ഷിച്ചു. പക്ഷേ, കൊവിഡും ലോക്ഡൗണും മൂലം അത് 194.82 ലക്ഷം കോടിയായി കുറഞ്ഞെന്നു കണക്കാക്കുന്നു.
ജിഡിപി കുറയുമ്പോള്‍ ആളോഹരി വരുമാനം കുറയുന്നു. ഓരോ വര്‍ഷവും ജനസംഖ്യ ഒന്നരക്കോടി വച്ചു കൂടുമ്പോള്‍ വരുമാനത്തിലെ കുറവ് കൂടുതല്‍ വലുതാകും. വരുമാനം മാത്രമല്ല വിഷയം. തൊഴില്‍ കുറയും. പുതിയ തൊഴിലന്വേഷകര്‍ക്കു മുട്ടാന്‍ അധികം വാതിലുകള്‍ ഉണ്ടാകില്ല. ജിഡിപി താഴുമ്പോള്‍ വരുന്ന വലിയ വിഷയമതാണ്.
ബൈഡന്റെ മാതൃക
അതു പരിഹരിക്കാന്‍ സര്‍ക്കാര്‍ കൂടുതല്‍ പണം മുടക്കി നിര്‍മാണപ്രവര്‍ത്തനങ്ങള്‍ നടത്തുകയോ അടിസ്ഥാനസൗകര്യവികസനത്തിനു പദ്ധതികള്‍ നടപ്പാക്കുകയോ ചെയ്യണം. അത്തരം ഉത്തേജക പദ്ധതികള്‍ വേണമെന്ന് എല്ലാവരും നിര്‍ദേശിക്കുന്നു.
അമേരിക്കയില്‍ പ്രസിഡന്റ് ജോ ബൈഡന്‍ ചെയ്തത് അതാണ്. ഹ്രസ്വകാലാശ്വാസപദ്ധതിയും ദീര്‍ഘകാലവികസനപദ്ധതിയും പ്രഖ്യാപിച്ചു. ആദ്യത്തേതു നടപ്പാക്കി. രണ്ടാമത്തേതിനു തുടക്കമിട്ടു. അതിന്റെ ഫലമായി ഈ വര്‍ഷം അമേരിക്കയുടെ ജിഡിപി 6.2 ശതമാനം വളരുമെന്നാണു കണക്കുകൂട്ടല്‍. കഴിഞ്ഞ വര്‍ഷം 3.5 ശതമാനം ചുരുങ്ങിയതാണ്. ഇന്ത്യ ഇനിയും അതിനു തയാറായിട്ടില്ല. 
ഇന്ത്യയും കഴിഞ്ഞ വര്‍ഷം ജിഡിപിയില്‍ ഏഴര ശതമാനം ഇടിവുണ്ടായശേഷം ഇക്കൊല്ലം നല്ല തിരിച്ചുവരവ് കാത്തിരിക്കുമ്പോഴാണ് കൊവിഡിന്റെ ഭീതിദമായ രണ്ടാം തരംഗം. പത്തര ശതമാനംമുതല്‍ 12.5 ശതമാനംവരെ വളര്‍ച്ചയാണു വിവിധ ഏജന്‍സികള്‍ ഇക്കൊല്ലം പ്രതീക്ഷിച്ചത്. അതു തിരുത്തിക്കുറിച്ചു തുടങ്ങി. എങ്കിലും ഇരട്ടയക്കവളര്‍ച്ചയെപ്പറ്റിയുള്ള പ്രതീക്ഷ അവര്‍ കൈവിട്ടിട്ടില്ല. ജൂണ്‍ ആദ്യം ഐഎംഎഫിന്റെ പുതിയ വിലയിരുത്തലിനെ കാത്തിരിക്കുകയാണ് എല്ലാവരും. അപ്പോഴേക്കു 2020 - 21 ന്റെ രണ്ടാമത്തെ എസ്റ്റിമേറ്റും വരും. നാലാം പാദത്തില്‍ എത്ര വളര്‍ന്നു എന്നതാകും ശ്രദ്ധാകേന്ദ്രം.
ലോക്ഡൗണ്‍ വീണ്ടും വരില്ല
ഏപ്രിലിലെ കൊവിഡ്‌വര്‍ധന ലോക്ഡൗണുകളിലേക്കു നയിക്കുമോ എന്നു പലര്‍ക്കും ഭയമുണ്ടായിരുന്നു. വിഫലവും വിനാശകാരിയുമായ ആദ്യത്തെ ലോക്ഡൗണിന്റെ അബദ്ധം ആവര്‍ത്തിക്കേണ്ട എന്നാണ് ഇത്തവണ കേന്ദ്രനിലപാട്. പ്രാദേശികമായ മൃദു ലോക്ഡൗണ്‍, കര്‍ഫ്യു, കണ്ടെയ്ന്‍മെന്റ് സോണ്‍, യാത്രാനിയന്ത്രണം, ആള്‍ക്കൂട്ടം ഒഴിവാക്കല്‍ തുടങ്ങിയവവഴി രോഗവ്യാപനം നിയന്ത്രിക്കാനാണു കേന്ദ്ര നിര്‍ദേശം.
എന്നാല്‍, ഇതിനിടെ അഞ്ചു സംസ്ഥാനങ്ങളിലെ നിയമസഭാതിരഞ്ഞെടുപ്പ് പ്രചാരണം, അനേകലക്ഷങ്ങള്‍ പങ്കെടുത്ത ഹരിദ്വാറിലെ കുംഭമേള, ഹോളി ആഘോഷങ്ങള്‍, ഉത്സവങ്ങള്‍ തുടങ്ങിയവവഴി രോഗവ്യാപനം രാജ്യത്തു പരക്കെയായി. കഴിഞ്ഞ വര്‍ഷം രോഗവ്യാപനത്തിന്റെ പാരമ്യത്തില്‍ പ്രതിദിന വര്‍ധന 97,000 വരെയേ എത്തിയുള്ളൂ. ഏപ്രില്‍ 17-ന് അവസാനിച്ച ആഴ്ചയില്‍ നാലുദിവസം രണ്ടു ലക്ഷത്തിലധികം പേര്‍ വീതം രോഗികളായി. ഇതു പുതിയ തരംഗത്തിന്റെ ഭീകരാവസ്ഥ കാണിക്കുന്നു.
ചെലവു ചെയ്യില്ല; വ്യാപാരമാന്ദ്യം വരും
പ്രാദേശിക ലോക്ഡൗണുകളും മറ്റു നിയന്ത്രണങ്ങളും സാമ്പത്തികരംഗത്തു പ്രതീക്ഷിച്ച തിരിച്ചു കയറ്റത്തിനു ഭീഷണിയാണ്. ടൂറിസം,  ഉല്ലാസം, ഹോട്ടല്‍, വ്യോമയാനം തുടങ്ങിയ പല മേഖലകളും തുടര്‍ച്ചയായ രണ്ടാം വര്‍ഷവും താഴോട്ടു പോകും. മാളുകള്‍ക്കും വ്യാപാരമേഖലയ്ക്കുമുള്ള നിയന്ത്രണങ്ങള്‍ വ്യാപാരം നന്നേ കുറയ്ക്കും. കാറുകള്‍ മുതല്‍ ഇലക്ട്രോണിക് സാമഗ്രികള്‍ വരെയുള്ളവയുടെ വില്പന കുറയും. വീട്ടിലിരുന്നു ജോലിയും പഠനവും തുടരുന്നത്, വസ്ത്രങ്ങളുടെയും ആഭരണങ്ങളുടെയും പാദരക്ഷകളുടെയും പേഴ്‌സണല്‍ കെയര്‍ ഉത്പന്നങ്ങളുടെയും വില്പന കുറയ്ക്കും.
അനിശ്ചിതത്വവും ആശങ്കയും  അവശ്യസാധനങ്ങള്‍ അമിതമായി സ്റ്റോക്ക് ചെയ്യാന്‍ ആള്‍ക്കാരെ പ്രേരിപ്പിക്കും. ഒപ്പം, പണച്ചെലവ് കൂടുതലുള്ള ഇടപാടുകള്‍ ഒഴിവാക്കും. മൊത്തത്തില്‍ ചെലവ് കുറയ്ക്കും.
ഓരോരുത്തരും ചെലവ് കുറയ്ക്കുമ്പോള്‍ അവരുടെ സമ്പാദ്യം കൂടും. പക്ഷേ, സമ്പദ്ഘടന മാന്ദ്യത്തിലാകും. കാരണം, വ്യാപാരം കുറയുന്നു. 
യുവാക്കള്‍ക്ക് നീണ്ട ഇലപൊഴിയും കാലം?
കൊവിഡ് വ്യാപനം രൂക്ഷമാകുന്നത് ഈ വര്‍ഷവും സാമ്പത്തികവളര്‍ച്ച കാര്യമായി ഉണ്ടാകാതിരിക്കാന്‍ കാരണമായാല്‍ നീണ്ട ഞെരുക്കമാകും രാജ്യത്തെ കാത്തിരിക്കുന്നത്. ഒരു നീണ്ട ഇലപൊഴിയും കാലം. യുവാക്കള്‍ക്കു പണിയും പണവും കിട്ടാതെ വര്‍ഷങ്ങള്‍ കടന്നുപോകുന്ന ദുരവസ്ഥ. 
ഇപ്പോഴത്തെ രോഗവ്യാപനം വികസ്വര-അവികസിത രാജ്യങ്ങളിലാണു വലിയ വെല്ലുവിളിയായി മാറിയിരിക്കുന്നത്. കൊവിഡിനു മുമ്പുള്ള നിലവാരത്തിലേക്ക് ഈ രാജ്യങ്ങള്‍ക്കു തിരിച്ചുകയറ്റം എളപ്പമല്ലെന്നും തിരിച്ചുകയറ്റത്തിനു വര്‍ഷങ്ങള്‍ എടുക്കുമെന്നും ലോക ബാങ്ക് ചീഫ് ഇക്കണോമിസ്റ്റ് കാര്‍മന്‍ റൈന്‍ ഹാര്‍ട്ട് പറയുന്നു. ശരിയായ നയപരിപാടികള്‍ ആവിഷ്‌കരിച്ച് സമ്പദ്ഘടനയിലേക്കു പണം ഒഴുക്കി പണിയും വരുമാനവും വര്‍ധിപ്പിക്കുക മാത്രമാണു പരിഹാരം.