സംഘര്‍ഷമേഖലകളില്‍നിന്നുള്ള സേനാപിന്മാറ്റം പൂര്‍ത്തിയായി

''ഒരു വെടിയുണ്ടപോലും ചെലവഴിക്കാതെയും ഒരു ജീവന്‍പോലും നഷ്ടപ്പെടുത്താതെയുമുള്ള ചൈനയുടെ കൈയേറ്റ തന്ത്രം ലഡാക്കില്‍ വിലപ്പോവില്ല. അവിടെ നമ്മുടെ സൈന്യം നിതാന്തജാഗ്രതയിലാണ്. ഏതു പ്രതിസന്ധിയെയും നേരിടാന്‍ നമ്മുടെ രാജ്യം സുസജ്ജമാണ്.''
ന്യൂഡല്‍ഹിയിലെ വിവേകാനന്ദ ഫൗണ്ടേഷന്‍ സംഘടിപ്പിച്ച സെമിനാറില്‍ സംസാരിക്കവേ ഇന്ത്യന്‍ കരസേനാമേധാവി ജനറല്‍ മനോജ് നരവനെ നടത്തിയ പ്രസ്താവനയാണ് മേലുദ്ധരിച്ചത്. കിഴക്കന്‍ ലഡാക്കിന്റെ പാന്‍ഗോങ് തടാകത്തിനരികില്‍നിന്നുള്ള ഇന്ത്യയുടെയും ചൈനയുടെയും സൈന്യങ്ങളുടെ പിന്മാറ്റത്തെക്കുറിച്ചു പരാമര്‍ശിക്കുകയായിരുന്നു അദ്ദേഹം.
''രണ്ടടി മുമ്പോട്ട്, ഒരടി പിന്നോട്ട്'' എന്ന തന്ത്രമാണ് യഥാര്‍ത്ഥ നിയന്ത്രണരേഖയിലും കിഴക്കന്‍ ലഡാക്കിലും ചൈന പയറ്റുന്നത്. ദക്ഷിണചൈനാക്കടലിലെ അവരുടെ അതിക്രമങ്ങളാണ് ഏറ്റവും വലിയ ഉദാഹരണം. കോര്‍ - കമാന്‍ഡര്‍മാരുടെ നേതൃത്വത്തില്‍ നടത്തിയ ഒമ്പതാംവട്ട ചര്‍ച്ചകള്‍ക്കൊടുവിലാണ് പിന്മാറ്റത്തിനുള്ള വഴിയൊരുങ്ങിയത്. ''ഇതൊരു കീഴടങ്ങലായിക്കാണേണ്ടതില്ല; മറിച്ച്, രണ്ടുകൂട്ടരുടെയും വിജയമാണ്. എങ്കിലും, പ്രശ്‌നങ്ങള്‍ ഇനിയും ബാക്കിയാണ്. ഏറ്റുമുട്ടലുകള്‍ ഒഴിവാക്കാനും സമാധാനം പുനഃസ്ഥാപിക്കാനുമാണ് ഞങ്ങള്‍ ലക്ഷ്യമിടുന്നത്.'' ജനറല്‍ നരവനെ കൂട്ടിച്ചേര്‍ത്തു. 
ഇരുരാജ്യങ്ങളും സേനാപിന്മാറ്റത്തിനുള്ള ധാരണയില്‍ എത്തുന്നതിനു രണ്ടാഴ്ചകള്‍ക്കുമുമ്പ് ചൈനീസ് പ്രസിഡന്റ് ഷി ചിന്‍ പിങ് തന്റെ സൈന്യത്തോട് ഏതു സമയത്തും യുദ്ധസജ്ജരായിരിക്കാന്‍ ആവശ്യപ്പെട്ടിരുന്നു. തെക്കുപടിഞ്ഞാറന്‍ പ്രവിശ്യയായ ജയിഷുവിലെ വായുസേനാവിഭാഗത്തോടായിരുന്നു ഷിയുടെ ആഹ്വാനം. ചൈനയിലെ ഏറ്റവും നീണ്ട അവധിക്കാലമായ 'ലൂണാര്‍ ഇയര്‍' (ചാന്ദ്രവര്‍ഷം) ആഘോഷങ്ങള്‍ക്കു മുന്നോടിയായി, സെന്‍ട്രല്‍ മിലിട്ടറി കമ്മീഷന്‍ ചെയര്‍മാന്‍കൂടിയായ പ്രസിഡന്റിന്റെ സന്ദര്‍ശനത്തിനിടെയായിരുന്നു അത്. രാത്രിയിലോ അവധിക്കാലങ്ങളിലോ ആണ് പല യുദ്ധങ്ങളും നടന്നിട്ടുള്ളതെന്ന് മുന്‍കാലചരിത്രങ്ങള്‍ ഉദ്ധരിച്ചുകൊണ്ട് സൈന്യത്തെ ഓര്‍മിപ്പിക്കാനും അദ്ദേഹം മറന്നില്ല. ദക്ഷിണചൈനാക്കടലിലെ തായ്‌വാനു സമീപം സൈനികാഭ്യാസങ്ങള്‍ ആരംഭിച്ചതും സിന്‍ജിയാംഗിലുള്ള സൈനികത്താവളത്തില്‍ അത്യന്താധുനികയുദ്ധോപകരണങ്ങള്‍ വിന്യസിച്ചതും ഷീ ചിന്‍ പിംഗിന്റെ ആഹ്വാനത്തിനു പിന്നാലെയാണ്. ചൈനയില്‍ത്തന്നെ വികസിപ്പിച്ചെടുത്ത ഭാരം കുറഞ്ഞ 'ടൈപ്പ് 15' ടാങ്കുകള്‍ 4,300 മീറ്റര്‍ ഉയരത്തിലുള്ള മഞ്ഞുമൂടിയ പ്രദേശങ്ങളിലെത്തിച്ചു പ്രവര്‍ത്തനക്ഷമത പരീക്ഷിക്കുകയും ചെയ്തു.
കിഴക്കന്‍ ലഡാക്കിലെ പാന്‍ഗോങ് തടാകക്കരയിലെ ഫിംഗര്‍ 4 ല്‍ യുദ്ധസജ്ജരായി മുഖാമുഖം നിന്ന സൈനികരുടെ പിന്മാറ്റത്തിനുള്ള കരാറിലാണ് പട്ടാള കമാന്‍ഡര്‍മാര്‍ ഒപ്പിട്ടത്. ഉടമ്പടിപ്രകാരം തടാകത്തിന്റെ വടക്കുഭാഗത്തുള്ള ചൈനയുടെ സൈന്യവും പടക്കോപ്പുകളും കവചിതവാഹനങ്ങളും ഫിംഗര്‍ 3 ന്റെ കിഴക്കുഭാഗത്തുള്ള സിറിജാപ് താവളത്തിലേക്കും ഇന്ത്യയുടെ കാലാള്‍പ്പടയും യുദ്ധോപകരണങ്ങളും സൈനികടാങ്കറുകളും ഫിംഗര്‍ 3 നടുത്തുള്ള ധന്‍സിംഗ് ധാപ്പ പോസ്റ്റിലേക്കും പിന്‍വാങ്ങും. ഇതേസമയംതന്നെ തടാകത്തിന്റെ തെക്കുഭാഗത്തുള്ള സൈനികരുടെയും പിന്മാറ്റം നടക്കും. എന്നിരുന്നാലും, തന്ത്രപ്രധാനസ്ഥാനങ്ങളില്‍ ചെറിയതോതിലുള്ള സൈനികസാന്നിധ്യമുണ്ടാകും.
കഴിഞ്ഞവര്‍ഷം സെപ്റ്റംബര്‍ 10-ാം തീയതി ചൈനയുടെ വിദേശകാര്യമന്ത്രി വാംഗ്‌യീയും ഇന്ത്യയുടെ വിദേശകാര്യമന്ത്രി എസ്. ജയശങ്കറും മോസ്‌കോയില്‍ നടത്തിയ ചര്‍ച്ചകളിലാണ് പിന്മാറ്റത്തിനുള്ള അന്തിമരൂപം നല്കിയത്. അതിര്‍ത്തിയില്‍ സംഘര്‍ഷം നിലനില്ക്കുന്നത് രണ്ടു രാജ്യങ്ങള്‍ക്കും ഗുണകരമാവില്ലെന്നും സൈന്യങ്ങള്‍ മുഖാമുഖം നില്ക്കുന്ന അവസ്ഥ അവസാനിപ്പിക്കണമെന്നും നിര്‍ദേശമുണ്ടായി. കമാന്‍ഡര്‍തലത്തില്‍ ജനുവരി 24-ാം തീയതി നടന്ന ഒമ്പതാംവട്ട ചര്‍ച്ചകളാണ് ഒടുവില്‍ ഫലം കണ്ടത്.
കഴിഞ്ഞ വര്‍ഷം മേയ്മാസം മുതല്‍ ചൈനയുടെ പീപ്പിള്‍സ് ലിബറേഷന്‍ ആര്‍മിയുടെ കടന്നുകയറ്റം തടാകത്തിന്റെ വടക്കേക്കരയില്‍ നടക്കുന്നതു ശ്രദ്ധയില്‍പ്പെട്ടപ്പോഴാണ് പിന്മാറ്റത്തിന് ചൈനയെ ഇന്ത്യ നിര്‍ബന്ധിച്ചത്. ഗല്‍വാന്‍ താഴ്‌വരയിലെ 14-ാം നമ്പര്‍ പട്രോളിങ് പോസ്റ്റിലെത്തിയ ചൈനയുടെ കാലാള്‍പ്പടയുമായി നമ്മുടെ  സൈനികര്‍ ഏറ്റുമുട്ടിയത് ജൂണ്‍ 15-ാം തീയതിയായിരുന്നു. ഒരു കമാന്‍ഡിങ് ഓഫീസര്‍ അടക്കം 20 സൈനികരുടെ ജീവനാണ് അന്ന് നമുക്കു നഷ്ടമായത്. ഒരു ബറ്റാലിയന്‍ കമാന്‍ഡര്‍ ഉള്‍പ്പെടെ നാലു സൈനികര്‍ മാത്രമേ അന്നത്തെ ഏറ്റുമുട്ടലില്‍ കൊല്ലപ്പെട്ടുള്ളൂവെന്ന എട്ടുമാസങ്ങള്‍ക്കുശേഷമുള്ള ചൈനയുടെ വെളിപ്പെടുത്തല്‍ പ്രതിരോധവൃത്തങ്ങള്‍ വിശ്വാസത്തിലെടുത്തിട്ടില്ല. ജൂണ്‍ 15 ലെ ഏറ്റുമുട്ടലിനുശേഷം ഓഗസ്റ്റ് അവസാനം രണ്ടു രാജ്യങ്ങളിലെയും സൈനികര്‍ തടാകത്തിന്റെ തെക്കന്‍ തീരത്ത് നൂറുമീറ്റര്‍ അടുത്തുവരെയെത്തി. 1962 ലെ യുദ്ധത്തിനുശേഷം വിജനമായിക്കിടന്ന പര്‍വതഭാഗങ്ങള്‍ കയ്യടക്കി പട്രോളിങ് പോസ്റ്റുകള്‍ സ്ഥാപിക്കാന്‍ കഴിഞ്ഞതും നമുക്കു നേട്ടമായി. കണ്ണോടുകണ്ണ് നോക്കിനിന്ന ശത്രുസൈന്യം സെപ്റ്റംബര്‍ മാസം മധ്യത്തില്‍ വെടിപൊട്ടിച്ച് പ്രകോപനം സൃഷ്ടിക്കുകയും ചെയ്തു.
കൈലാസപര്‍വതത്തിലെ മഞ്ഞുരുകി താഴ്‌വരയില്‍ രൂപപ്പെട്ട പാന്‍ഗോങ് തടാകത്തിന് 135 കിലോമീറ്റര്‍ നീളമുണ്ട്. 14,000 അടി ഉയരത്തില്‍ സ്ഥിതിചെയ്യുന്ന അതിമനോഹരമായ ഈ തടാകം ശൈത്യകാലത്ത് തണുത്തുറയും. വേനല്‍ക്കാലത്ത് രണ്ടു രാജ്യത്തിന്റെയും സൈനികര്‍ സ്പീഡ് ബോട്ടുകളില്‍ പട്രോളിങ് നടത്തും. കൈലാസപര്‍വതത്തിന്റെ എട്ടു ശിഖരങ്ങള്‍ തടാകത്തിലേക്കു താഴ്ന്നിറങ്ങി നില്ക്കുന്നതിനാല്‍ ആകാശക്കാഴ്ചയില്‍ വിരലുകള്‍പോലെ തോന്നിക്കും. 
യഥാര്‍ത്ഥനിയന്ത്രണരേഖ കടന്നുപോകുന്ന ഫിംഗര്‍ 8 ല്‍ നിന്ന് എട്ടു കിലോമീറ്റര്‍ അകലെ ഫിംഗര്‍ 4 വരെയുള്ള നമ്മുടെ ഭൂമിയാണ് ശത്രുസൈന്യം കവര്‍ന്നെടുത്തത്. നമ്മുടെ സൈന്യം ഫിംഗര്‍ 4 ല്‍നിന്ന് 3 ലേക്കു പിന്‍വാങ്ങുമ്പോള്‍ നഷ്ടപ്പെടുന്നത് ഫിംഗര്‍ 3 മുതല്‍  8 വരെയുള്ള ഭൂമി! സേനാപിന്മാറ്റക്കരാര്‍ പ്രകാരം ഈ ഭൂപ്രദേശം 'നിസൈനീകൃതമേഖലയായി (ചീ ാമി' െഹമിറ) മാറും. നമ്മുടെ സൈനികര്‍ ഫിംഗര്‍ 8 വരെ പട്രോളിംഗ് നടത്തിയിരുന്നതാണെന്നറിയുമ്പോഴാണ് പിന്മാറ്റ ഉടമ്പടിയില്‍ മറഞ്ഞിരിക്കുന്ന ചതി വെളിപ്പെടുന്നത്. 'നമ്മുടെ ഒരിഞ്ചുഭൂമിപോലും നഷ്ടപ്പെട്ടിട്ടില്ല' എന്ന നരേന്ദ്രമോദിയുടെ അവകാശവാദത്തിന്റെ പൊള്ളത്തരമാണ് ചോദ്യം ചെയ്യപ്പെടേണ്ടത്. ഇതേക്കുറിച്ചുള്ള ആരോപണങ്ങളുയര്‍ന്നപ്പോള്‍ പ്രതിരോധമന്ത്രി രാജ്‌നാഥ്‌സിംഗും പ്രധാനമന്ത്രിയുടെ വാദഗതിയില്‍ത്തന്നെ ഉറച്ചുനിന്നു. അദ്ദേഹത്തിന്റെ പ്രസ്താവന ഇപ്രകാരമായിരുന്നു:
''നാലു പതിറ്റാണ്ടുകളുടെ കാത്തിരിപ്പിനൊടുവിലാണ് ഇരുരാജ്യങ്ങളുടെയും സേനാപിന്മാറ്റം യാഥാര്‍ത്ഥ്യമായത്. പരസ്പരവിശ്വാസത്തിലാണ് ഈ കരാറില്‍ നമ്മുടെ രാജ്യം പങ്കാളിയായത്. അതിര്‍ത്തിപ്രദേശങ്ങളില്‍ സമാധാനവും ശാന്തിയും നിലനിര്‍ത്തുന്നതിനാണ് മുന്‍ഗണന നല്‌കേണ്ടത്. ഇനിയും ഒത്തിരിയേറെ പ്രശ്‌നങ്ങള്‍ ബാക്കിയാണ്. അവയ്ക്കും വൈകാതെ പരിഹാരമുണ്ടാകും.''
ബാക്കിയുള്ള പ്രശ്‌നങ്ങള്‍ എന്തൊക്കെയാണ്? കിഴക്കന്‍ ലഡാക്കിലെ ഗോഗ്ര, ഹോട്ട് സ്പ്രിങ്‌സ്, ഡെപ്‌സാങ്, ചുഷുല്‍ താഴ്‌വര, ഡെം ചോക് തുടങ്ങി ചൈനയുടെ കൈവശമുള്ള പ്രദേശങ്ങളില്‍നിന്ന് അവരെ ഒഴിപ്പിക്കാമെന്നോ? വടക്കും കിഴക്കും ലഡാക്കില്‍നിന്ന് ചൈന കവര്‍ന്നെടുത്തത് 43,000 ചതുരശ്രകിലോമീറ്റര്‍ ഭൂമിയാണെന്നു നേരത്തേതന്നെ കണ്ടെത്തിയിരുന്നു. രാജ്യത്തിന്റെ വടക്കുകിഴക്കുഭാഗത്തെ അരുണാചല്‍പ്രദേശില്‍നിന്ന് കൈവശപ്പെടുത്തി അനുഭവിച്ചുപോരുന്നത് 73,000 ചതുരശ്രകിലോമീറ്റര്‍ ഭൂപ്രദേശം! വടക്കന്‍ സിക്കിമിലെ ധോക് ലാ മേഖലയില്‍ നഷ്ടപ്പെട്ടത് എത്രയെന്നു കണ്ടെത്തിയിട്ടുമില്ല. ചൈനയുമായി അതിര്‍ത്തി പങ്കിടുന്ന 3,488 കിലോമീറ്ററില്‍ നഷ്ടപ്പെട്ട ഭൂമിയുടെ കൃത്യമായ വിവരങ്ങളാണു പുറത്തുവരേണ്ടത്.
ഇപ്പോഴത്തെ സൈനിക പിന്മാറ്റക്കരാര്‍പ്രകാരം കാലാള്‍പ്പടയുടെ പട്രോളിങ്ങിനുപോലും നിരോധനമുണ്ട്. യഥാര്‍ത്ഥ നിയന്ത്രണരേഖ വീണ്ടും പുനഃപരിശോധിക്കണമെന്ന ചൈനയുടെ ആവശ്യത്തിനു വഴങ്ങേണ്ടതുണ്ടോ? ബ്രിട്ടീഷ് ഭരണകാലത്ത് ടിബറ്റുമായി ഉണ്ടാക്കിയിരുന്ന രാജ്യാതിര്‍ത്തി നിലനില്ക്കുന്നതാണോ? പരിഹരിക്കപ്പെടേണ്ട പ്രശ്‌നങ്ങള്‍ നിരവധിയാണ്.
ഇന്ത്യാ - ചൈന ബന്ധത്തിലെ ഏറ്റവും വലിയ വഴിത്തിരിവായി സേനാപിന്മാറ്റക്കരാറിനെ വിശേഷിപ്പിക്കുന്ന രാഷ്ട്രീയനിരീക്ഷകരുണ്ട്. ഈ വര്‍ഷാവസാനം ഇന്ത്യയില്‍ നടക്കാനിരിക്കുന്ന ബ്രിക്‌സ് ഉച്ചകോടിയില്‍ സംബന്ധിക്കുന്ന ഷി ചിന്‍ പിങ്ങിന്റെ സന്ദര്‍ശനത്തോടെ അവശേഷിക്കുന്ന പ്രശ്‌നങ്ങളില്‍ ചിലതെങ്കിലും പരിഹരിക്കാനാകുമെന്ന പ്രതീക്ഷയും അവര്‍ക്കുണ്ട്. കയ്യേറിയ ഭൂപ്രദേശങ്ങളില്‍ നിന്നുള്ള സമ്പൂര്‍ണപിന്മാറ്റമാണ് നമ്മുടെ ആവശ്യം. എന്തുതന്നെയായാലും, രണ്ട് അണുശക്തിരാഷ്ട്രങ്ങള്‍ തമ്മിലുള്ള അതിര്‍ത്തിപ്രശ്‌നങ്ങള്‍ പരിഹാരമില്ലാതെ നീണ്ടുപോകുന്നത് അത്യന്തം ആപത്കരമാണെന്നു പറയേണ്ടതില്ലല്ലോ!