എം.എസ്. ചാമക്കാല
1സ്വര്‍ഗത്തിന്‍ വാതില്‍ തുറന്നുവരുന്നിതാ
വെള്ളക്കുതിരയീ ഭൂതലത്തില്‍!
സ്വസ്ഥനായുള്ളോന്‍ വിശ്വസ്തനായുള്ളവ-
നശ്വത്തിന്‍ മേലെഴുന്നള്ളിടുന്നു!
നീതി പാലിച്ചു വിധിക്കുന്നോനാണവന്‍
നീതിക്കായെന്നും പൊരുതിടുന്നോന്‍
ആദിക്കുമപ്പുറത്തുള്ളവനാണവ-
നാദിക്കുമാധാരമായവന്‍ താന്‍.
ആനന്ദരൂപനാണാരാധ്യനാണവന്‍
ശ്വേതാശ്വാരൂഢനായെത്തിടുന്നോന്‍
തീനാളംപോലെ ജ്വലിക്കുന്ന കണ്ണുകള്‍!
ചോരപുരണ്ടൊരു മേലങ്കിയും!
ശിരസ്സിലിരുപ്പുണ്ടനേകം കിരീടങ്ങ-
ളൊന്നിനു മേലൊന്നായ്ക്കണ്ടിടുന്നു!
ആലേഖനം ചെയ്ത പേരവനുണ്ടല്ലോ
ആ നാമം ദൈവവചനംതന്നെ!
കാരിരുമ്പിന്റെ ചെങ്കോലിനാലായവന്‍
കാത്തു ഭരിക്കുന്നു ലോകമെല്ലാം
വായില്‍നിന്നൊന്നിനു പിന്നാലെ പായും വാള്‍
വീശാത്തിടവുമിപ്പാരിലില്ല!
രാജാക്കന്മാരുടെ രാജാവു താനല്ലോ
നാഥന്മാര്‍ക്കുള്ളൊരു നാഥനും താന്‍.
ഉഗ്രപ്രതാപിയാണെങ്കിലുമായവ-
നുദ്ധതനല്ലതിശാന്തനാണേ!
കാണുന്നുണ്ടക്കരതാരിലൊരായുധ-
മേതൊരു ദിക്കിനേം കീഴ്‌പ്പെടുത്താന്‍!
ആകാശത്തട്ടിലുമാഴിത്തടത്തിലു-
മാദിവ്യായുധം കടന്നുചെല്ലും
ലോകമിതുവരെ കാണാത്തൊരായുധം
പകയില്ല; രക്തച്ചൊരിച്ചിലില്ല!
ആഗ്നേയമല്ലല്ല; ആണവമല്ലല്ല;
സ്‌നേഹാസ്ത്രമെന്നാണതിന്റെ നാമം!
അപ്രതിരോധ്യമാം പ്രേമായുധമുള്ളോ-
നേവര്‍ക്കും രക്ഷകനശ്വാരൂഢന്‍!
അധ്വാനിക്കുന്നോര്‍ക്കും ഭാരം വഹിപ്പോര്‍ക്കു-
മത്താണിയായവനശ്വാരൂഢന്‍!
അദ്ദിവ്യനെത്തുമ്പോള്‍ വാളുകളൊക്കവേ
കൊഴു2ക്കളായ് മാറ്റിപ്പണിതിടുമേ!
കൂര്‍ത്തൊരു കുന്തങ്ങള്‍ കൊയ്ത്തരിവാളായി-
ത്തീര്‍ത്തവന്‍ സ്വസ്ഥമായ് വാണിടുമേ!
ആ സ്‌നേഹസാമ്രാജ്യം വാഴ്‌വിതിലെത്തിക്കാ-
നെത്തിയോനാണവനശ്വാരൂഢന്‍.
1: വെളിപാട് 19:11
2: കലപ്പയുടെ അറ്റത്തു പിടിപ്പിക്കുന്ന ഇരുമ്പ്‌
