•  29 Feb 2024
  •  ദീപം 56
  •  നാളം 50
ശ്രേഷ്ഠമലയാളം

ഇന്‍ക്വിലാബ് സിന്ദാബാദ്

കേരളത്തിന്റെ രാഷ്ട്രീയാന്തരീക്ഷത്തില്‍ മുദ്രാവാക്യങ്ങള്‍ക്കു വലിയ സ്ഥാനമുണ്ട്. ഗുളികപ്പരുവത്തിലുള്ള ചെറുവാക്യങ്ങളില്‍ അവ അവതരിപ്പിക്കപ്പെടുന്നു. കാലഘട്ടത്തിന്റെ സ്പന്ദനങ്ങള്‍ മുദ്രാവാക്യങ്ങളില്‍നിന്നു വായിച്ചെടുക്കാം. ഒരു ആശയത്തെ ലളിതമായും സംഗീതാത്മകമായും ജനഹൃദയങ്ങളില്‍ എത്തിക്കാന്‍ പറ്റിയ ഉപാധിയത്രേ മുദ്രാവാക്യങ്ങള്‍. കേരളത്തില്‍ ഏതെങ്കിലുമൊരു സന്ദര്‍ഭത്തില്‍ ഒരിക്കലെങ്കിലും മുദ്രാവാക്യങ്ങള്‍ വിളിച്ചുകൊടുക്കുകയും അവ ഏറ്റുവിളിക്കുകകയും ചെയ്യാത്തവര്‍ ഉണ്ടാകില്ലല്ലോ.
കമ്മ്യൂണിസ്റ്റ് മുദ്രാവാക്യങ്ങളിലെ ഒരു തലവാചകമാണ് ഇന്‍ക്വിലാബ് (ഇങ്ക്വിലാബ്) സിന്ദാബാദ്. 'ഇങ്കുലാബ്', 'ഇങ്കലാബ്' എന്നിവ രൂപഭേദങ്ങളാണ്. ഏതു മുദ്രാവാക്യം വിളിയും ഇന്‍ക്വിലാബ് സിന്ദാബാദ് എന്ന വാക്യത്തില്‍നിന്ന് ആരംഭിക്കുന്നു. മുദ്രാവാക്യം വിളിച്ചുകൊടുക്കുന്നവരോ ഏറ്റുവിളിക്കുന്നവരോ ഇന്‍ക്വിലാബ് സിന്ദാബാദ് എന്ന ആരംഭവാക്യത്തിന്റെ പൊരുള്‍ മനസ്സിലാക്കിയിട്ടുണ്ടാവുമോ? നിശ്ചയമില്ല! അറബിഭാഷയില്‍നിന്ന് തത്സമമായി സ്വീകരിച്ച ഒരു വാക്കാണ് ഇന്‍ക്‌ലാബ്. മാറ്റം, ഭാഗ്യം, സ്ഥാനവിപര്യം തുടങ്ങിയ മൂലാര്‍ഥങ്ങളില്‍നിന്ന്, സാമൂഹികപരിവര്‍ത്തനം ലക്ഷ്യം വയ്ക്കുന്ന വിപ്ലവം (ഞല്ീഹൗശേീി) പ്രക്ഷോഭണം (അഴശമേശേീി) എന്നീ വിവക്ഷിതങ്ങളിലാണ് ഇന്‍ക്വിലാബിന്റെ ഇന്നത്തെ പ്രയോഗം.
പേര്‍ഷ്യന്‍ഭാഷയിലെ വാക്കാണ് സിന്ദാബാദ്. സിന്ദാ+ആബാദ് = സിന്ദാബാദ്. നീണാള്‍ വാഴട്ടെ എന്നര്‍ഥം. അപ്പോള്‍ രണ്ടുംചേര്‍ന്നുവരുന്ന ഇന്‍ക്വിലാബ് സിന്ദാബാദ് എന്ന  മുദ്രാവാക്യത്തിന് വിപ്ലവം ജയിക്കട്ടെ എന്നോ വിപ്ലവം നീണാള്‍ വാഴട്ടെ  എന്നോ അര്‍ഥം വന്നു ചേരുന്നു. ''ഇന്‍ക്‌ലാബ് (അറബി) വിപ്ലവം. സിന്ദാബാദ് (സിന്ദാ+ആബാദ്) പേര്‍ഷ്യന്‍ - നീണാള്‍ വാഴട്ടെ.'' *എന്നു പന്മനരാമചന്ദ്രന്‍നായര്‍ രേഖപ്പെടുത്തിയിട്ടുണ്ട്.
രാഷ്ട്രീയത്തിനു സംഭവിച്ച അപചയം മുദ്രാവാക്യങ്ങളിലും കാണാം. കുഞ്ഞുണ്ണിമാഷ് വരച്ചിടുന്നു: ഇങ്കുലാബിലും/ സിന്തബാദിലും/ ഇന്ത്യ തോട്ടിലും'' ** രാഷ്ട്രീയം തൊഴിലാകുമ്പോഴത്തെ പരിണതി.
* രാമചന്ദ്രന്‍നായര്‍, പന്മന, പ്രൊഫ., നല്ല ഭാഷ, ഡി.സി. ബുക്‌സ്, കോട്ടയം, 2014, പുറം - 513.
** ജോര്‍ജ് പുളിക്കന്‍, തോറ്റചരിത്രം കേട്ടിട്ടില്ല, ഡി.സി. ബുക്‌സ്, കോട്ടയം, 2017, 
പുറം - 223.

 

Login log record inserted successfully!