•  29 Feb 2024
  •  ദീപം 56
  •  നാളം 50
കുടുംബവിളക്ക്‌

രോഗികള്‍

രോഗികളെക്കുറിച്ചുള്ള അടിസ്ഥാനബോധ്യങ്ങളില്‍ അനുദിനം ആഴപ്പെടാന്‍ ക്രൈസ്തവകുടുംബങ്ങള്‍ക്കു കഴിയണം. രോഗികളായ ആരെങ്കിലുമൊക്കെ കുടുംബങ്ങളില്‍ കണ്ടെന്നിരിക്കും. നിത്യരോഗികള്‍, കിടപ്പുരോഗികള്‍, മറ്റേതെങ്കിലും വ്യാധികള്‍ ബാധിച്ചവര്‍ എന്നിങ്ങനെയുള്ളവരുണ്ടാകാം. അവരെക്കുറിച്ച് ബാക്കിയുള്ളവര്‍ക്കു ശ്രദ്ധയുണ്ടാകണം. ആതുരര്‍ ആശ്രിതരാണ്. മറ്റുള്ളവരുടെ സഹായവും സേവനവും അവര്‍ക്കാവശ്യമുണ്ട്. അവരെ ശുശ്രൂഷിക്കുന്ന കാര്യത്തില്‍ യാതൊരു ഉദാസീനതയും ഉണ്ടാകരുത്. വേണ്ടുന്ന നേരത്തുള്ള വൈദ്യസഹായവും മരുന്നും അവര്‍ക്ക് ഉറപ്പുവരുത്തണം. അവരെയും, അവര്‍ കിടക്കുന്ന ഇടങ്ങളെയും ഇടുന്ന വസ്ത്രങ്ങളെയുമൊക്കെ വൃത്തിയായി സൂക്ഷിക്കണം. ഉപേക്ഷിക്കപ്പെട്ട ഉപയോഗശൂന്യരോ അപശകുനങ്ങളോ ആയി അവരെ കാണരുത്. കുറ്റവാക്കുകളും ശാപവചസ്സുകളും ഒഴിവാക്കണം. അസുഖത്തിന് 

ആള്‍വ്യത്യാസമൊന്നുമില്ല. ആരെ വേണമെങ്കിലും അതിന് ആക്രമിക്കാം. അനാരോഗ്യം ആരും അറിഞ്ഞുകൊണ്ടു വരുത്തിവയ്ക്കുന്നതല്ലല്ലോ. അതേസമയം, രോഗം വരാതിരിക്കാനുള്ള മുന്‍കരുതലുകള്‍ എടുക്കുന്നത് അഭികാമ്യമാണ്. ശയ്യാവലംബരായിട്ടുള്ളവരുടെ അരികെയിരിക്കാനും അവരോടു സംസാരിക്കാനുമൊക്കെ എല്ലാ ദിവസവും സമയം കണ്ടെത്തണം. ഒറ്റപ്പെടലിന്റെ ഓര്‍മപോലും അവര്‍ക്കുണ്ടാകാതെ നോക്കണം. സുഖപ്പെടുത്താനുള്ള ശേഷി മരുന്നുകളെക്കാള്‍ കൂടുതല്‍ മറ്റുള്ളവരുടെ സാന്ത്വനമരുളുന്ന സാമീപ്യത്തിനുണ്ട്. സര്‍വ്വോപരി, അവര്‍ക്കുവേണ്ടി സൗഖ്യദായകനായ കര്‍ത്താവിനോടു പ്രാര്‍ഥിക്കണം. കര്‍മനിരതമായ തന്റെ കൊച്ചുജീവിതായുസ്സിനിടയിലും രോഗികളെ സന്ദര്‍ശിക്കാനും അവരോടൊപ്പം സമയം ചെലവഴിക്കാനും അവരെ സുഖപ്പെടുത്താനുമൊന്നും മറക്കാതിരുന്ന ഈശോതന്നെയാകണം ഇക്കാര്യത്തില്‍ മനുഷ്യനു മാതൃക. 
അവഗണനയുടെ അനുഭവംമൂലം രോഗികളുടെ കണ്ണീരു വീണു കുടുംബങ്ങള്‍ നനയാതിരുന്നാല്‍ നന്ന്. 
അടച്ചുപൂട്ടിയ മുറികളില്‍ ആരുംതിരിഞ്ഞുനോക്കാനില്ലാതെ യാതനയനുഭവിക്കുന്ന രോഗികളുടെ ചാരേ മറ്റുള്ളവര്‍ക്കു പുറംതിരിഞ്ഞു കര്‍ത്താവിരിപ്പുണ്ടാകും. കുടുംബാംഗങ്ങളുടെ സംരക്ഷണത്തിന്റെ സ്പര്‍ശനമേറ്റ് രോഗബാധിതരായവരുടെ ഉള്ളം സംതൃപ്തമാകട്ടെ. അപ്പോള്‍ തങ്ങളുടെ നൊമ്പരങ്ങളുടെ നടുവിലും അവര്‍ അറിയാതെ പുഞ്ചിരിക്കും. അതിന്റെ പ്രഭ ആ കുടുംബത്തിന്റെ ഐശ്വര്യമായിരിക്കും.

'വിവിധ രോഗങ്ങളാല്‍ കഷ്ടപ്പെട്ടിരുന്നവരെയെല്ലാം അവര്‍ അവന്റെ അടുത്തുകൊണ്ടുവന്നു.' (ലൂക്കാ 4:40)

Login log record inserted successfully!