ഓണ്ലൈന്ചതിക്കുഴികള് മലയാളിയെ വേട്ടയാടുന്ന കാലമാണിത്. വല വിരിച്ചു കാത്തിരിക്കുന്ന സൈബര് തട്ടിപ്പുസംഘങ്ങളുടെ ഇരകളാകാന് വിധിക്കപ്പെടുന്നതാകട്ടെ, വിദ്യാസമ്പന്നരും പ്രഫഷണലുകളുമാണെന്നതാണ് ഏറെ കൗതുകവും ആകാംക്ഷയുമുണര്ത്തുന്നത്.
ഇക്കൊല്ലം ഇതുവരെമാത്രം രാജ്യത്ത് 7000 കോടി രൂപയെങ്കിലും ഓണ്ലൈന് തട്ടിപ്പുകാര് കൊണ്ടുപോയെന്നത് അമ്പരപ്പോടെമാത്രമേ കേള്ക്കാനാവൂ. കേന്ദ്രസര്ക്കാര് പുറത്തുവിട്ട കണക്കനുസരിച്ച്, ഇക്കഴിഞ്ഞ മാര്ച്ച് 31 വരെയുള്ള മൂന്നു മാസംമാത്രം 4500 കോടി രൂപ തട്ടിപ്പിലൂടെ നഷ്ടമായി. ഇക്കൊല്ലം ഇതുവരെ 140 കോടി രൂപ മലയാളികളില്നിന്നു തട്ടിപ്പുകാര് കവര്ന്നെടുത്തിരിക്കുന്നു. പ്രതിമാസം 15 കോടി രൂപയെങ്കിലും കേരളത്തില്നിന്ന് ഓണ്ലൈന് തട്ടിപ്പിലൂടെ നഷ്ടപ്പെടുന്നുണ്ടെന്നാണ് സൈബര് ഉദ്യോഗസ്ഥര് പറയുന്നത്.
കേരളത്തിലെ മധ്യവയസ്കരെയും ഔദ്യോഗികജോലികളില്നിന്നു വിരമിച്ച് വിശ്രമജീവിതം നയിക്കുന്നവരെയും ലക്ഷ്യമിട്ടാണ് സൈബര്തട്ടിപ്പുകാര് ഏറെയും വല വിരിക്കുന്നതെന്ന് വാര്ത്തകള് പരിശോധിച്ചാല് മനസ്സിലാക്കാം. ഒരായുഷ്കാലം മുഴുവന് ജോലിചെയ്തുണ്ടാക്കിയ സമ്പാദ്യം ഒരു നിമിഷനേരത്തെ 'വെളിവുകേട്' നിമിത്തം നഷ്ടപ്പെടുന്ന ദുരവസ്ഥ അതിസങ്കീര്ണമാണ്. ഓണ്ലൈന് ട്രേഡിങ്, നിക്ഷേപപദ്ധതികള് എന്നിവയുടെ മറവിലാണ് ഏറ്റവും കൂടുതല് തട്ടിപ്പു നടക്കുന്നത്. പതിനായിരം രൂപവരെ വായ്പ നല്കുന്ന ഓണ്ലൈന് ലോണ് ആപ്പുകള് താഴ്ന്ന വരുമാനക്കാരെ ആകര്ഷിക്കുന്നതും സ്വാഭാവികം. ഇവ ഇന്സ്റ്റാള് ചെയ്യുമ്പോള്ത്തന്നെ ഉപഭോക്താവിന്റെ ഫോണിലുള്ള സകല വിവരങ്ങളും തട്ടിപ്പുകാരുടെ കസ്റ്റഡിയിലാകും. എടുത്ത ലോണ് അടച്ചുതീര്ത്താലും വീണ്ടും വീണ്ടും പണം ആവശ്യപ്പെടുകയും കൊടുത്തില്ലെങ്കില് ഫോണ്വിവരങ്ങളുടെ മറവില് ഭീഷണി മുഴക്കുകയും ചെയ്തു കുരുക്കിലാക്കുകയാണു പതിവ്.
''വെര്ച്വല് അറസ്റ്റ്'' എന്ന പേരിലുള്ള തട്ടിപ്പാണ് ഇപ്പോള് കേരളത്തിലങ്ങോളമിങ്ങോളം വ്യാപകമായി അരങ്ങേറുന്നത്. വെര്ച്വല് അറസ്റ്റിലായെന്നു ഭീഷണിപ്പെടുത്തി ഒറ്റപ്പാലത്തുനിന്ന് ഈയിടെ നാല്പതു ലക്ഷത്തോളം രൂപയാണു തട്ടിയെടുത്തത്. രണ്ടു ഡോക്ടര്മാരും വ്യവസായിയുമാണ് തട്ടിപ്പിനിരയായത്. യാക്കോബായസഭ നിരണം ഭദ്രാസനം മുന് അധ്യക്ഷന് ഗീവര്ഗീസ് മാര് കുറിലോസില്നിന്നു സമാനമായ രീതിയില് 15 ലക്ഷം രൂപ തട്ടിയെടുത്തത് ഈയിടെയാണ്. തിരുവനന്തപുരം കാലടി സ്വദേശിയായ ബിസിനസുകാരനും ഭാര്യയും ഇതേ രീതിയില് തട്ടിപ്പുവലയിലകപ്പെട്ടു. സംസ്ഥാനത്തിന്റെ വിവിധ ഭാഗങ്ങളിലായി ഒട്ടേറെപ്പേര് ഇത്തരം തട്ടിപ്പിനു വിധേയരാകുന്നുണ്ടെന്നാണ് ഔദ്യോഗികവൃത്തങ്ങള് സ്ഥിരീകരിക്കുന്നത്. ചിലര് തലനാരിഴയ്ക്കു പണം നഷ്ടപ്പെടുത്താതെ രക്ഷപ്പെടുന്നുണ്ടെന്നുമാത്രം. മറ്റുചിലരാകട്ടെ അപമാനഭയം നിമിത്തം പുറത്തുപറയുന്നുമില്ല.
ഓണ്ലൈന് സാമ്പത്തികത്തട്ടിപ്പില്പ്പെടുന്നവര്ക്ക് നഷ്ടപ്പെട്ട തുക പൂര്ണമായും തിരിച്ചുനല്കാമെന്ന് ഓള് ഇന്ത്യാ ലീഗല് സര്വീസസ് അതോറിട്ടിയുടെ പേരില് വരുന്ന സന്ദേശമാണ് ഈ നിലയിലുള്ള ഒടുവിലത്തെ തട്ടിപ്പുചൂണ്ട. ഓണ്ലൈന് തട്ടിപ്പിനിരയായവര്ക്ക് ഔദ്യോഗികകേന്ദ്രത്തില്നിന്ന് ആശ്വാസപദ്ധതിയായി വാഗ്ദാനം ചെയ്തു വിളിക്കുന്ന വാട്സാപ്പ് കോളില്നിന്നാണ് തട്ടിപ്പിന്റെ തുടക്കം. പിന്നീട് രജിസ്ട്രേഷനായി പണം ആവശ്യപ്പെടുന്നു. ഓണ്ലൈന്വഴി നഷ്ടപ്പെട്ട പണം മുഴുവന് 48 മണിക്കൂറിനുള്ളില് തിരികെ ലഭിക്കുമെന്നും രജിസ്ട്രേഷന് തുക അതോടൊപ്പം മടക്കി നല്കുമെന്നും പറഞ്ഞു വിശ്വസിപ്പിക്കുകയാണു തട്ടിപ്പുരീതി. സംസ്ഥാനത്തിന്റെ വിവിധ ഭാഗങ്ങളില് ഇത്തരം സഹായവാഗ്ദാനങ്ങളിലൂടെ തട്ടിപ്പിനിരയായവരെ വീണ്ടും വളഞ്ഞിട്ടാക്രമിക്കാന് പദ്ധതിയിടുന്ന സൈബര് ക്രിമിനല്സംഘങ്ങളെക്കുറിച്ച് പൊലീസ് ജാഗ്രതാനിര്ദേശം നല്കിയിരിക്കുകയാണ്.
അതേ, കേരളം ഒരു ചതിവലയിലകപ്പെട്ടുനില്ക്കുകയാണ്. പൊലീസിന്റെയും മറ്റു സര്ക്കാര്സംവിധാനങ്ങളുടെയും ഭാഗത്തുനിന്നുള്ള ബോധവത്കരണവും ജാഗ്രതാനിര്ദേശങ്ങളും ഊര്ജിതപ്പെടുത്തുകയാണ് പ്രഥമവും പ്രധാനവുമായ കാര്യം. ഓണ്ലൈന് സാമ്പത്തികത്തട്ടിപ്പിനിരയായാല് എത്രയുംവേഗം 1930 എന്ന നമ്പറില് പൊലീസിനെ വിവരമറിയിക്കുക. തട്ടിപ്പു നടന്ന ഒരു മണിക്കൂറിനുള്ളില്ത്തന്നെ വിവരമറിയിച്ചാല് പണം തിരിച്ചുപിടിക്കാനുള്ള സാധ്യത കൂടുതലാണെന്നാണ് സംസ്ഥാന പൊലീസ് മേധാവി അറിയിച്ചിരിക്കുന്നത്. സൈബര്വലകളെറിഞ്ഞു നമ്മെ കുരുക്കാന് കാത്തിരിക്കുന്നവരില്നിന്നു നമുക്കു രക്ഷപ്പെട്ടേ പറ്റൂ. ജാഗ്രതൈ!