*
എം.ജി. സര്‍വകലാശാല ബി.എ. മലയാളം ഒന്നാം റാങ്ക് ഈ വര്‍ഷം കരസ്ഥമാക്കിയത് കുറവിലങ്ങാട് ദേവമാതാ കോളജ് വിദ്യാര്‍ഥിനി റോസ്‌മെറിന്‍ ജോജോ. ഇനി കഴിഞ്ഞ അധ്യയനവര്‍ഷത്തിലെ ബി.എ. മലയാളം ഒന്നാം റാങ്കുകാരി ആരെന്നറിയേണ്ടേ? റോസിന്റെ ചേച്ചി അനുപ്രിയ ജോജോ. രണ്ടുപേരും പഠിച്ചത് ഒരേ സര്‍വകലാശാലയിലും ഒരേ കോളജിലും. വിഷയവും ഒന്നുതന്നെ.
തുടര്‍ച്ചയായ വര്‍ഷങ്ങളിലെ ഈ ഇരട്ടവിജയം നാടിന്റെയും വീടിന്റെയും അഭിമാനമുണര്‍ത്തിയിരിക്കുകയാണ്; ഒപ്പം, മലയാളത്തിന്റെ മഹിമയും. ചേച്ചിയെപ്പോലെ ദേവമാതാ കോളജില്‍ത്തന്നെ എം.എ. മലയാളത്തിനു ചേരാനാണു റോസ്‌മെറിന്റെയും തീരുമാനം.
കൂത്താട്ടുകുളം തിരുമാറാടി വിലങ്ങപ്പാറയില്‍ ജോജോ വി. ജോര്‍ജിന്റെയും കുറവിലങ്ങാട് സെന്റ് മേരീസ് ഗേള്‍സ് ഹൈസ്‌കൂള്‍ അധ്യാപിക ട്രീസ പി. ജോണിന്റെയും മക്കളാണ് റാങ്കുജേതാക്കളായ ഈ മിടുക്കികള്‍.
