•  29 Feb 2024
  •  ദീപം 56
  •  നാളം 50
കാര്‍ഷികം

വാളന്‍പുളി

നിരവധി ഔഷധഗുണങ്ങള്‍ നിറഞ്ഞതാണ് വാളന്‍പുളി. കേരളീയരുടെ രുചിഭേദങ്ങളില്‍ ഒരു പ്രമുഖസ്ഥാനം തന്നെ വാളന്‍പുളിക്കുണ്ട്. വാളന്‍പുളിയുടെ വേര്, പൂവ്, കായ്, ഇല തുടങ്ങി എല്ലാ ഭാഗങ്ങളും ഔഷധഗുണം നിറഞ്ഞതാണ്. ഇന്ത്യയില്‍ കേരളത്തിനു പുറമേ തമിഴ്‌നാട് ആന്ധ്രാ, കര്‍ണാടക, ഒറീസ തുടങ്ങിയ സംസ്ഥാനങ്ങളില്‍ വാളന്‍പുളി കൂടുതലായി കൃഷി ചെയ്തുവരുന്നു.
പുളിയിലയും പുളിയും വിവിധ രോഗങ്ങള്‍ക്ക് ഔഷധമായി ഉപയോഗിച്ചുവരുന്നു. 
പുളിങ്കുരുവും ഔഷധ ആവശ്യങ്ങള്‍ക്ക് ഉപയോഗിക്കാറുണ്ട്. എങ്കിലും ഇത് കന്നുകാലികള്‍ക്ക് നല്ലൊരു തീറ്റകൂടിയാണ്. 
പഴുത്ത പുളിയില്‍ 67.4% കാര്‍ബോഹൈഡ്രേറ്റ്, 3.1 % മാംസ്യവും 0.1% കൊഴുപ്പും അടങ്ങിയിരിക്കുന്നു. ഇതിനു പുറമേ 10% ടാര്‍ടാറിക് ആഡിഡും 8% പൊട്ടാടാര്‍ട്രേറ്റും ഉണ്ട്. 100 ഗ്രാം പുളി 283 കലോറി നല്‍കുന്നു.
പുളി അമിതമായി ഭക്ഷിച്ചുണ്ടാകുന്ന അസുഖത്തിന് ഏലത്തരി, ചുക്ക് ഇവ കഷായംവെച്ച് പഞ്ചസാര ചേര്‍ത്ത് സേവിച്ചാല്‍ മതിയാകും.
തുണികള്‍ ഡൈ ചെയ്യാന്‍ പുളിയിലയില്‍നിന്ന് ഒരുതരം ചായം ഉണ്ടാക്കിവരുന്നുണ്ട്. വെള്ളിപ്പാത്രങ്ങള്‍ മിനുക്കുവാന്‍ ഒരുതരം പോളീഷും പുളിയില്‍നിന്നു നിര്‍മിച്ചുവരുന്നു. ഇവ അങ്ങാടിയില്‍ ലഭ്യമാണ്. ഇതിന്റെ പരിപ്പില്‍നിന്ന് (പുളിങ്കുരു), പരുത്തി, ചണം, രോമം എന്നിവകൊണ്ടുള്ള തുണികള്‍ക്കുവേണ്ട ഒരു ദ്രാവകവും എടുക്കുന്നുണ്ട്. ഇതില്‍നിന്നെടുക്കുന്ന എണ്ണ കളിക്കോപ്പുകള്‍ക്കു ചായം കൊടുക്കുവാനും ഔഷധാവശ്യങ്ങള്‍ക്കായും ഉപയോഗിച്ചുവരുന്നു.
വെള്ളിപ്പാത്രങ്ങളും മറ്റും പുളിയിട്ടു ചകിരിയുപയോഗിച്ച് തേച്ചുകഴുകിയാല്‍ നന്നായി വെളുക്കും. 'രസം' വയ്ക്കാനും വേപ്പിലക്കട്ടി (ചമ്മന്തിപ്പൊടി) ഉണ്ടാക്കാനും കൂടുതലായി വാളന്‍പുളി ഉപയോഗിച്ചുവരുന്നു.
വാളന്‍പുളിയുടെ കുരുവിനും ഡിമാന്റുണ്ട്. ഇത് പൊടിച്ചെടുക്കുകയും കയറ്റി അയയ്ക്കപ്പെടുകയും ചെയ്യുന്നു.
തൊണ്ടു നീക്കിയ പുളിയില്‍നിന്നും നാരുകളും കുരുവും ചെറിയ കത്തി ഉപയോഗിച്ചു നീക്കിയശേഷം ഒരാഴ്ചയോളം ഇടവിട്ടു വെയിലും മഞ്ഞും കൊള്ളിച്ച് ഉണക്കിയെടുക്കുന്ന രീതിയുണ്ട്.
പുളി വളരെനാള്‍ കേടുകൂടാതെ ഇരിക്കാന്‍ കിലോയ്ക്ക് 100 ഗ്രാം കല്ലുപ്പ് എന്ന അളവില്‍ ഇടിച്ചുചേര്‍ത്ത് വയ്ക്കാറുണ്ട്. ഇത് വളരെനാള്‍ കേടുകൂടാതെ ഇരിക്കുന്നതാണ്. 
പുളി സൂക്ഷിച്ചുവയ്ക്കാന്‍ മണ്‍പാത്രങ്ങള്‍, കളിമണ്‍ഭരണികള്‍, സ്ഫടികഭരണികള്‍ തുടങ്ങിവ ഉപയോഗിച്ചുവരുന്നു.
സിദ്ധവൈദ്യമുറകളിലും പുളികൊണ്ടുള്ള പലവിധികളുമുണ്ട്. ഇന്ത്യയില്‍ കൂടുതലായും തമിഴരാണ് പുളി ഉപയോഗിക്കുന്നത്. 
ഒട്ടനവധി ഗുണങ്ങള്‍ നിറഞ്ഞ വാളന്‍പുളിയുടെ മഹിമകള്‍ നമുക്കു മറക്കാതിരിക്കാം.

 

Login log record inserted successfully!