ചന്ദ്രയാന്‍ മൂന്നിന്റെ വിജയാഘോഷങ്ങള്‍ കെട്ടടങ്ങുന്നതിനുമുമ്പേ, ആദിത്യ എല്‍-1 ന്റെ ലക്ഷ്യത്തിലേക്കുള്ള സുഗമമായ പ്രയാണം നടന്നുകൊണ്ടിരിക്കുമ്പോള്‍ത്തന്നെ, ഐഎസ്ആര്‍ഒ യുടെ ശാസ്ത്രജ്ഞന്മാര്‍ ഇടമുറിയാതെ നൂതന ആസൂത്രണങ്ങളും പരീക്ഷണങ്ങളുമായി ഓരോ ഭാരതീയനെയും പുളകംകൊള്ളിക്കുകയും ലോകബഹിരാകാശസംരംഭങ്ങളെ ഞെട്ടിക്കുകയും ചെയ്തുകൊണ്ടേയിരിക്കുന്നു. 2025 ല്‍ യാത്രികരെ ബഹിരാകാശത്തേക്കു കൊണ്ടുപോകാനുള്ള ലക്ഷ്യത്തിലേക്ക് ഒരുപടികൂടി അടുത്ത്, അതിനുമുന്നോടിയായി നടത്തപ്പെടേണ്ട പരീക്ഷണപ്പറക്കലുകളുടെ പരമ്പരയില്‍ ആദ്യത്തേത് (ഒക്‌ടോബര്‍ 21) ശനിയാഴ്ച  ഐഎസ്ആര്‍ഒ അതീവജാഗ്രതയോടെ പൂര്‍ത്തിയാക്കി. 
ഈ നേട്ടം അടുത്തവര്‍ഷം റോബോട്ടിനെ ബഹിരാകാശത്തേക്ക് അയയ്ക്കുന്നതിനും തുടര്‍ന്നുള്ള യജ്ഞങ്ങള്‍ക്കും ഒരു സുപ്രധാനനാഴികക്കല്ലായി മാറും. മൂന്നു ബഹിരാകാശയാത്രികരെ ഭൂമിയുടെ താഴ്ന്ന ഭ്രമണപഥത്തിലേക്ക് അയയ്ക്കുകയെന്ന വലിയ സ്വപ്നം യാഥാര്‍ഥ്യമാകുന്നതോടെ സോവിയറ്റ് യൂണിയന്‍, യുഎസ്, ചൈന എന്നിവയ്ക്കുശേഷം ബഹിരാകാശത്തേക്കു മനുഷ്യനെ അയയ്ക്കുന്ന നാലാമത്തെ രാജ്യമായി ചരിത്രത്താളുകളില്‍ ഇന്ത്യ ഇടംപിടിക്കും. എന്നാല്‍, ഇതിനുമുമ്പ് മനുഷ്യനെ വഹിക്കുന്ന കാപ്‌സ്യൂളിനു സുരക്ഷിതമായി ഭൂമിയില്‍ തിരിച്ചെത്താന്‍ കഴിയുമെന്നു തെളിയിക്കേണ്ട സങ്കീര്‍ണമായ കടമ്പ ഐഎസ്ആര്‍ഒ യ്ക്കു മറികടക്കേണ്ടതുണ്ട്. ഇത്തരുണത്തില്‍ ആദ്യഘട്ടമായ ഠഢഉ1 (ടെസ്റ്റ് വെഹിക്കിള്‍ ഡെമോണ്‍സ്‌ട്രേഷന്‍-1) ല്‍ ഗഗന്‍യാന്‍ പേടകം ശനിയാഴ്ച രാവിലെ 10 ന് വിക്ഷേപിക്കുകയും, 17 കി.മീ. ഉയരത്തില്‍ പറന്നുയര്‍ന്ന് ക്രൂ എസ്‌കേപ്പ് സിസ്റ്റത്തെയും ക്രൂ മൊഡ്യുളിനെയും ടെസ്റ്റ് വാഹനത്തില്‍നിന്നു വേര്‍പെടുത്തി പാരച്യൂട്ടുകളുടെ സഹായത്താല്‍ തീരത്തുനിന്ന് 10 കി.മീ. അകലെ ബംഗാള്‍ ഉള്‍ക്കടലില്‍ സുരക്ഷിതമായി പതിക്കുകയും ചെയ്തു. ഈ അവസരത്തില്‍ ഐഎസ്ആര്‍ഒയും ഇന്ത്യന്‍ നാവികസേനയും സംയുക്തമായി ചേര്‍ന്ന് നാവികകപ്പലുകളുടെയും മുങ്ങല്‍വിദഗ്ധരുടെയും സഹകരണത്തോടെ ക്രൂ മൊഡ്യൂള്‍ സുരക്ഷിതമായി വീണ്ടെടുത്തതോടെ ഇന്ത്യയുടെ പുതിയ കാല്‍വയ്പ് ശുഭസൂചനയായി പരിണമിക്കുകയായിരുന്നു.
കാലാവസ്ഥയുമായി ബന്ധപ്പെട്ട കാരണങ്ങളാല്‍ നിശ്ചയിച്ചിരുന്ന സമയത്തില്‍നിന്ന് വിക്ഷേപണത്തിനു 45 മിനിട്ടു വൈകുകയും പിന്നീട് വിക്ഷേപണത്തിന് 5 സെക്കന്‍ഡ് മുമ്പു കണ്ടെത്തിയ സിസ്റ്റത്തിലെ അപാകത വളരെവേഗം തിരിച്ചറിയുകയും പരിഹരിക്കുകയും ചെയ്ത് ചന്ദ്രയാനില്‍ സാധ്യമാക്കിയ അതേ പരാജയ-സുരക്ഷിതസമീപനം സ്വീകരിച്ചാണ് പറത്തല്‍ വിജയകരമായി പൂര്‍ത്തിയാക്കപ്പെട്ടത്. റോക്കറ്റ് തകരാറിലായാല്‍ സഞ്ചാരികള്‍ക്കു സുരക്ഷിതമായി രക്ഷപ്പെടാന്‍ കഴിയുമോയെന്നു തെളിയിക്കുന്നതിനു നടത്തപ്പെട്ട ഈ പരീക്ഷണം ശാസ്ത്രലോകത്തിന്റെ ആത്മവിശ്വാസം വര്‍ദ്ധിപ്പിക്കുന്നതോടൊപ്പം  നിര്‍ണായകമായി മാറുകയും ചെയ്തു. ഇതിലൂടെ റോക്കറ്റിന് എന്തെങ്കിലും സംഭവിച്ചാല്‍പ്പോലും യാത്രികരെ സുരക്ഷിതമായി നിലനിര്‍ത്താനുള്ള ശ്രമങ്ങളിലൂടെ മുന്നേറിക്കൊണ്ടിരിക്കുന്ന ഐഎസ്ആര്‍ഒ അടുത്തവര്‍ഷം ആളില്ലാ ഗഗന്‍യാന്‍ ബഹിരാകാശപേടകത്തില്‍ മനുഷ്യനോടു സാമ്യമുള്ള വയോമിത്ര എന്ന വനിതാ ഹ്യൂമനോയിഡ് റോബോട്ടിനെ ബഹിരാകാശത്തേക്ക് അയയ്ക്കും.
ആകാശത്തേക്കുള്ള വാഹനം എന്നര്‍ഥം വരുന്ന സംസ്‌കൃതവാക്കിന്റെ പേരിലാണ് ഗഗന്‍യാന്‍ പദ്ധതി 90 ബില്യന്‍ രൂപ ചെലവില്‍ വികസിപ്പിക്കുന്നത്. മൂന്നു ദിവസത്തേക്ക് 400 കി.മീ. താഴ്ന്ന ഭൗമഭ്രമണപഥത്തില്‍ മൂന്ന് അംഗസംഘത്തെ ബഹിരാകാശത്തേക്ക് അയച്ച്, ഇന്ത്യന്‍ മഹാസമുദ്രത്തില്‍ തെറിച്ചുവീഴുന്നതിനുമുമ്പ് മനുഷ്യര്‍ക്കു വാസയോഗ്യമായ ബഹിരാകാശകാപ്‌സ്യൂള്‍ വികസിപ്പിച്ച് അവരെ സുരക്ഷിതമായി തിരികെക്കൊണ്ടുവരാന്‍ ലക്ഷ്യമിടുന്നതാണ് ഗഗന്‍യാന്‍ ദൗത്യം. 8000 കിലോ ഭാരമുള്ള ഉപഗ്രഹത്തെപ്പോലും താഴ്ന്ന ഭ്രമണപഥത്തില്‍ എത്തിക്കാന്‍ കെല്പുള്ള ഏഴു വിജയദൗത്യങ്ങള്‍ സ്വന്തമാക്കിയ ഐഎസ്ആര്‍ഒയുടെ വലിയ സ്വപ്നങ്ങളുടെ അമരക്കാരനായ 640 ടണ്‍ ഭാരവും 43.5 മീറ്റര്‍ ഉയരവുമുള്ള കരുത്തുറ്റ വമ്പന്‍ റോക്കറ്റ് ഘഢങ-3 തന്നെയാണ് ഗഗന്‍യാന്‍ ദൗത്യത്തിന്റെയും ചുക്കാന്‍ പിടിക്കുന്നത്. ചന്ദ്രയാന്‍ മൂന്നിന്റെ ശോഭയും ആദിത്യ എല്‍ 1 ന്റെ വിക്ഷേപണവും ചരിത്രം സൃഷ്ടിച്ചു മുന്നേറുന്ന ഈ സാഹചര്യത്തില്‍ത്തന്നെ ഇന്ത്യയുടെ ബഹിരാകാശത്തേക്കുള്ള അടുത്ത കാല്‍വയ്പ് വന്‍തോതില്‍ ശ്രദ്ധയാകര്‍ഷിക്കുന്നുണ്ട് എന്നതില്‍ ഒട്ടും അതിശയോക്തിയില്ല. ഇന്ത്യയുടെ ബഹിരാകാശമേഖല 2008 ല്‍ ചന്ദ്രനെ വലംവയ്ക്കാന്‍ ആദ്യമായി ഒരു പേടകം അയച്ചതുമുതല്‍ വിജയപടികള്‍ ഒന്നൊന്നായി താണ്ടി അഭിമാനപൂര്‍വം ഉയര്‍ന്നുവരികയാണ്. 2035 ഓടെ ഒരു ബഹിരാകാശനിലയം സ്ഥാപിക്കാനും 2040 ഓടെ ശാസ്ത്രജ്ഞരെ ചന്ദ്രനിലേക്ക് അയയ്ക്കാനുമുള്ള പുതിയ പദ്ധതികള്‍ ഇന്ത്യ പ്രഖ്യാപിച്ചത് എ.പി.ജെ. അബ്ദുള്‍ കലാമിന്റെ ഉയരങ്ങളിലേക്കു നോക്കി സ്വപ്നം കാണാനുള്ള ആഹ്വാനത്തെ രാജ്യം ശിരസ്സാ വഹിച്ചതിന്റെ സൂചനയായി കണക്കാക്കാം. ഒരുപക്ഷേ, വരുംതലമുറകള്‍ നിര്‍വഹിക്കാനും സാക്ഷിയാകാനും പോകുന്ന അനിര്‍വചനീയമായ മാറ്റങ്ങളുടെയും കുതിപ്പുകളുടെയും തുടക്കംമാത്രമായിരിക്കാം ഇന്നു സാധ്യമായിരിക്കുന്ന ഈ ചെറിയ വിജയപരീക്ഷണം.