ഒന്നായി ചെറുക്കാം; ലഹരിയെ

ലഹരിയെന്ന വന്‍വിപത്തിനെതിരേ രാജ്യാന്തരസമൂഹത്തെ ഉണര്‍ത്തുകയെന്ന ലക്ഷ്യത്തോടെ 1987 മുതല്‍ ജൂണ്‍ 26 ലോകലഹരിവിരുദ്ധദിനമായി ആചരിക്കുന്നു. ലോകത്തെ ആദ്യലഹരിമരുന്നു വിരുദ്ധയുദ്ധമായി കണക്കാക്കാവുന്ന ചൈനയിലെ ഒന്നാം ഒപ്പിയം (കറുപ്പ്) യുദ്ധത്തിന്റെ ((Opium war)) ഓര്‍മയിലാണ് ഈ ദിനം തിരഞ്ഞെടുത്തത്. People first: Stop stigma and discrimination, strengthen prevention (പ്രതിരോധം ശക്തിപ്പെടുത്തുക, വിവേചനവും കളങ്കപ്പെടുത്തലും ഇല്ലാതാക്കുക; ജനങ്ങളാണ് മുഖ്യം) എന്നാണ് ഇത്തവണ ഐക്യരാഷ്ട്രസഭ മുന്നോട്ടുവയ്ക്കുന്ന പ്രമേയം. ആഗോളവ്യാപകമായി ലഹരിക്കെതിരായ പ്രതിഷേധസമരങ്ങളും ജനകീയമുന്നേറ്റങ്ങളും നടത്തുമ്പോഴും ജനങ്ങള്‍ക്കിടയിലുള്ള ലഹരിയുടെ സ്വാധീനം അതിന്  ആനുപാതികമായി വളരുന്നുവെന്നത് ആശങ്കയുണര്‍ത്തുന്നുണ്ട്. ആഗോളതലത്തിലെ കണക്കുകള്‍പ്രകാരം 2020 ല്‍ 275 ദശലക്ഷം ആളുകള്‍ മയക്കുമരുന്നിനടിമപ്പെട്ടുവെന്നാണ് സൂചിപ്പിക്കുന്നത്. 2010 ലെ അപേക്ഷിച്ച് മയക്കുമരുന്നുപയോഗം 22 ശതമാനം വര്‍ദ്ധിച്ചതായി യു.എന്‍. ഡ്രഗ്‌സ് ആന്‍ഡ് ക്രൈം ബ്യൂറോ പറയുന്നു. എല്ലാ രാജ്യങ്ങളിലും മയക്കുമരുന്നുപയോഗം ഓരോ വര്‍ഷവും കൂടിവരികയാണ്. ഇന്നു ലോകത്ത് 27 കോടി മനുഷ്യര്‍ ലഹരിക്കടിമപ്പെട്ടിട്ടുണ്ട് എന്നാണ്  ഐക്യരാഷ്ട്രസഭയുടെ കണ്ടെത്തല്‍. 
മയക്കുമരുന്നുകള്‍ തലച്ചോറിനെയാണ് കടന്നാക്രമിക്കുന്നത്. അതിനാല്‍, മസ്തിഷ്‌കത്തകരാറുകള്‍ സ്ഥിരമായ അടിമത്തത്തിലേക്ക് ഒരുവനെ നയിക്കും. മാത്രവുമല്ല, ചികിത്സവഴി കരകയറുന്നവര്‍ മയക്കുമരുന്നു കഴിക്കാതെ വര്‍ഷങ്ങള്‍ പിന്നിട്ടിട്ടും മയക്കുമരുന്നുപയോഗത്തിലേക്കു മടങ്ങാനുള്ള സാധ്യത വളരെ കൂടുതലാണ്. ഒറ്റത്തവണ ഉപയോഗംകൊണ്ടുപോലും ലഹരിയാസക്തരാക്കി മാറ്റുന്ന സിന്തറ്റിക് ലഹരികളാണ് ഇന്ന് കുട്ടികള്‍പോലും ഉപയോഗിക്കുന്നത്. എലിക്കെണിപോലെയാണ് മയക്കുമരുന്നുകള്‍. പെട്ടാല്‍ പെട്ടു. ദുരന്തം ഉറപ്പാണ്.  
2023 ജൂണ്‍ 9-ാം തീയതി വന്ന പോലീസ് വിജിലന്‍സ് റിപ്പോര്‍ട്ടുപ്രകാരം ലഹരിമാഫിയായുടെ വലയില്‍ കുടുങ്ങിയ 1057 സ്‌കൂളുകള്‍ കേരളത്തിലുണ്ട്. വിദ്യാര്‍ഥികളെ ലഹരിവാഹകരായി ദുരുപയോഗം ചെയ്യുക മാത്രമല്ല സ്‌കൂള്‍പരിസരങ്ങളില്‍ ലഹരി സൂക്ഷിക്കാന്‍ പ്രത്യേക സ്ഥലങ്ങളുമുണ്ടെന്നുള്ള വാര്‍ത്ത അമ്പരപ്പിക്കുന്നതാണ്. 2021 ല്‍ 3922 കേസുകളാണ് എക്‌സൈസ് ഡിപ്പാര്‍ട്ട്‌മെന്റ് എന്‍.ഡി.പി.എസ്. ആക്ട് പ്രകാരം രജിസ്റ്റര്‍ ചെയ്തതെങ്കില്‍ 2022-23 ല്‍ അത് 7116 കേസുകളായി വര്‍ദ്ധിച്ചിരിക്കുന്നു. 2022-23 വര്‍ഷം കുറഞ്ഞ അളവില്‍  മയക്കുമരുന്നുമായി പിടിയിലായശേഷം ജാമ്യം ലഭിച്ചത് 421 കുട്ടികള്‍ക്കാണ്. പത്തിനും പതിനഞ്ചിനും ഇടയിലുള്ള പ്രായത്തിലാണ് 70 ശതമാനം പേരും ലഹരിയുപയോഗം തുടങ്ങിയത്. 
വ്യക്തികളും സമൂഹവും പ്രത്യേകിച്ച്, വരുംതലമുറ, ലഹരിയുടെ നീരാളിപ്പിടിത്തത്തില്‍ അമര്‍ന്നിരിക്കുകയാണ്. എങ്ങനെ മുറിച്ചുമാറ്റിയാലും ഭയാനകമായ കരുത്തോടെ വീണ്ടും ആഴത്തിലും വ്യാപ്തിയിലും വേരു പടര്‍ത്തുകയാണ് ലഹരിസംഘങ്ങള്‍. നഗരങ്ങള്‍മുതല്‍ ഗ്രാമങ്ങള്‍വരെ ലഹരിമരുന്നുകളുടെ ഉപയോക്താക്കളെയും വില്പനക്കാരെയുംകൊണ്ടു നിറയുകയാണ്. സ്‌കൂള്‍ പരസരങ്ങളിലും വിദ്യാര്‍ഥികള്‍ സ്‌കൂളിലേക്കു പോകുന്ന വഴികളിലുമെല്ലാം ലഹരിവില്പനക്കാര്‍ തമ്പടിക്കുന്നു. സംസ്ഥാനത്തെ ഒരു എസ്.പി.യുടെ രണ്ട് ആണ്‍കുട്ടികള്‍ ലഹരിമരുന്നിനടിമകളാണെന്ന് കൊച്ചി സിറ്റി പോലീസ് കമ്മീഷണറുടെ വെളിപ്പെടുത്തല്‍ ഉണ്ടായതും ഈയടുത്ത ദിവസമാണ്. എല്ലാ റാങ്കിലുമുള്ള പോലീസ് ഉദ്യോഗസ്ഥരുടെ മക്കളിലും ഇത്തരക്കാര്‍ ഉണ്ടെന്നും തിരുവനന്തപുരത്ത് ഒരു സഹപ്രവര്‍ത്തകന്റെ കുട്ടി ലഹരിമരുന്നിനടിമയായി മരിച്ചുവെന്നും പോലീസ് ക്വാര്‍ട്ടേഴ്‌സിലാണ് ഇതു സംഭവിച്ചതെന്നുംകൂടി കമ്മീഷണര്‍ പറഞ്ഞത് ഞെട്ടലോടെയാണ് കേരളം ശ്രവിച്ചത്. ചുരുക്കത്തില്‍, ലഹരിയുടെ ഒരു വലിയ അഗ്നിപര്‍വതത്തിനു മുകളിലാണ് കേരളം നില്‍ക്കുന്നത്. 
മണിചെയിന്‍ മാതൃകയില്‍ കേരളത്തില്‍ ലഹരിവില്പന വ്യാപിക്കുന്നതായി കേന്ദ്ര ലഹരിവിരുദ്ധ ഏജന്‍സിയായ നാര്‍കോട്ടിക് കണ്‍ട്രോള്‍ ബ്യൂറോയുടെ ഇന്റലിജന്‍സ് വിഭാഗം റിപ്പോര്‍ട്ട് ചെയ്തിട്ടുണ്ട്. അതീവഗുരുതരമായ ഈ സാമൂഹികപ്രശ്‌നത്തെ ഇനിയും കണ്ടില്ലെന്നു നടിച്ചാല്‍ നമുക്കു നഷ്ടമാകുന്നത് ഒരു തലമുറയെയാവും. പോലീസും എക്‌സൈസുംമാത്രം വിചാരിച്ചാല്‍ തടയാവുന്നതിനപ്പുറമാണ് ലഹരിമാഫിയായുടെ വ്യാപ്തി. എല്ലാ സംവിധാനങ്ങളെയും ഒരുമിച്ച് അണിനിരത്തി പ്രത്യേക കര്‍മപദ്ധതിതന്നെ ആവിഷ്‌കരിക്കണം. രക്ഷിതാക്കള്‍ക്കും യുവജനപ്രസ്ഥാനങ്ങള്‍ക്കും പൊതുജനത്തിനും ഇതില്‍ വലിയ പങ്കുവഹിക്കാനുണ്ട്. ലഹരിയിലേക്ക് ഒഴുകിത്തീരാനുള്ളതല്ല പുതുതലമുറയെന്ന നിശ്ചയദാര്‍ഢ്യത്തോടെ നമുക്കു മുന്നോട്ടു നീങ്ങാം. കുടുംബാന്തരീക്ഷത്തിലെ ശാന്തിയും തുറന്ന അഭിപ്രായവിനിമയങ്ങളും കുട്ടികള്‍ക്കു നല്‍കുന്ന സ്‌നേഹസമൃദ്ധമായ കരുതലും അവരെ മോശമായ വഴികളില്‍നിന്ന് പിന്തിരിപ്പിക്കും. നമ്മുടെ മക്കളുടെ ഭാവിയുടെ താക്കോല്‍, രക്ഷിതാക്കളുടെയും അധ്യാപകരുടെയും സര്‍ക്കാരിന്റെയും കയ്യിലാണ്.