റോം: വത്തിക്കാന്‍ സിറ്റി സ്റ്റേറ്റ് ഗവര്‍ണറേറ്റിന്റെ സെക്രട്ടറി ജനറലായി സിസ്റ്റര്‍ റാഫേല്ല പെട്രിനിയെ ഫ്രാന്‍സിസ് മാര്‍പാപ്പ നിയമിച്ചു. വത്തിക്കാന്‍ സിറ്റി സ്റ്റേറ്റിന്റെ സെക്രട്ടറി ജനറല്‍ പദവി വഹിക്കുന്ന ആദ്യവനിതയാണ് സിസ്റ്റര്‍ റാഫേല്ല പെട്രിനി. 2005 മുതല്‍ ജനതകളുടെ സുവിശേഷവത്കരണത്തിനായുള്ള കോണ്‍ഗ്രിഗേഷനില്‍ സേവനം ചെയ്യുകയായിരുന്നു സിസ്റ്റര്‍ റാഫേല്ല. വത്തിക്കാന്‍ സിറ്റി സ്റ്റേറ്റില്‍ മാര്‍പാപ്പയ്ക്കു പകരം എക്‌സിക്യൂട്ടീവ് അധികാരം വിനിയോഗിക്കുന്ന ബോഡിയാണ് വത്തിക്കാന്‍ ഗവര്‍ണറേറ്റ്. ഇന്നുവരെയുള്ള വത്തിക്കാന്‍ പാരമ്പര്യങ്ങളില്‍നിന്നു വ്യത്യസ്തമാണ് ഈ നിയമനം. വത്തിക്കാന്‍ പ്രസ് ഓഫീസിന്റെ ബുള്ളറ്റിനാണ് ഇക്കാര്യം അറിയിച്ചത്.
1969 ജനുവരി 15 ന് റോമിലാണ് സിസ്റ്റര്‍ റാഫേല്ല പെട്രിനിയുടെ ജനനം. ഫ്രാന്‍സിസ്‌കന്‍ സിസ്റ്റേഴ്സ് ഓഫ് ദി യൂക്കരിസ്റ്റിക് എന്ന സന്ന്യാസസഭയിലെ അംഗമാണ്. റോമിലെ ലൂയിസ് യൂണിവേഴ്സിറ്റിയില്‍നിന്ന് പൊളിറ്റിക്കല്‍ സയന്‍സില്‍ ബിരുദവും ബാര്‍ണി സ്‌കൂള്‍ ഓഫ് ബിസിനസ്സില്‍നിന്ന് 'സയന്‍സ് ഓഫ് ഓര്‍ഗനൈസേഷന്‍ ബിഹേവിയര്‍' എന്ന വിഷയത്തില്‍ ബിരുദാനന്തരബിരുദവും സെന്റ് തോമസ് അക്വിനാസിന്റെ പൊന്തിഫിക്കല്‍ യൂണിവേഴ്സിറ്റിയില്‍നിന്ന് സോഷ്യല്‍ സയന്‍സസില്‍ ഡോക്ടറേറ്റും നേടി.
2015 മുതല്‍ 2019 വരെ റോമിലെ കാമിലിയന്‍ ഇന്‍സ്റ്റിറ്റ്യൂട്ട് ഓഫ് പാസ്റ്ററല്‍ തിയോളജി ഓഫ് ഹെല്‍ത്തില്‍ സഭയുടെ സാമൂഹികസിദ്ധാന്തവും ആരോഗ്യ സാമൂഹികശാസ്ത്രവും പഠിപ്പിച്ച സിസ്റ്റര്‍ റാഫേല്ല, പൊന്തിഫിക്കല്‍ യൂണിവേഴ്‌സിറ്റി ഓഫ് സോഷ്യല്‍ സയന്‍സസിലെ ഫാക്കല്‍റ്റി ഓഫ് സോഷ്യല്‍ സയന്‍സസില്‍ വെല്‍ഫെയര്‍ ഇക്കണോമിക്‌സ്, സോഷ്യോളജി ഓഫ് എക്കണോമിക് പ്രോസസ് പ്രൊഫസറായി സേവനം ചെയ്തുവരികയാണ്.