*
കമ്പ്യൂട്ടര്‍ സയന്‍സില്‍ ലോകത്താദ്യമായി പിഎച്ച്ഡി നേടിയ വനിത ഒരു കത്തോലിക്കാ കന്യാസ്ത്രീയാണ്. സ്ത്രീകള്‍ക്ക് കമ്പ്യൂട്ടര്‍ മേഖല അപ്രാപ്യമായൊരു കാലത്താണ് ''സിസ്റ്റേഴ്‌സ് ഓഫ് ചാരിറ്റി'' സന്ന്യാസസമൂഹാംഗമായ സിസ്റ്റര്‍ മേരി കെന്നെത്ത് കെല്ലര്‍ കമ്പ്യൂട്ടര്‍ സയന്‍സില്‍ പി.എച്ച്.ഡി നേടുന്നത്. 1965 ലാണ് സിസ്റ്റര്‍ പി.എച്ച്.ഡി കരസ്ഥമാക്കുന്നത്.
1914 ല്‍ ഒഹിയോയിലാണ് സിസ്റ്റര്‍ മേരിയുടെ ജനനം. 1940 ല്‍ നിത്യവ്രതവാഗ്ദാനം സ്വീകരിച്ചശേഷം സിസ്റ്റര്‍, കണക്കില്‍ ബാച്ചിലേഴ്‌സ് ഡിഗ്രിയും, കണക്കിലും സയന്‍സിലും മാസ്റ്റേഴ്‌സ് ഡിഗ്രിയും കരസ്ഥമാക്കി. വെറുമൊരു കമ്പ്യൂട്ടര്‍ വിദഗ്ദ്ധ എന്നതിലുപരി വിവരങ്ങള്‍ എല്ലാവര്‍ക്കും ലഭ്യമാകണമെന്ന് ആഗ്രഹിച്ച വനിതയായിരുന്നു സിസ്റ്റര്‍ മേരി. 1960 ലാണ് സിസ്റ്റര്‍ മേരി വിസ്‌കോണ്‍സിന്‍ സര്‍വകലാശാലയില്‍ ചേരുന്നത്. മിഷിഗണിലെ പര്‍ഡ്യൂ സര്‍വകലാശാലയിലും, ഡാര്‍ട്ട്മൗത്ത് കോളജിലും സിസ്റ്റര്‍ തന്റെ പഠനം പൂര്‍ത്തിയാക്കി.
ഡാര്‍ട്ട്മൗത്ത് കോളജ് തങ്ങളുടെ കമ്പ്യൂട്ടര്‍ സെന്ററില്‍ സ്ത്രീകള്‍ക്കുള്ള വിലക്കു നീക്കിയതാണ് സിസ്റ്റര്‍ മേരിക്ക് കമ്പ്യൂട്ടര്‍ സയന്‍സ് പഠിക്കുവാന്‍ അവസരമൊരുക്കിയത്. ഇത് ബേസിക് (ആഅടകഇ) എന്ന കമ്പ്യൂട്ടര്‍ ഭാഷ വികസിപ്പിക്കുന്നതില്‍ പങ്കാളിയാകുവാന്‍ സിസ്റ്റര്‍ മേരിക്ക് വഴിയൊരുക്കി. ബേസിക്കിനുമുമ്പ് ഗണിതശാസ്ത്രജ്ഞര്‍ക്കും ശാസ്ത്രജ്ഞര്‍ക്കും മാത്രമായിരുന്നു തങ്ങളുടെ രീതിയിലുള്ള സോഫ്റ്റ്വെയര്‍ വികസിപ്പിക്കുവാന്‍ കഴിഞ്ഞിരുന്നത്. എന്നാല്‍, ആര്‍ക്കും പഠിക്കാവുന്ന ഒരു കമ്പ്യൂട്ടര്‍ ഭാഷയായിരുന്നു ബേസിക്.
'ഇന്‍ഡക്ടീവ് ഇന്‍ഫറന്‍സ് ഓണ്‍ കമ്പ്യൂട്ടര്‍ ജെനറേറ്റഡ് പാറ്റേണ്‍സ്' എന്ന പേരില്‍ സി.ഡി.സി ഫോര്‍ട്രാന്‍ 63 യിലാണ് സിസ്റ്റര്‍ തന്റെ പി.എച്ച്.ഡി ക്ക് വേണ്ട പ്രബന്ധം തയ്യാറാക്കിയത്. ഇയോവയിലെ ക്ലാര്‍ക്ക് കോളജില്‍ ഒരു കമ്പ്യൂട്ടര്‍ വിഭാഗവും സിസ്റ്റര്‍ മേരി സ്ഥാപിച്ചു. 20 വര്‍ഷക്കാലം സിസ്റ്റര്‍ അതിന്റെ ഡയറക്ടറായി സേവനം ചെയ്തു.
ജനങ്ങളെ സമര്‍ത്ഥരും, സ്വയമായി ചിന്തിക്കുവാന്‍ കഴിവുള്ളവരുമാക്കുന്ന ഒരു കാലഘട്ടമായിരുന്നു സിസ്റ്ററിന്റെ സ്വപ്നം. കൃത്രിമബുദ്ധിക്ക് പുറമേ ജനങ്ങള്‍ക്ക് അറിവു നേടുന്നതിനു സഹായിക്കുവാന്‍ കമ്പ്യൂട്ടറിനു കഴിയുമെന്നും, കാലം ചെല്ലുംതോറും പക്വമതികളായ വിദ്യാര്‍ത്ഥികളുടെ എണ്ണം കൂടുമെന്നും ഇത്തരത്തിലുള്ള പഠനങ്ങളുടെ പ്രാധാന്യം വര്‍ദ്ധിക്കുമെന്നും പ്രവചിച്ച സിസ്റ്റര്‍ മേരി കെന്നെത്ത് കെല്ലര്‍ 1985 ജനുവരി 10 നാണ് നിത്യസമ്മാനത്തിനായി വിളിക്കപ്പെട്ടത്.
