പാലാ: പാലാ സെന്റ് തോമസ് കോളജ് നാഷണല്‍ അസസ്‌മെന്റ് ആന്‍ഡ് അക്രഡിറ്റേഷന്‍ കൗണ്‍സില്‍ ഏറ്റവും ഉയര്‍ന്ന ഗ്രേഡായ എ++ ന് യോഗ്യത നേടി. കഴിഞ്ഞ ദിവസം കോളജില്‍ നാക് പീയര്‍ ടീം സന്ദര്‍ശനം നടത്തിയിരുന്നു. 3.56 സിജിപിഎയോടുകൂടിയാണ് എ++ ഗ്രേഡ് നേടിയത്. കോളജ് സ്ഥാപനത്തിന്റെ 70-ാം വര്‍ഷം ഇത്രയും ഉയര്‍ന്ന സ്‌കോറില്‍ എത്തുന്നത് കോളജിന്റെ മികവ് എടുത്തുകാണിക്കുന്നു.
യുജിസി സെന്റ് തോമസ് കോളജിനെ മികവിന്റെ സാധ്യതാകേന്ദ്രമായി (സിപിഇ) തിരഞ്ഞെടുത്തിരുന്നു. പരാമര്‍ശ് സ്‌കീമിലൂടെ കോളജുകളെ നാക് അക്രഡിറ്റേഷന് ഒരുക്കുന്ന മെന്റര്‍ കോളജായും, രണ്ടുകോടി രൂപയുടെ റൂസാ പദ്ധതിയിലും സെന്റ് തോമസ് കോളജ് തിരഞ്ഞെടുക്കപ്പെട്ടിട്ടുണ്ട്.
2020 ജനുവരിയില്‍ നിലവില്‍ വന്ന ഏറ്റവും പുതിയ നാക് അക്രഡിറ്റേഷന്‍ ഫ്രെയിം വര്‍ക്കില്‍ ആദ്യ വിലയിരുത്തല്‍ ഫലം വരുന്നത് പാലാ സെന്റ് തോമസ് കോളജിനാണ്. ഇത് കോളജിന്റെ റി-അക്രഡിറ്റേഷന്റെ നാലാം സൈക്കിളാണ്. പാലാ സെന്റ് തോമസ് കോളജ് എത്രയും വേഗം കല്പിത സര്‍വകലാശാലാപദവി നേടണമെന്ന് നാക് പീയര്‍ ടീം സംഘം നിര്‍ദ്ദേശിച്ചു.