ഗിഫു മേലാറ്റൂർ
കേരളത്തില്‍ കൊവിഡ് മഹാമാരിയുടെ വ്യാപനം കുത്തനേ ഉയര്‍ന്നുകൊണ്ടിരിക്കുകയാണ്. ഇന്ത്യയിലെ പ്രതിദിന കേസുകളില്‍ പകുതിയും ഇപ്പോള്‍ കേരളത്തിലാണ്. മരണനിരക്കും ഉയര്‍ന്നു. നിലവില്‍ മൊത്തം കേസുകളില്‍ മൂന്നാമതും ചികിത്സയിലുള്ളവരുടെ എണ്ണത്തില്‍ ഒന്നാമതും കേരളമാെണന്നത് ആശങ്കാജനകമാണ്. രാജ്യത്ത് ഏറ്റവും കൂടുതല്‍ പേര്‍ ചികിത്സയിലുള്ള പത്തു ജില്ലകളില്‍ ഏഴും കേരളത്തിലാണ്. മഹാരാഷ്ട്ര, ഉത്തര്‍പ്രദേശ്, കര്‍ണാടക, പശ്ചിമബംഗാള്‍ എന്നിവയാണ് കേരളം കഴിഞ്ഞാല്‍ ഏറ്റവും കൂടുതല്‍ രോഗബാധിതരുള്ള സംസ്ഥാനങ്ങള്‍. എന്നാല്‍, ഈ നാലു സംസ്ഥാനങ്ങളിലെയും മൊത്തം രോഗബാധിതരുടെ എണ്ണം കേരളത്തിലേതിനെക്കാള്‍ താഴെയാണ്. രോഗമുക്തരെക്കാള്‍ രോഗബാധിതരുടെ എണ്ണം കൂടിവരികയാണ്.
രോഗബാധയുടെ ആദ്യഘട്ടത്തില്‍ മികച്ച പ്രതിരോധപ്രവര്‍ത്തനമാണ് കേരളത്തില്‍ നടന്നത്. ജീവനക്കാരുടെ പരിശീലനം, സുരക്ഷാമാര്‍ഗങ്ങള്‍, വീടുകളിലെ നിരീക്ഷണം, ഐസൊലേഷന്‍ വാര്‍ഡ് സജ്ജീകരണം, സാമൂഹികാകലം പാലിക്കല്‍ തുടങ്ങിയ പ്രവര്‍ത്തനങ്ങളിലെല്ലാം മികച്ച നിലവാരം പുലര്‍ത്തി. ബ്രേക്ക് ദ ചെയിന്‍ പദ്ധതിയിലൂടെ വ്യക്തിശുചിത്വം ഉറപ്പുവരുത്തി, ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചിന്റെയും (ഐസിഎംആര്‍) സുപ്രീം കോടതിയുടെയും ഹൈക്കോടതിയുടെയും വിദേശരാഷ്ട്രങ്ങളുടെയും ബിബിസി പോലുള്ള ലോകമാധ്യമങ്ങളുടെയും പ്രശംസയും കേരളം പിടിച്ചുപറ്റി. കേരളത്തിന്റെ പ്രതിരോധപ്രവര്‍ത്തനങ്ങളെക്കുറിച്ച് പഠിച്ചറിയാന്‍ തെലങ്കാന, ഒഡീഷ, ഡല്‍ഹി, കര്‍ണാടക തുടങ്ങിയ സംസ്ഥാനങ്ങളില്‍നിന്ന് സര്‍ക്കാര്‍ പ്രതിനിധികള്‍ സംസ്ഥാനത്തെത്തി. കേരളം രാജ്യത്തിനുതന്നെ മാതൃകയാണെന്നാണ് അന്ന് തെലങ്കാന സര്‍ക്കാറിന്റെ പ്രതിനിധിസംഘം അഭിപ്രായപ്പെട്ടത്.
രാഷ്ട്രീയപ്രവര്‍ത്തകരുടെ
പെരുമാറ്റച്ചട്ടലംഘനം
കൊവിഡ് നിയന്ത്രണത്തില്‍ കേരളം കൈവരിച്ച ഈ നേട്ടങ്ങള്‍ നിലനിര്‍ത്തി ഈ വര്‍ഷമാദ്യത്തോടെ സ്‌കൂളുകള്‍ തുറന്നുപ്രവര്‍ത്തിക്കാനും ജനജീവിതം സാധാരണനിലയിലേക്കു കൊണ്ടുവരാനുമുള്ള ഒരുക്കത്തിലായിരുന്നു സര്‍ക്കാര്‍. അതിനിടെ കടന്നുവന്ന തദ്ദേശ സ്വയംഭരണസ്ഥാപന തിരഞ്ഞെടുപ്പാണ് എല്ലാം താളം തെറ്റിച്ചത്. തിരഞ്ഞെടുപ്പ് പ്രചാരണഘട്ടത്തിലും വോട്ടെടുപ്പു കേന്ദ്രങ്ങളിലും കൊവിഡ് പെരുമാറ്റച്ചട്ടങ്ങള്‍ കര്‍ശനമായി പാലിക്കണമെന്നും ഇല്ലെങ്കില്‍ രോഗവ്യാപനം പൂര്‍വോപരി ശക്തിപ്രാപിക്കുമെന്നും ആരോഗ്യവകുപ്പ് കര്‍ശനമുന്നറിയിപ്പു നല്‍കിയിരുന്നെങ്കിലും തിരഞ്ഞെടുപ്പുജ്വരത്തിനിടയില്‍ രാഷ്ട്രീയപ്രവര്‍ത്തകര്‍ അതെല്ലാം വിസ്മരിച്ചു.
പുല്ലുവില കല്പിക്കാത്ത പ്രഖ്യാപനങ്ങള്‍
സാമൂഹിക അകലം പാലിക്കാതെയും മാസ്‌ക് ധരിക്കാതെയുമാണ് പലരും പ്രചാരണത്തിനിറങ്ങിയത്.
തിരഞ്ഞെടുപ്പായതിനാല്‍ പോലീസും അധികൃതരും അതിനു നേരേ കണ്ണുചിമ്മുകയും ചെയ്തു. ജനുവരി 29 ന് തിരുവനന്തപുരത്ത് ഭരണസിരാകേന്ദ്രത്തിനു തൊട്ടുമുമ്പില്‍ നടന്ന സെക്രട്ടേറിയറ്റ് കാന്റീന്‍ ഭരണസമിതി തിരഞ്ഞെടുപ്പിലും കൊവിഡ് പ്രോട്ടോക്കോളുകളെല്ലാം കാറ്റില്‍ പറത്തി നൂറുകണക്കിനു ജീവനക്കാരുടെ തള്ളിക്കയറ്റമായിരുന്നു വോട്ടെടുപ്പു നടന്ന ദര്‍ബാര്‍ ഹാളിലും സൗത്ത് കോണ്‍ഫറന്‍സ് ഹാളിലും ദൃശ്യമായത്. നിയന്ത്രണം കര്‍ശനമാക്കുമെന്ന സര്‍ക്കാരിന്റെ പ്രഖ്യാപനത്തിനു ജീവനക്കാര്‍ പുല്ലുവിലപോലും കല്പിച്ചില്ല.
വ്യര്‍ഥമായ മുന്‍കരുതലുകള്‍
നിയന്ത്രണങ്ങളില്‍ വരുത്തിയ അയവ്, കൊവിഡിനെ ഇനി അത്രമാത്രം ഭയപ്പെടേണ്ടതില്ലെന്ന ധാരണ സമൂഹത്തെ ബാധിക്കാനും ഇടയാക്കി. ആരാധനാലയങ്ങളില്‍ മാത്രമാണ് നിലവില്‍ അല്പമെങ്കിലും നിയന്ത്രണങ്ങളും കരുതല്‍ നടപടികളുമുള്ളത്. കൊവിഡ്പ്രതിരോധത്തില്‍ സമൂഹത്തിനു മാതൃകയും വഴികാട്ടികളുമാകേണ്ട ജനപ്രതിനിധികള്‍പോലും കടുത്ത അലംഭാവവും അശ്രദ്ധയും ജാഗ്രതക്കുറവുമാണ് കാണിക്കുന്നത്. ബജറ്റ് സമ്മേളനത്തില്‍ നിയമസഭയില്‍ മാസ്‌ക് താഴ്ത്തിയിടുകയും സംസാരിക്കുമ്പോള്‍ മാസ്‌ക് മാറ്റുകയും ചെയ്തതിന് ചില എംഎല്‍എമാര്‍ ആരോഗ്യമന്ത്രി ശൈലജ ടീച്ചറുടെ ശാസനയ്ക്കു വിധേയരായി.
അശ്രദ്ധയുടെയും ജാഗ്രതക്കുറവിന്റെയും അനന്തരഫലമാണ് സംസ്ഥാനം ഇപ്പോള്‍ അനുഭവിച്ചുകൊണ്ടിരിക്കുന്നത്. വോട്ടെടുപ്പ് മൂന്നു ഘട്ടമാക്കിയതുള്‍പ്പെടെ രോഗപ്രതിരോധത്തിന് സര്‍ക്കാര്‍ സ്വീകരിച്ച മുന്‍കരുതലുകളെല്ലാം ഇതോടെ വ്യര്‍ഥമാകുകയായിരുന്നു.
പുതിയ ജാഗ്രതാനടപടികള്‍
രോഗത്തിന്റെ രണ്ടാം വരവ് ശക്തിപ്പെട്ടതോടെ കര്‍ശന ജാഗ്രതാനടപടികളിലേക്കു നീങ്ങിയിരിക്കുകയാണ് സര്‍ക്കാര്‍. മാസ്‌കും സാമൂഹിക അകലവും ഉറപ്പാക്കുന്നതുള്‍പ്പെടെ കൊവിഡ് പ്രതിരോധ പ്രവര്‍ത്തനങ്ങള്‍ വിട്ടുവീഴ്ചയില്ലാതെ നടപ്പാക്കാനും ബസ് സ്റ്റാന്‍ഡ്, ഷോപ്പിങ് മാള്‍, സമ്മേളനവേദികള്‍, വിവാഹ ച്ചടങ്ങുകള്‍ അടക്കം ജനങ്ങള്‍ കൂട്ടംകൂടാന്‍ സാധ്യതയുള്ള ഇടങ്ങളില്‍ പരിശോധന കര്‍ശനമാക്കാനും സര്‍ക്കാര്‍ നിര്‍ദേശം നല്‍കിയിട്ടുണ്ട്. സംസ്ഥാനത്തെ പ്രതിദിന പിസിആര്‍ പരിശോധനകളുടെ എണ്ണം ഒരു ലക്ഷമായി ഉയര്‍ത്തുകയും രോഗികളുടെ എണ്ണം ക്രമാതീതമായി ഉയരുന്ന തിരുവനന്തപുരം, കൊല്ലം, കോട്ടയം, വയനാട്, കണ്ണൂര്‍ ജില്ലകളില്‍ കൂടുതല്‍ ജാഗ്രതാനടപടികള്‍ കൈക്കൊള്ളുകയും ചെയ്തിട്ടുണ്ട്. പൊതുഗതാഗതത്തിലും തിയേറ്റര്‍, ഷോപ്പിങ് മാള്‍ എന്നിവിടങ്ങളിലും അമ്പതു ശതമാനം ആളുകള്‍ക്കു മാത്രമാകും പ്രവേശനാനുമതി. വിവാഹച്ചടങ്ങുകള്‍ക്ക് അടച്ചിട്ട ഹാളുകള്‍ ഒഴിവാക്കാനും പരമാവധി തുറസ്സായ സ്ഥലങ്ങളില്‍ നടത്താനും നിര്‍ദേശമുണ്ട്.
വീടിനുള്ളില്‍ രോഗവ്യാപനം
അധികൃതരുടെ ഇടപെടല്‍കൊണ്ടുമാത്രം ഈ മാരകരോഗം നിയന്ത്രിക്കാനാകില്ല. രോഗ ചികിത്സയല്ല. രോഗം വരാതെ സൂക്ഷിക്കുകയാണ് കൊവിഡിന്റെ കാര്യത്തില്‍ ഏറ്റവും ഫലപ്രദം. ജനങ്ങള്‍കൂടി സഹകരിച്ചെങ്കിലേ ഇതു സാധ്യമാകൂ. വിശിഷ്യാ, രോഗബാധിതരുള്ള വീടുകളില്‍ കൂടുതല്‍ കരുതല്‍ നടപടികള്‍ ആവശ്യമാണ്. 56 ശതമാനം പേര്‍ക്കും രോഗം പടരുന്നത് വീടിനുള്ളില്‍നിന്നാണെന്നാണ് തിരുവനന്തപുരം കമ്മ്യൂണിറ്റി മെഡിസിന്‍ വിഭാഗം നടത്തിയ പഠനം കാണിക്കുന്നത്.
