ജോയിഷ് ജോസ്
വയലാര്‍ രാമവര്‍മ്മ അന്തരിച്ചിട്ട് ഒക്ടോബര് 27 ന് 45 വര്‍ഷം പൂര്‍ത്തിയായി
കാവ്യകല്പനയുടെ മാന്ത്രികത്തേരിലേറ്റി മലയാളികളെ ഗാനവിഹായസ്സിലൂടെ വിസ്മയക്കാഴ്ചകള്‍ കാണിച്ച വയലാര്‍ രാമവര്‍മ്മ കാലയവനികയ്ക്കുള്ളില്‍ മറഞ്ഞിട്ട് ഒക്ടോബര് 27 ന് നാല്പത്തിയഞ്ചു വര്‍ഷം പൂര്‍ത്തിയായി. അനശ്വരഗാനങ്ങളിലൂടെ എന്നും മലയാളിയുടെ മനസ്സില്‍ ജ്വലിച്ചുനില്‍ക്കുന്ന ആ മഹാപ്രതിഭയുടെ ഓര്‍മ്മകള്‍ക്കു മുമ്പില്‍ പ്രണാമം...
ആലപ്പുഴ ജില്ലയിലെ ചേര്‍ത്തല താലൂക്കില്‍ വയലാര്‍ ഗ്രാമത്തില്‍ വെള്ളാരപ്പള്ളി കേരളവര്‍മ്മയുടെയും വയലാര്‍ രാഘവപ്പറമ്പില്‍ അംബാലിക തമ്പുരാട്ടിയുടെയും മകനായി1928മാര്‍ച്ച് 25 നാണ് രാമവര്‍മയുടെ ജനനം. അദ്ദേഹത്തിന് മൂന്നര വയസ്സുള്ളപ്പോള്‍ അച്ഛന്‍ കേരളവര്‍മ അന്തരിച്ചു. ചേര്‍ത്തലഹൈസ്‌കൂളില്‍ ഔപചാരികവിദ്യാഭ്യാസം നടത്തി. അമ്മയുടെയും അമ്മാവന്റെയും മേല്‍നോട്ടത്തില്‍ ഗുരുകുലരീതിയില്‍ സംസ്‌കൃതവും അഭ്യസിച്ചു.
വാചാലമായ കവിതകളുടെ കവിയായിരുന്നു വയലാര്‍. ഇസങ്ങളില്‍ അഭിരമിക്കുമ്പോഴും ആര്‍ഷസംസ്‌കാരത്തിന്റെ സമൃദ്ധിയില്‍ അഭിമാനിക്കുന്ന കവിയെയാണ് നാം എല്ലായിടത്തും കാണുന്നത്. ബിംബകല്പനകളിലാണ് വയലാറിന്റെ ഈ പൗരാണികാഭിമുഖ്യം തിളങ്ങിനില്‍ക്കുന്നത്. വാളിനെക്കാള്‍ ശക്തമായ സമരായുധമാണ് കവിത എന്ന തിരിച്ചറിവ് അദ്ദേഹത്തില്‍ ആദ്യന്തം പ്രകാശിച്ചുനില്‍ക്കുന്നു.
കാലഘട്ടത്തില്‍ കൊന്തയും പൂണൂലും, നാടിന്റെ നാദം, എനിക്കു മരണമില്ല, മുളങ്കാട്, ഒരു ജൂഡാസ് ജനിക്കുന്നു, എന്റെ മാറ്റൊലിക്കവിതകള്‍, സര്‍ഗ്ഗസംഗീതം, എന്നീ കാവ്യസമാഹാരങ്ങളും ആയിഷ എന്ന ഖണ്ഡകാവ്യവും അദ്ദേഹം രചിച്ചു. രക്തം കലര്‍ന്ന മണ്ണ്, വെട്ടും തിരുത്തും എന്നിവ വയലാറിന്റെ കഥാസമാഹാരങ്ങളാണ്. പുരുഷാന്തരങ്ങളിലൂടെ എന്ന യാത്രാവിവരണഗ്രന്ഥവും ശ്രദ്ധേയമാണ്.
വയലാറിനെ അനശ്വരനാക്കുന്നത് അദ്ദേഹത്തിന്റെ സിനിമാ-നാടകഗാനങ്ങളാണ്. കവിതയിലെ കാല്പനിക സൗന്ദര്യത്തിന്റെ അമൃതവര്‍ഷമായിരുന്നു ആ ഗാനപ്രപഞ്ചം. 1975 ഒക്ടോബര് 27-നു പുലര്‍ച്ചെ നാലുമണിക്ക് തന്റെ നാല്പത്തിയേഴാമത്തെ വയസ്സില്‍ വയലാര്‍ അന്തരിച്ചു. പ്രശസ്തിയുടെ നെറുകയില്‍ നില്‍ക്കുമ്പോഴായിരുന്നു അദ്ദേഹത്തിന്റെ ഈ അകാലമരണം.
