വിവാഹത്തിന് ഒരു വധുവിനെ ലഭിക്കാത്തതിനാല്‍ പ്രായമേറെ കടന്നിട്ടും, വിവാഹം നടക്കാതെ, പുര നിറഞ്ഞുനില്‍ക്കുന്ന പുരുഷന്മാര്‍ നമ്മുടെ കുടുംബങ്ങളില്‍ അനവധിയാണ്. 2023 ഫെബ്രുവരിയില്‍മാത്രം ഇതേക്കുറിച്ച്, ആയിരത്തോളം അമ്മമാരുടെ സങ്കടംപറച്ചില്‍ കേള്‍ക്കാന്‍ എനിക്കിടയായി.

ബെത്‌ലെഹം മാട്രിമോണിയല്‍ പുറത്തിറക്കിയ, കല്യാണപ്രായം എന്ന ഓഡിയോബുക്കിന്റെ പരസ്യത്തിന്, അപ്രതീക്ഷിതമായി ലഭിച്ച  വേദനിപ്പിക്കുന്ന പ്രതികരണങ്ങള്‍, ഈ വിഷയത്തില്‍ ഒരു സമൂഹിക ഇടപെടലിന് എന്നെ പ്രേരിപ്പിച്ചു.

ഫെബ്രുവരി 12, മാര്‍ച്ച് 5, മാര്‍ച്ച് 11, മാര്‍ച്ച് 28 എന്നീ തീയതികളിലായി ഡിലേയ്ഡ് മാര്യേജ് ശില്പശാലകള്‍ സംഘടിപ്പിച്ച് ഈ പ്രതിസന്ധിയെക്കുറിച്ച് നടത്തിയ ചര്‍ച്ചകളില്‍നിന്ന് ഒരുപാടു തിരിച്ചറിവുകളും ചില പരിഹാരമാര്‍ഗങ്ങളും കണ്ടെത്താനിടയായി. 

പുരുഷനു കരുത്തും (ടൃേലിഴവേ) സ്ത്രീക്കു ത്രാണിയു(ടമോശിമ)മാണ് പ്രകൃതിദത്തമായി ലഭിച്ചിരിക്കുന്നത്. കൂടുതല്‍ ബലം കുറച്ചുസമയത്തേക്കു വിനിയോഗിക്കാന്‍ പുരുഷനു പ്രാപ്തികൊടുത്ത പ്രകൃതി, സ്ത്രീയ്ക്കുള്ള ബലം കൂടുതല്‍ സമയത്തേക്കു വിനിയോഗിക്കാന്‍ പ്രാപ്തി നല്‍കി. 

സ്ത്രീശക്തീകരണത്തിന്റെ ഫലമായി വേര്‍തിരിവില്ലാതെ പഠിക്കാനും ജോലിചെയ്യാനും സ്ത്രീകള്‍ക്ക് അവസരം ലഭിച്ചതോടെ പല ജോലിസാഹചര്യങ്ങളിലും പുരുഷനെക്കാള്‍ ഫലപ്രദമായി ദീര്‍ഘനേരം പ്രവര്‍ത്തിക്കുന്നത് സ്ത്രീകളാണെന്നും മടിയും മടുപ്പുമില്ലാതെ കൂടുതല്‍ സമയം അദ്ധ്വാനിക്കാനും ഏറ്റെടുത്ത ദൗത്യം വിടാതെ പിന്തുടരാനും സ്ത്രീയ്ക്കു പുരുഷനെക്കാള്‍ കൂടുതല്‍ നൈപുണ്യമുണ്ടെന്നും തൊഴില്‍ദാതാക്കള്‍ തിരിച്ചറിഞ്ഞു. കരുത്ത് ആവശ്യമായ പ്രവൃത്തികള്‍ ചെയ്യാന്‍ യന്ത്രങ്ങളും ഉപകരണങ്ങളും നിലവില്‍വന്നതോടെ ഒട്ടു മിക്ക ജോലികളിലും പുരുഷനുമാത്രമേ ഇതു ചെയ്യാന്‍ കഴിയൂ എന്ന സാഹചര്യവും മാറി. അങ്ങനെ സ്ത്രീകള്‍ക്ക് ഇപ്പോള്‍ കൂടുതല്‍ അവസരങ്ങളും ജോലിയില്‍ ഉയര്‍ച്ചയും ലഭിക്കുന്നു. 

ഉന്നതവിദ്യാഭ്യാസം നേടുന്നതിലും പുരുഷന്മാരെക്കാള്‍ മികവു പ്രകടിപ്പിക്കുന്നതും ഇന്നു സ്ത്രീകള്‍തന്നെയാണ്. വിവാഹം വൈകിപ്പോയ പല പുരുഷന്മാരും ഉയര്‍ന്ന വിദ്യാഭ്യാസം നേടാന്‍ ശ്രമിക്കാതെ, എത്രയും വേഗം ഉപജീവനമാര്‍ഗം കണ്ടെത്തി, പഠിക്കാന്‍ മിടുക്കരായ തങ്ങളുടെ സഹോദരിമാര്‍ക്ക് ഉന്നതവിദ്യാഭ്യാസത്തിന് ധനവും അവസരവുമൊരുക്കിക്കൊടുത്തിട്ടുണ്ട്. പക്ഷേ, ഇപ്പോള്‍, വിദ്യാഭ്യാസം കുറവുള്ള ഈ പുരുഷന്മാര്‍ക്ക് വധുവിനെ കണ്ടെത്താനാവുന്നില്ല. 

സമൂഹത്തിന്റെ ചലനം നിലയ്ക്കാതെ നിലനിര്‍ത്തുന്ന തൊഴിലുകളാണ് കണ്‍സ്ട്രക്ഷന്‍, ട്രാന്‍സ്‌പോര്‍ട്ടേഷന്‍, ഡിസ്ട്രിബ്യൂഷന്‍, റിപ്പയര്‍ ആന്‍ഡ് സര്‍വീസിങ്, കാര്‍പ്പെന്ററി, പ്ലംബിങ് ഇലക്ട്രിക്കല്‍, ഫാബ്രിക്കേഷന്‍, അഗ്രിക്കള്‍ച്ചര്‍, ഫുഡ് ഇന്‍ഡസ്ട്രി, റീട്ടെയിലര്‍, ഓട്ടോമൊബൈല്‍ തുടങ്ങിയവ. ഈ അവശ്യസേവനങ്ങളില്ലെങ്കില്‍ നാടു നിശ്ചലമാകും. എന്നിരുന്നാലും, ഈ തൊഴിലുകളില്‍ ഏര്‍പ്പെട്ടിരിക്കുന്ന പുരുഷന്മാര്‍ ഇന്ന്, വിദ്യാഭ്യാസത്തിലെ അന്തരംമൂലം, ഇണയെ കിട്ടാതെ പുരനിറഞ്ഞുനില്‍ക്കുന്നു. 

കേരളത്തിലെ സ്ത്രീപുരുഷ അനുപാതംവച്ചു നോക്കുമ്പോള്‍, 1000 പുരുഷന്മാര്‍ പുര നിറഞ്ഞുനില്‍ക്കുന്നുണ്ടെങ്കില്‍, 1063 സ്ത്രീകളും പുര നിറഞ്ഞുനില്‍ക്കുന്നുണ്ടാവണം. അവര്‍ക്കു പക്ഷേ, സ്വന്തം കാലില്‍ നില്‍ക്കാനുള്ള പഠിപ്പും ജോലിയും നാടുവിട്ട് വിദേശത്തേക്കു ചേക്കാറാനുള്ള സാധ്യതയും ഉള്ളതുകൊണ്ടായിരിക്കാം, അവരുടെ അവസ്ഥയെക്കുറിച്ച് മാതാപിതാക്കള്‍ ഏറെ വേവലാതി പ്രകടിപ്പിക്കാത്തത്. 

വിദ്യാഭ്യാസം കുറഞ്ഞുപോയതുകൊണ്ടാണ് ഇണയെ കിട്ടാത്തത് എന്നു  വിധിയെ പഴിച്ച്, നിരാശപ്പെടാന്‍ വരട്ടെ, ഉയര്‍ന്ന വിദ്യാഭ്യാസവും മുന്തിയ ജോലിയുമുള്ള പുരുഷന്മാരും ഇന്നു പ്രതിസന്ധിയിലാണ്. തുല്യവിദ്യാഭ്യാസമുള്ള വധുവിനെ അന്വേഷിച്ചു കണ്ടെത്തുമ്പോള്‍, തന്റെ ജോലി മുടക്കി കുടുംബത്തിന്റെ ഉത്തരവാദിത്വം ഏറ്റെടുക്കാന്‍ അവള്‍ക്കും ധാരാളം നിബന്ധനകളുണ്ട്, അതില്‍ പലതും ആ പുരുഷനു സ്വീകാര്യമായിരിക്കില്ല. തന്മൂലം അവള്‍ക്കും ഒരു വരനെ കണ്ടെത്താനാവുന്നില്ല. അതേ, ഉന്നതവിദ്യാഭ്യാസമുള്ളവരും ആണ്‍പെണ്‍ വ്യത്യാസമില്ലാതെ ഇന്നു പുര നിറഞ്ഞുനില്‍ക്കുന്നു. 

വിവാഹമേ വേണ്ട എന്നു ചിന്തിച്ച്, തൊഴിലിലെ നേട്ടങ്ങളില്‍മാത്രം ശ്രദ്ധ കേന്ദ്രീകരിച്ചു ജീവിച്ച പലരും ഉന്നതനേട്ടങ്ങള്‍ കൈവരിച്ചശേഷം, അതൊന്നു പങ്കുവയ്ക്കാന്‍ ഒരു പങ്കാളിയില്ലല്ലോയെന്നു വളരെ വിഷമത്തോടെ പറഞ്ഞിട്ടുണ്ട്. സഹാനുഭൂതിയോടെ അതെല്ലാം കേള്‍ക്കാനിരുന്നുകൊടുത്തു ഇങ്ങനെ, ഒരു പങ്കാളിയെ കണ്ടെത്താനുള്ള സഹായം ചെയ്തുകൊടുക്കാന്‍ എനിക്കു സാധിച്ചത് വളരെ ചുരുക്കം പേര്‍ക്കുമാത്രം.

നമ്മുടെ കാഴ്ചപ്പാടുകള്‍ മാറ്റിയെങ്കില്‍മാത്രമേ ഈ പ്രതിസന്ധി മറികടക്കാന്‍ സാധിക്കൂ. 

കുടുംബം നടത്താന്‍ പുരുഷനും സാധിക്കുമെന്നു മാറിച്ചിന്തിച്ചാല്‍ ഈ പ്രതിസന്ധി മറികടക്കാനാവില്ലേ? 

നേട്ടങ്ങള്‍ തനിച്ചു നേടുന്നതിലും ആസ്വാദ്യകരം, അത് സ്വന്തം പങ്കാളിയോടൊപ്പം ചേര്‍ന്ന് നേടുന്നതല്ലേ? 

കിട്ടിയ പങ്കാളിയെ അത്തരം ഒരു പങ്കാളിയാക്കി പാകപ്പെടുത്തിയെടുക്കുന്നതല്ലേ ഏറ്റവും വലിയ നേട്ടം? 

മക്കള്‍ സ്വയംപര്യാപ്തരാകുന്നതുവരെ അവര്‍ക്കുവേണ്ടി ഓടിനടക്കാന്‍ തങ്ങള്‍ക്ക് ആരോഗ്യം ഉണ്ടായിരിക്കുന്ന പ്രായം കണക്കാക്കിവേണ്ടേ സ്വന്തം വിവാഹപ്രായം തീരുമാനിക്കാന്‍? 

എന്നൊക്കെ നമ്മുടെ കാഴ്ചപ്പാടുകളില്‍ മാറ്റം വരുത്തിയാല്‍ പല പ്രതിസന്ധികളും നേരിടാന്‍ എളുപ്പമാകും.

ഒരു ജീവിതപങ്കാളിയുടെ ആവശ്യകത പ്രകൃതിദത്തമാണ്. അത് അപ്പാടെ ഒഴിവാക്കിയുള്ള ഒരു ജീവിതം ബഹുഭൂരിപക്ഷം മനുഷ്യര്‍ക്കും അസാധ്യമാണ്. എല്ലാ ജീവികള്‍ക്കും പ്രകൃതി ധാരാളം സിദ്ധികള്‍ കൊടുത്തിട്ടുണ്ട്.  കൂട്ടത്തില്‍ ഇണയെ ആകര്‍ഷിക്കാനുള്ള കഴിവും അടങ്ങിയിരിക്കുന്നു. 

ഒരു മാന്‍കൂട്ടത്തില്‍ കാണാന്‍ നല്ല മിടുക്കനായ, യുവത്വത്തിലേക്കു കടക്കുന്ന മാന്‍കുട്ടിയുണ്ടായിരുന്നു. അവന്‍ ഒരു പെണ്‍മാനിന്റെ അടുത്തു ചെന്ന് ഓരോരോ പ്രേമചേഷ്ടകള്‍ കാട്ടി അവളോട് ഇഷ്ടം കൂടാന്‍ ശ്രമിച്ചു. പക്ഷേ, അവള്‍ അവനെ ആകെ ഒന്നു മണത്തുനോക്കിയിട്ട് വിരട്ടിയോടിച്ചു. അവനെ കസ്തൂരി മണക്കുന്നില്ലത്രേ.

ഇണയെ ആകര്‍ഷിക്കാന്‍വേണ്ട കസ്തൂരിഗന്ധം തനിക്കില്ലല്ലോ എന്നോര്‍ത്ത് അവന്‍ വിഷാദംകൊണ്ട് ഉത്സാഹം നഷ്ടപ്പെട്ട് അലഞ്ഞുതിരിഞ്ഞുനടക്കാന്‍ തുടങ്ങി. ഒടുവില്‍ അവന്‍ കാര്യം അവന്റെ മുത്തച്ഛനോടു പറഞ്ഞു.

മുത്തച്ഛനൊന്നു ചിരിച്ചു. ഇത്രേയുള്ളോ കാര്യം. കസ്തൂരി ഇരിക്കുന്ന സ്ഥലം എനിക്കറിയാം. എന്റെ കൂടെ വാ, ഞാന്‍ കാണിച്ചുതരാം. പക്ഷേ, നീതന്നെ അതു പുറത്തെടുക്കണം.

എന്തു വേണമെങ്കിലും ചെയ്യാമെന്നു പറഞ്ഞ് വന്‍ മുത്തല്ലന്റെകൂടെ കസ്തൂരി തേടി പുറപ്പെട്ടു. കാട്ടില്‍ ഒരു പാറക്കെട്ടിന്റെ അടുത്തുചെന്ന് അതിലൊരു പാറക്കല്ലു കാണിച്ച് മുത്തച്ഛന്‍ പറഞ്ഞു: മോനേ ഈ കല്ലിനടിയില്‍ കസ്തൂരിയിരിപ്പുണ്ട്. നീ കൊമ്പുകൊണ്ട് ഈ കല്ല് ഇളക്കിമറിച്ചിട്ടാല്‍ നിനക്ക് ആ കസ്തൂരി എടുക്കാം.

കേട്ടപാടേ മാന്‍പയ്യന്‍, പാറ മറിക്കാന്‍ ശ്രമം തുടങ്ങി. കൊമ്പു കുത്തി പാറ ഇളക്കാന്‍ നോക്കിയിട്ട് അത് അനങ്ങുന്നുപോലുമില്ല. അവന്‍ വിയര്‍ത്തു കുളിച്ചു. പെട്ടെന്നതാ കസ്തൂരിയുടെ ഗന്ധം അവിടെ പരന്നു.

ഇണയുടെ ഇഷ്ടം നേടിയെടുക്കണമെന്ന് ദൃഢനിശ്ചയത്തോടെ, അതിനുവേണ്ടി അത്യധ്വാനം ചെയ്ത് ശരീരം വിയര്‍ത്തപ്പോഴാണ് തന്റെ ശരീരത്തിന് ഈ ഗന്ധം ലഭിച്ചതെന്ന സത്യം ആ കസ്തൂരിമാന്‍ തിരിച്ചറിഞ്ഞു.

സ്വന്തം കഴിവുകള്‍ മെച്ചപ്പെടുത്തി ഉത്സാഹപൂര്‍വം സന്തോഷത്തോടെ നിസ്വാര്‍ഥമായി പെരുമാറുമ്പോഴാണ് മറ്റുള്ളവര്‍ക്കു നമ്മളോട് ആകര്‍ഷണം തോന്നുന്നത്. മറ്റുള്ളവരെ നമ്മള്‍ ബഹുമാനിക്കുന്നതായി അവര്‍ക്കു ബോധ്യപ്പെടുമ്പോഴാണ്, അവര്‍ക്കു നമ്മളോടും ബഹുമാനം ഉളവാകുന്നത്. 

ഭാര്യയോടു ബഹുമാനം വേണം, മാത്രമല്ല, അതു പ്രകടിപ്പിക്കുകയും വേണമെന്ന് മിക്ക പുരുഷന്മാര്‍ക്കും അറിഞ്ഞുകൂടാ. പങ്കാളിയെ സ്‌നേഹിക്കുകമാത്രമല്ല വിശ്വസിക്കുകയും ബഹുമാനിക്കുകയും ചെയ്യണം. അങ്ങോട്ടു കൊടുത്തെങ്കിലേ തിരികെയും ലഭിക്കുകയുള്ളു.

ഇതെല്ലാം മനസ്സില്‍വച്ചു പരിശ്രമിച്ചാല്‍ മറ്റുള്ളവരെ ആകര്‍ഷിക്കാനുള്ള കഴിവ് (കസ്തൂരിഗന്ധം) നിങ്ങള്‍ക്കും നേടിയെടുക്കാം. ആ കഴിവു നേടിയാല്‍പ്പിന്നെ സ്വന്തം ഇണയെ ആകര്‍ഷിക്കാനും ഒപ്പം ജീവിക്കാനും എളുപ്പമാകും. 

കിട്ടാതെ പോയതിനെക്കുറിച്ചുള്ള നഷ്ടബോധവും, ഇച്ഛാഭംഗവുംമൂലം സ്വന്തം കഴിവുകള്‍ മെച്ചപ്പെടുത്താനോ കിട്ടിയ അവസരങ്ങള്‍ പ്രയോജനപ്പെടുത്താനോ ശ്രമിക്കാതിരുന്ന അനവധി ചെറുപ്പക്കാരോട് അനേകം മണിക്കൂറുകളോളം ഫോണില്‍ സംസാരിച്ചതിന്റെ പശ്ചാത്തലത്തില്‍, ഇവര്‍ക്കുവേണ്ടി ഒരു പരിശീലനക്ലാസ്സ് ആരംഭിക്കുകയാണ്. പരിശീലനം കഴിഞ്ഞവരെ ഓരോ സപ്പോര്‍ട്ട് ഗ്രൂപ്പുകളായി തിരിച്ച് തുടര്‍പരിശീലനങ്ങള്‍വഴി വ്യക്തിത്വം ആകര്‍ഷണീയമാക്കാനും പരസ്പരസഹകരണംവഴി വ്യക്തിബന്ധങ്ങള്‍ മെച്ചപ്പെടുത്തി വിവാഹത്തിനു വഴിതെളിയാനും അവസരം സൃഷ്ടിക്കുകയാണു ലക്ഷ്യം.

എല്ലാ വ്യാഴാഴ്ചയും ഉച്ചയ്ക്ക് 3 മുതല്‍ 5 വരെ എറണാകുളത്ത് ബെത്‌ലെഹമിന്റെ ഓഫീസിലായിരിക്കും ക്ലാസ്സുകള്‍. 90746 44459 എന്ന നമ്പരില്‍ വിളിച്ചോ മെസേജ് അയച്ചോ മുന്‍കൂട്ടി ബുക്ക് ചെയ്തു പങ്കെടുക്കാം.