ടോണി ചിറ്റിലപ്പിള്ളി
മതസ്വാതന്ത്ര്യമെന്നാല്‍ ആരാധനാസ്വാതന്ത്ര്യത്തില്‍ മാത്രം പരിമിതപ്പെടുത്തേണ്ട ഒന്നല്ല. ഓരോ വ്യക്തിക്കും തന്റെ വിശ്വാസത്തിനു പരസ്യമായി സാക്ഷ്യം നല്‍കാനും അടിച്ചേല്പിക്കാതെതന്നെ അതു പ്രചരിപ്പിക്കാനുമുള്ള അവകാശമുണ്ട്. യഥാര്‍ഥ മാനവികതയ്ക്കും സമഗ്രമായ വളര്‍ച്ചയ്ക്കും മതസ്വാതന്ത്ര്യം ഏറെ പ്രധാനപ്പെട്ടതാണ്.
മതശാസനങ്ങളെ മുറുകെപ്പിടിക്കണമെന്നും പരമ്പരാഗത വിശ്വാസപ്രമാണങ്ങളില്‍ ഉറച്ചുനില്‍ക്കണമെന്നുമുള്ള പിടിവാശിയെയാണ് മൗലികവാദമെന്നു വിശേഷിപ്പിക്കുന്നത്. ഒരുകൂട്ടം അടിസ്ഥാനാശയങ്ങളോ സിദ്ധാന്തങ്ങളോ കര്‍ക്കശമായി പാലിക്കണമെന്ന നിലപാടിനെ ഇന്നു പൊതുവേ മൗലികവാദം എന്നു വിളിക്കാറുണ്ട്. ആധുനികവത്കരണത്തിനെതിരായ ഈ നിലപാട് ഇന്നു കേരളത്തില്‍ മിക്കയിടങ്ങളിലും ദൃശ്യമാണ്. ജീവിതത്തിന്റെ ആത്മീയോന്നമനത്തിനുപരി, വിദ്യാഭ്യാസത്തിലും ജനാധിപത്യപരിഷ്‌കാരങ്ങളിലും സാമ്പത്തികപുരോഗതിയിലും ഊന്നല്‍ നല്‍കുന്ന മതനിരപേക്ഷരാഷ്ട്രം എന്ന കാഴ്ചപ്പാടിനെ എതിര്‍ക്കുന്ന സമീപനം മൗലികവാദികള്‍ പൊതുവില്‍ സ്വീകരിക്കുന്നു.
മതമൗലികവാദം കേരളത്തില്‍ വേരുറപ്പിക്കുന്നുവോ?
കേരളത്തില്‍ മതമൗലികവാദം വളരുന്നുണ്ടെന്നുള്ളത് ഒരു യാഥാര്‍ഥ്യമാണ്. ഭരണഘടനയുടെയും മതസ്വാതന്ത്ര്യത്തിന്റെയും മറപിടിച്ച് നിസ്സാരകാര്യങ്ങള്‍ കുത്തിപ്പൊക്കി അക്രമം അഴിച്ചുവിടുന്നത് വര്‍ധിക്കുകയാണ്. നിയമവിരുദ്ധപ്രവര്‍ത്തനങ്ങളും നടക്കുന്നു. സര്‍ക്കാര്‍സംവിധാനങ്ങളിലും മാധ്യമങ്ങളിലും കടന്നുകയറാന്‍ മതമൗലികവാദികള്‍ക്കു വലിയ പദ്ധതികളുള്ളതായി കാണുന്നു.
കേരളത്തിലെയും കര്‍ണാടകത്തിലെയും ചില സംഭവങ്ങള്‍ പ്രത്യേകം പരാമര്‍ശിക്കപ്പെടേണ്ടതാണ്. മതമൗലികവാദം തലപൊക്കുന്നതിന്റെ ലക്ഷണങ്ങളെ കേന്ദ്ര-സംസഥാന സര്‍ക്കാരുകള്‍ ജാഗ്രതയോടെ കാണണം. മതമൗലികശക്തികള്‍ പൊതുസമൂഹത്തിലും മുഖ്യധാരാ പാര്‍ട്ടികളിലും നുഴഞ്ഞുകയറാന്‍ ശ്രമിക്കുന്നത് രാജ്യത്തിന് അപകടകരമാണ്. കേരളത്തില്‍ ശക്തമായ ചേരിതിരിവും ധ്രുവീകരണവും നടത്താന്‍ ശ്രമിക്കുന്ന ഇക്കൂട്ടര്‍തന്നെ എല്ലാ തിന്മകളും സമൂഹത്തില്‍ വാരിവിതറിയശേഷം അതിന്റെ ഉത്തരവാദിത്വത്തില്‍നിന്ന് ഒളിച്ചോടാന്‍ ശ്രമിക്കുന്നതു ഖേദകരമാണ്.
കേരളംപോലുള്ളൊരു സമൂഹത്തില്‍ ഇതു പല രീതിയിലുള്ള പ്രത്യാഘാതങ്ങള്‍ സൃഷ്ടിക്കുമെന്നു ഭയപ്പെടേണ്ടിയിരിക്കുന്നു. ബുദ്ധിയുടെയും യുക്തിയുടെയും ബോധത്തിന്റെതന്നെയും അതിരുകള്‍ ലംഘിക്കുന്ന ഈ പ്രവണതകളില്‍ കടുത്ത അപകടം മണക്കുന്നുണ്ട്. ആധുനിക സമൂഹനിര്‍മിതിയുടെ എല്ലാ തറക്കല്ലുകളും തൂണുകളും തകര്‍ത്തെറിയുകതന്നെ ചെയ്യും എന്നു ഭയപ്പെടേണ്ടിയിരിക്കുന്നു.
വേര്‍തിരിക്കലിന്റെയും ഭിന്നിപ്പിന്റെയും അധാര്‍മികതകളുടെയും വിത്തുകള്‍ പാകുകയാണ് മതമൗലികവാദികള്‍ ചെയ്യുന്നത്. മതമൗലികവാദത്തിന്റെ ഒരു ഇരുണ്ട ഗര്‍ത്തത്തിലാണ് കേരളം ചെന്നു പതിച്ചിരിക്കുന്നത്. മതമൗലികവാദപരമായ അന്ധവിശ്വാസങ്ങള്‍ മൂര്‍ച്ഛിച്ച് സാമാന്യബുദ്ധിക്കു നിരക്കാത്ത തലങ്ങളിലേക്ക് ആളുകള്‍ പോയിക്കൊണ്ടിരിക്കുന്നു എന്നാണ് ഇപ്പോള്‍ തിരിച്ചറിയുന്നത്.
മതമൗലികവാദത്തെ നേരിടുന്നതില്‍ കേരളം ഭരിച്ച സര്‍ക്കാരുകള്‍ പരാജയമോ?
മതമൗലികവാദം കേരളത്തില്‍ ചിലപ്പോള്‍ ഒരുതരം മനോരോഗമായി മുദ്രകുത്തപ്പെടുന്നുണ്ട്. ഈ ഭീകരമായ ആശയത്തെ നാട്ടിലെ മത - രാഷ്ട്രീയ സംഘടനകള്‍ ഒന്നുകില്‍ തിരിച്ചറിയുന്നില്ല, അല്ലെങ്കില്‍ അറിഞ്ഞിട്ടും അറിയില്ലെന്നു നടിക്കുന്നു. കേരളത്തിലെ അറിയപ്പെടുന്ന പല ആധുനിക സംഘടനകളും ബുദ്ധിജീവികളുമെല്ലാം ഇത്തരം പുതിയ പ്രവണതകളെ തള്ളിപ്പറഞ്ഞിട്ടുണ്ട് എന്നതു ശരിയാണ്. പക്ഷേ, ഇവര്‍ക്കൊന്നും ഒറ്റമനസ്സോടെ ഈ ഭീഷണികള്‍ക്കെതിരേ പ്രവര്‍ത്തിക്കാന്‍ കഴിയുന്നില്ല, അല്ലെങ്കില്‍ അതിനു ശ്രമിക്കുന്നില്ല.കേരളം മാറിമാറി ഭരിച്ച കമ്മ്യൂണിസ്റ്റ് - കോണ്‍ഗ്രസ് സര്‍ക്കാരുകള്‍ മതമൗലികവാദത്തിനെതിരേ ശരിയായ നിലപാടുകള്‍ കൈക്കൊണ്ടിരുന്നില്ല. മതമൗലികവാദത്തെ തിരിച്ചറിയുന്നതിലും ഭീകരതയെ നേരിടുന്നതിലും ഇരുപാര്‍ട്ടികളും പരാജയപ്പെട്ടു.
രാജ്യത്തിന്റെ മറ്റു ഭാഗങ്ങള്‍ വര്‍ഗീയസംഘര്‍ഷങ്ങള്‍ക്കും ഭീകരാക്രമണങ്ങള്‍ക്കും ഇടയ്ക്കിടെ സാക്ഷ്യം വഹിച്ചപ്പോള്‍ കേരളം ഒറ്റപ്പെട്ടിരുന്നു. എന്നാല്‍, കേരളത്തില്‍ ഇന്നു സ്ഥിതിഗതികള്‍ അത്ര ശുഭകരമല്ല. ചില ഉത്പന്നങ്ങളുടെ വന്‍വിപണി സൃഷ്ടിച്ച് അതിലൂടെ സാമ്പത്തികശേഷി വര്‍ദ്ധിപ്പിക്കാനും ഇതര സമൂഹങ്ങളെ തകര്‍ക്കാനും മതമൗലികവാദികള്‍ ശ്രമിക്കുന്നു. മതമൗലികവാദത്തിനു ലളിതമായ വ്യാഖ്യാനം നല്‍കുന്നത് അപകടകരമാണ്. സാഹോദര്യവും സമത്വവും ദുര്‍ബലപ്പെടുത്തുന്ന രാഷ്ട്രീയ പ്രത്യയശാസ്ത്രങ്ങളും മുതലാളിത്താശയങ്ങളും ഉയര്‍ത്തുന്ന വെല്ലുവിളികള്‍ മറികടന്ന് ഐക്യത്തോടെ മുന്നോട്ടു പോകാനുള്ള ശ്രമങ്ങള്‍ രാജ്യവും സംസ്ഥാനവും ഭരിക്കുന്ന സര്‍ക്കാരുകളുടേതാണ്.
രാഷ്ട്രീയപ്പാര്‍ട്ടികള്‍ നിലപാടു വ്യക്തമാക്കണം
കോണ്‍ഗ്രസ് അധികാരത്തിലിരിക്കുമ്പോഴും, സര്‍ക്കാരിന്റെ മൗനാനുവാദത്തോടെ ക്രൈസ്തവര്‍ വേട്ടയാടപ്പെട്ട സംഭവങ്ങളും നിരവധിയുണ്ട്. കോണ്‍ഗ്രസ് മുഖ്യമന്ത്രി ഹേമാനന്ദ ബിസ്വാള്‍ അധികാരത്തിലിരിക്കുമ്പോഴാണ് ഇന്ത്യ കണ്ട ഏറ്റവും ദാരുണമായ ക്രിസ്ത്യന്‍വിരുദ്ധകലാപമായ കാണ്ഡമാല്‍ കലാപം ഒഡീഷയില്‍ അരങ്ങേറുന്നത്. അക്രമാസക്തമായ മൗലികവാദം ക്രൈസ്തവരുടെയും ഇതര ന്യൂനപക്ഷങ്ങളുടെയും ന്യായമായ സാന്നിധ്യം നമ്മുടെ രാജ്യത്തു നിഷേധിക്കുന്ന അവസ്ഥയുണ്ട്.
പൊതു - മതേതര സ്ഥാപനങ്ങളിലേക്ക് മതമൗലികവാദം കൊണ്ടുവരാനുള്ള ആസൂത്രിതനീക്കങ്ങള്‍ നമ്മുടെ രാജ്യത്തു നടക്കുന്നതു നല്ലതല്ല. ഭാരതറിപ്പബ്ലിക്കിന്റെ പരമാധികാരത്തിലും നിയമവാഴ്ചയിലും ദേശസ്‌നേഹത്തിലും വിശ്വസിക്കുന്ന എല്ലാവരും ഇത്തരം ആശയങ്ങളെയും പ്രവര്‍ത്തനങ്ങളെയും എതിര്‍ക്കണം. മൂല്യങ്ങളുടെയും മനുഷ്യത്വത്തിന്റെയും നന്മകളുടെ വ്യാപനത്തിലേക്കും ബഹുസ്വരതയുടെയും സഹിഷ്ണുതയുടെയും ഉയരങ്ങളിലേക്കും മനുഷ്യരാശിയെ നയിക്കുന്ന മതനവീകരണമാണ് ഈ കാലഘട്ടം ആവശ്യപ്പെടുന്നത്.
ഭാരതത്തില്‍ സംഘടിതശക്തിയും അവബോധവും കൊണ്ട് മതമൗലികവാദത്തെ രാഷ്ട്രീയപ്പാര്‍ട്ടികള്‍ പരസ്യനിലപാടിലൂടെ ചെറുക്കേണ്ടത് അനിവാര്യമാണ്. മതമൗലികവാദത്തിനെതിരേ ബിജെപിയും കോണ്‍ഗ്രസും കമ്മ്യൂണിസ്റ്റുകാരും അടക്കമുള്ള മുഖ്യധാരാ പാര്‍ട്ടികള്‍ തങ്ങളുടെ നിലപാടുകള്‍ വ്യക്തമാക്കണം.
മതമൗലികവാദം എല്ലാ മതവിശ്വാസങ്ങളെയും ദുഷിപ്പിക്കുമെന്ന വസ്തുത തിരിച്ചറിയേണ്ട കാലമാണിത്. എന്നാല്‍, അടിസ്ഥാനപരവും പ്രാഥമികാവകാശവുമായ മതസ്വാതന്ത്ര്യം എല്ലായിടത്തും പ്രോത്സാഹിപ്പിക്കപ്പെടണം. മതസ്വാതന്ത്ര്യമെന്നാല്‍ ആരാധനാ സ്വാതന്ത്ര്യത്തില്‍ മാത്രം പരിമിതപ്പെടുത്തേണ്ട ഒന്നല്ല. ഓരോ വ്യക്തിക്കും തന്റെ വിശ്വാസത്തിനു പരസ്യമായി സാക്ഷ്യം നല്‍കാനും അടിച്ചേല്പിക്കാതെതന്നെ അതു പ്രചരിപ്പിക്കാനുമുള്ള അവകാശമുണ്ട്. യഥാര്‍ഥ മാനവികതയ്ക്കും സമഗ്രമായ വളര്‍ച്ചയ്ക്കും മതസ്വാതന്ത്ര്യം ഏറെ പ്രധാനപ്പെട്ടതാണ്.
മതമൗലികവാദം എങ്ങനെയാണ് ഭീകരവാദത്തേക്കാള്‍ മെച്ചപ്പെട്ടതാവുക? എല്ലാ തിന്മകളും അന്യമതക്കാരില്‍നിന്നും മനുഷ്യസംസ്‌കാരത്തിന്റെ വികാസത്തില്‍നിന്നും മനുഷ്യന്‍ കൈവരിച്ച നേട്ടങ്ങളില്‍നിന്നും ഉടലെടുത്തതാണ് എന്നു വിശ്വസിക്കുന്നവര്‍ ഏതെങ്കിലും ഇരുണ്ട ഭൂഖണ്ഡത്തിലെ ആദിമനുഷ്യരല്ല. കേരളത്തില്‍ സാമാന്യവിദ്യാഭ്യാസം നേടിയ ചിലരെക്കൊണ്ടെങ്കിലും ഇങ്ങനെ വിശ്വസിപ്പിക്കുവാന്‍ മതമൗലികവാദത്തിനു കഴിയുന്നു എന്നതില്‍ വലിയ അപായസൂചനകള്‍ അടങ്ങിയിട്ടുണ്ട്.
ക്രൈസ്തവവിദ്വേഷം വളര്‍ത്തുന്നതില്‍ കേരളത്തിലെ രാഷ്ട്രീയാന്തരീക്ഷത്തിനു മുഖ്യപങ്കുണ്ട്. അസത്യങ്ങള്‍ ആവര്‍ത്തിച്ചാവര്‍ത്തിച്ച് ക്രൈസ്തവര്‍ക്കെതിരായ നിലപാട് സൃഷ്ടിച്ചവരില്‍ ഭൂരിപക്ഷ - ന്യൂനപക്ഷ വര്‍ഗീയപാര്‍ട്ടികളും അവയോടു ബന്ധപ്പെട്ട പ്രസ്ഥാനങ്ങളുമുണ്ട്. സമുദായപരമായും രാഷ്ട്രീയപരമായും ക്രൈസ്തവര്‍ സംഘടിക്കപ്പെടുമ്പോള്‍ അസഹിഷ്ണുതയും അസ്വസ്ഥതയും പ്രകടിപ്പിക്കുന്നവരാണ് സാധ്യമായ എല്ലാ മാര്‍ഗങ്ങളും ഉപയോഗിച്ച് ക്രൈസ്തവവിരുദ്ധത വളര്‍ത്താന്‍ ശ്രമിക്കുന്നവരില്‍ പലരും എന്നതു വ്യക്തമാണ്.
ഈയടുത്തകാലത്തായി വ്യാപകമായി തെറ്റിദ്ധരിക്കപ്പെടുകയും അപഹസിക്കപ്പെടുകയും അവഹേളിക്കപ്പെടുകയും ചെയ്യുന്ന ഒരു വിഭാഗമായി ഇവിടുത്തെ ക്രൈസ്തവര്‍ മാറ്റപ്പെട്ടിരിക്കുന്നു. ക്രൈസ്തവരുടെ വിശ്വാസവും ജീവിതരീതികളും എന്തിനേറെ അവരുടെ സേവനങ്ങള്‍പോലും അവഹേളിക്കപ്പെടുന്നു. പുല്‍ക്കൂടു നശിപ്പിച്ചും ബൈബിള്‍ കത്തിച്ചും ക്രൈസ്തവവിരുദ്ധത സൃഷ്ടിക്കാന്‍ ബോധപൂര്‍വമായ ശ്രമങ്ങള്‍ കേരളത്തില്‍ നടക്കുന്നു. ഇത് മതമൗലികവാദത്തിന്റെ ആധുനിക പതിപ്പുകളാണ്.
കേരളത്തില്‍ കക്കുകളി എന്ന നാടകത്തിലൂടെ ക്രൈസ്തവ ജീവിതവിശ്വാസരീതികളെ സത്യവിരുദ്ധമായി അവതരിപ്പിച്ച് അപഹാസ്യമായി ചിത്രീകരിക്കാന്‍ ചിലര്‍ ആവേശം കാണിക്കുന്നത് കലാപരമായ ആവിഷ്‌കാരസ്വാതന്ത്ര്യമെന്നു കരുതി അവഗണിക്കാനാവില്ല. മറിച്ച്, ക്രൈസ്തവരെക്കുറിച്ച് പൊതുസമൂഹത്തെ തെറ്റിദ്ധരിപ്പിക്കാന്‍ വ്യക്തമായ അജണ്ടയോടെ പ്രവര്‍ത്തിക്കുന്ന വര്‍ഗീയ അധാര്‍മികശക്തികളുടെ ഗൂഢാലോചന തിരിച്ചറിഞ്ഞ് പ്രതിരോധിക്കാന്‍ കേന്ദ്ര സംസ്ഥാന സര്‍ക്കാരുകള്‍ക്ക് നിതാന്തജാഗ്രത ആവശ്യമായിരിക്കുന്നു.
