പ്രഫ. തോമസ് കണയംപ്ലാവൻഭാരതസംസ്കാരത്തിന് ദീപ്തസൗന്ദര്യപൂരം
പാരിതില്‍ത്തെളിയിച്ച ടാഗോറിന്‍പ്രതിഭയെ
ഓര്‍ത്തു ഞാന്‍ രോമാഞ്ചത്തിന്‍ കഞ്ചുകം ധരിക്കുന്നു,,
പേര്‍ത്തുമെന്‍ മന,മഭിമാനത്താല്‍ തുടിക്കുന്നു!
വംഗദേശത്തിന്‍ സര്‍ഗ്ഗദീപമേ, നിന്‍ ഭാവന
തുംഗമാം ഹിമാചലശൃംഗത്തേക്കാളുന്നതം!
കാളിദാസനെപ്പോലെ നീയുമീ നാടിന്‍ സ്‌നേഹ-
ദോളയിലെന്നേരവു,മാടിക്കൊണ്ടിരിക്കുന്നു!
സമ്പന്നകുടുംബത്തില്‍പ്പിറന്നു നീയെങ്കിലും
അന്‍പിനാല്‍ പാവങ്ങള്‍ക്കു തോഴനായ് ഭവിച്ചല്ലോ!
പാവങ്ങള്‍ തന്‍ ജീവിതം സ്പന്ദിക്കും കഥകളു-
മായിരക്കണക്കായ് നീ രചിച്ച ഗാനങ്ങളും
ഇംഗ്ലീഷില്‍, ബംഗാളിയില്‍, ഹൃദയം കവരുന്നു;
നന്നു, നന്നനവദ്യസുന്ദര,മനശ്വരം.
നീ വിശ്വകവിയായി ലോകത്തെ മുഴുവന്‍ നിന്‍
ഭാവനാപതംഗത്തിന്‍ തൂവലാല്‍ തലോടുന്നു!
ആസ്തിക്യബോധത്തിന്റെ വിജയക്കൊടിയല്ലോ
കീര്‍ത്തനീയമാം 'ഗീതാഞ്ജലി'യായ് ശോഭിക്കുന്നു.
'നൊബേല്‍' സമ്മാനം നല്‍കിയതിനെ ലോകത്തിന്റെ
നടുവില്‍ പ്രതിഷ്ഠിച്ചു സാരത്തെയറിയുവോര്‍.
ദേശീയഗാനം നിന്റെ രാജ്യസ്‌നേഹത്തിന്‍ സ്വരം;
'വിശ്വഭാരതി' വിശ്വപൗരന്റെ കലാശാല!
'ശാന്തിതന്‍ നികേതനം' നിസ്തുലസമാധാന-
പ്രാവുകള്‍ കുറുകുന്ന കൂടുമെന്നറിയുന്നേന്‍.
സ്വാതന്ത്ര്യസമരത്തില്‍ നിന്റെ നാട്ടുകാര്‍ക്കൊപ്പം
ചേരുവാന്‍ 'സര്‍സ്ഥാനം' നീ മടക്കിക്കൊടുത്തില്ലേ?
ബംഗാളിന്‍ നവോത്ഥാന നായകന്മാരോടൊപ്പം
വംഗദേശത്തിന്‍ പുരോഗതിക്കായ് ശ്രമിച്ചു നീ.
നിന്റെ കീര്‍ത്തിധാവള്യം ലോകത്തിലെല്ലാടവും
വെണ്ണിലാവലകള്‍പോല്‍ നിത്യവും പരക്കുന്നു!
ജയിക്ക മഹാകവേ, ജയിക്ക മഹാത്മാവേ,
ജയിക്ക സത്യസ്‌നേഹസൗന്ദര്യവിധാതാവേ!
