ഹോട്ടലുകളിലും പൊതുസ്ഥലത്തും വില്‍ക്കപ്പെടുന്ന ഭക്ഷണപദാര്‍ത്ഥങ്ങള്‍ക്കുമേല്‍ യാതൊരു ''ക്വാളിറ്റി കണ്‍ട്രോള്‍'' നിബന്ധനകളും ചുമത്താത്ത ഒരു ഭരണകൂടം ഇന്ത്യയിലല്ലാതെ മറ്റെവിടെയുണ്ട്?  രോഗങ്ങള്‍ പകര്‍ച്ചവ്യാധികള്‍പോലെ  വന്നിട്ട് മരണഭീതിയോടെ നെട്ടോട്ടമോടുന്നതിനു പകരം  അതിനെ പ്രതിരോധിക്കുന്ന ക്രിയാത്മകമാര്‍ഗങ്ങളാരായാന്‍ ശ്രദ്ധ ചെലുത്തുന്ന എന്തു സംവിധാനമുണ്ടിവിടെ?

ആഹാരത്തിന്റെ പോഷണശാസ്ത്രത്തില്‍ ശ്രദ്ധ കൊടുക്കാതിരിക്കുമ്പോള്‍ രോഗങ്ങള്‍ ഉണ്ടാകുന്നു എന്ന തിരിച്ചറിവ് പ്രാചീനകാലംമുതലേ പ്രബലമായിരുന്നു. അതുകൊണ്ട് ആഹാരപാനീയങ്ങള്‍ പഥ്യവും ശുദ്ധവും കറകലരാത്തതുമാവണമെന്നതാണു തത്ത്വം. ആയുര്‍വേദത്തിലെ ''അന്നസ്വരൂപവിജ്ഞാന''
ത്തില്‍ ആഹാരപദാര്‍ത്ഥങ്ങളുടെ ഗുണമേന്മകളെയും  ദോഷഫലങ്ങളെയുംപറ്റി ആധികാരികമായ  വിവരങ്ങള്‍ നല്‍കുന്നുണ്ട്. പഥ്യമായ ആഹാരവിഭവങ്ങളായാലും  അവ അശാസ്ത്രീയമായി കൂടിച്ചേരുമ്പോള്‍ അപഥ്യവും ശരീരത്തിലെ ഊര്‍ജനിര്‍മാണപ്രക്രിയയ്ക്കു ഹാനികരവുമായിത്തീരുന്നു. അപ്പോള്‍ വിരുദ്ധാഹാരങ്ങള്‍ ഏതൊക്കെയെന്നറിയണം. പാശ്ചാത്യശൈലി അവലംബിച്ചുള്ള 'ഫാസ്റ്റ് ഫുഡും' ശീതളപാനീയങ്ങളും പലപ്പോഴും പരസ്പരം കൂട്ടിക്കലര്‍ത്താന്‍ പാടില്ലാത്ത ഭക്ഷണഘടകങ്ങളുടെ ചേരുവകളാണ്.
ഒരുകാലത്ത് പൂര്‍ണാരോഗ്യത്തിന്റെ ശുദ്ധസ്രോതസ്സായിരുന്ന നമ്മുടെ കേരളീയ പാരമ്പര്യഭക്ഷണം ഇന്നെവിടെപ്പോയി? അന്ന് ലോകത്തിന്റെ ആരോഗ്യശ്രേണിയില്‍ത്തന്നെ
സ്ഥാനം പിടിച്ചിരുന്നു ഈ കൊച്ചുകേരളത്തിന്റെ ആഹാരശൈലി. കേരളത്തിന്റെതായ സാമ്പാറും അവിയലും തീയലും തോരനും പുഴുക്കും പുട്ടും ദോശയും ഇഡ്ഡലിയുമൊക്കെ പോഷകസമ്പുഷ്ടങ്ങളായ വിഭവങ്ങളായിരുന്നു. സ്വന്തം പറമ്പിലോ പാടത്തോ കൃഷി ചെയ്ത് വിഷം തളിക്കാതെ പറിച്ചെടുക്കുന്ന കായ്കനികള്‍ കേരളത്തെ രോഗാതുരതകളില്‍നിന്നു പരിരക്ഷിച്ചു. എന്നാല്‍, ഇന്നു കേരളത്തിന്റെ സ്ഥിതി മാറിക്കഴിഞ്ഞു. ജീവിക്കാന്‍ പോയിട്ട്
കൃത്യമായി ഭക്ഷണം കഴിക്കാന്‍പോലും സമയം നഷ്ടപ്പെട്ട മലയാളി, വിശപ്പു ശമിപ്പിക്കാന്‍
കുറുക്കുവഴികള്‍ തേടിയലയുകയാണ്. അങ്ങനെ സ്വന്തം ശരീരഘടനസവിശേഷതകള്‍ക്ക് ഇണങ്ങാത്ത വിദേശഭക്ഷണശൈലികളെ അന്ധമായി സ്വീകരിക്കുന്നു. അതവന്റെ പചനയന്ത്രത്തെ തകിടം മറിച്ചു.  ഇടംവലം നോക്കാത്ത ഈ നെട്ടോട്ടത്തില്‍ ഒരു നീരാളിയെപ്പോലെ ജീവിതശൈലീരോഗങ്ങള്‍ വാരിപ്പുണര്‍ന്നു.
ഇന്നത്തെ മലയാളി, രക്ഷപ്പെടാനാവാത്തവിധം ഈ അശാസ്ത്രീയ ജീവിത-ഭക്ഷണശൈലികള്‍ക്കടിപ്പെട്ടു. ഈ അടിമത്തമാകട്ടെ അവനെ ഏറെ സങ്കീര്‍ണമായ ജീവിതശൈലീരോഗങ്ങളില്‍ കൊണ്ടെത്തിച്ചു.
പല രോഗങ്ങളുടെയും പട്ടികയില്‍ ആഗോളതലസ്ഥാനമെന്ന ഓമനപ്പേര് കേരളത്തിനു സ്വന്തം. ലോകശരാശരിയെടുത്താല്‍ ഏറ്റവും കൂടുതല്‍ പ്രമേഹബാധിതര്‍, ഹൃദ്രോഗികള്‍, മദ്യപര്‍, മാംസഭോജികള്‍ തുടങ്ങിയവരുള്ള സംസ്ഥാനം എന്ന കുപ്രസിദ്ധി ലോകാരോഗ്യസംഘടനയുടെ പ്രസ്താവനകളില്‍പ്പോലും പ്രകടമായി.
പണ്ടു വയോധികരെ മാത്രം വേട്ടയാടിയിരുന്ന ഹൃദ്രോഗം ഇന്ന് കേരളത്തിലെ ചെറുപ്പക്കാരിലേക്കു ഭീഷണമാംവിധം പടരുന്നു. കഴിഞ്ഞ മുപ്പതു വര്‍ഷങ്ങളിലെ സ്ഥിതിവിവരക്കണക്കുകള്‍ പരിശോധിച്ചാല്‍ ഹൃദ്രോഗം ഇന്ത്യയില്‍  വര്‍ദ്ധിച്ചത് ഏതാണ്ട് 300 ശതമാനമാണ്. ലോകത്തെ ഹൃദ്രോഗികളില്‍ 60 ശതമാനം ഇന്ത്യക്കാരോ ഇന്ത്യന്‍ വംശജരോ ആയിരിക്കുമെന്ന മുന്നറിയിപ്പും വന്നുകഴിഞ്ഞു. വളരെ ചെറിയ പ്രായത്തില്‍പ്പോലും  മലയാളിക്കു ഹാര്‍ട്ടറ്റാക്കുണ്ടാകുന്നു. 1995 നും 2025 നും ഇടയ്ക്കുള്ള  കാലഘട്ടത്തില്‍ പ്രമേഹബാധിതരുടെ എണ്ണത്തിലുള്ള വര്‍ദ്ധന 170 ശതമാനമായിരിക്കുമെന്ന്  ലോകാരോഗ്യസംഘടനയുടെ  കണക്കുകള്‍ പ്രവചിച്ചുകഴിഞ്ഞു. 1995 ല്‍ 84 ദശലക്ഷമായിരുന്ന പ്രമേഹബാധിതര്‍ 2025 ആകുമ്പോഴേക്ക് 22.8 കോടിയായി മാറും. ഇതില്‍ 76 ശതമാനവും വികസ്വരരാജ്യങ്ങളില്‍ത്തന്നെ. ഇന്ത്യയില്‍ പ്രമേഹരോഗികള്‍ 1995 നും 2025 നുമിടയ്ക്ക് 195 ശതമാനമായി വര്‍ദ്ധിക്കും.
നമ്മുടെ കൊച്ചുകേരളത്തിലും പ്രമേഹമില്ലാത്തവരുണ്ടോയെന്ന ചോദ്യവും അസ്ഥാനത്തായി വരുന്നു. കേരളത്തില്‍ അമിതരക്തസമ്മര്‍ദമുള്ളവരുടെ സംഖ്യ 30-40 ശതമാനംവരെയുണ്ടെന്ന് ഈയടുത്തകാലത്ത് കാര്‍ഡിയോളജിക്കല്‍ സൊസൈറ്റി ഓഫ് ഇന്ത്യ നടത്തിയ സര്‍വെയില്‍ സ്ഥിരീകരിക്കപ്പെട്ടു. ഇന്ത്യയിലാകമാനമുള്ള രക്തസമ്മര്‍ദരോഗികളുടെ ശരാശരി സംഖ്യ 30 ശതമാനമാണ്. ഇതില്‍ 60 ശതമാനം പേര്‍ക്കും തങ്ങള്‍ രോഗികളാണെന്ന അവബോധമില്ല.
കേരളം ഇന്ത്യയിലെ 'കൊളസ്‌ട്രോള്‍ തലസ്ഥാന'മായി മാറിക്കഴിഞ്ഞെന്ന് 2013 ല്‍ കൊച്ചിയില്‍ നടന്ന ഒരു പഠനം തെളിയിക്കുന്നു. 40,000 മലയാളികള്‍ പഠനവിധേയമായപ്പോള്‍ അതില്‍ 19,940 പേരിലും (49.85 ശതമാനം) അമിതകൊളസ്‌ട്രോള്‍ കണ്ടു. പൊതുവായ കൊളസ്‌ട്രോളിന്റെ അപകടരേഖയായ 200 മില്ലിഗ്രാം ശതമാനത്തില്‍ കൂടുതലുള്ളവരാണ് 49.85 ശതമാനം മലയാളികളും. കുറഞ്ഞ കൊളസ്‌ട്രോള്‍ അളവിന്റെ അടിസ്ഥാനത്തില്‍ സുരക്ഷിതരായ മലയാളികള്‍ 14.45 ശതമാനം പേര്‍ മാത്രം. 30 വയസ്സു കഴിഞ്ഞ പകുതി മലയാളികളും കൊളസ്‌ട്രോള്‍ രോഗികളായി മാറുന്നുവെന്ന യാഥാര്‍ത്ഥ്യം ആരോഗ്യകേരളത്തെ എങ്ങോട്ടു നയിക്കും? ഒരു ദിവസം 5000 ടണ്‍ മാംസം കഴിച്ചുതീര്‍ക്കുന്ന മലയാളികള്‍ ഇറച്ചിക്കൊതിയുടെ കാര്യത്തില്‍ ഇന്ത്യയിലെ ഇതരസംസ്ഥാനങ്ങളുടെ മുമ്പില്‍ മാത്രമല്ല, ലോകശരാശരിയുടെ മുന്‍പന്തിയിലും സ്ഥാനംപിടിക്കുന്നു.
അമേരിക്കന്‍ ഹാര്‍ട്ട് അസോസിയേഷന്‍, ഗുരുതരമായി പടര്‍ന്നേറുന്ന ഒരു രോഗാതുരതയായി മുദ്ര കുത്തിയ പൊണ്ണത്തടിയുടെ കാര്യത്തിലും കേരളീയര്‍ അതിവേഗം മുന്നോട്ടു കുതിച്ചുകൊണ്ടിരിക്കുന്നു. ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച്  കൊച്ചിയിലും പരിസരപ്രദേശങ്ങളിലുമുള്ള സ്‌കൂള്‍കുട്ടികളില്‍ നടത്തിയ ഒരു പഠനത്തില്‍ അമിതവണ്ണമുള്ളവരുടെ സംഖ്യ ശീഘ്രഗതിയില്‍ വര്‍ദ്ധിക്കുന്നതായി കണ്ടെത്തി. ജീവിതചര്യയിലും ഭക്ഷണശൈലിയിലും വ്യായാമനിലവാരത്തിലുമുള്ള വികലമായ മാറ്റങ്ങള്‍ ഇതിനു കാരണമായി കണക്കാക്കപ്പെടുന്നു. ആകെയുള്ള ചികിത്സാച്ചെലവിന്റെ പത്തു ശതമാനത്തിലധികം അമിതവണ്ണത്തോടനുബന്ധിച്ച രോഗാസ്വസ്ഥതകള്‍ക്കായിട്ടുള്ളതാണെന്ന വസ്തുത ആരോഗ്യപ്രവര്‍ത്തകരെ ഭീതിയുടെ മുള്‍മുനയില്‍ നിര്‍ത്തുന്നു. വണ്ണം കുറയ്ക്കാനുള്ള ബാറിയാട്രിക് സര്‍ജറികളുടെ എണ്ണം കേരളത്തില്‍ കൂടുകയാണ്. രണ്ടു വര്‍ഷംമുമ്പ്  30 ശസ്ത്രക്രിയകള്‍ നടത്തിയിരുന്ന സ്ഥാപനത്തില്‍ ഇപ്പോള്‍ അത് 60 ആയി ഉയര്‍ന്നു. രണ്ടുമുതല്‍ അഞ്ചുവരെ ലക്ഷം രൂപ ചെലവു വരുന്ന ശസ്ത്രക്രിയയാണിതെന്നോര്‍ക്കണം. ചെറുപ്പക്കാരിലേക്കും കുട്ടികളിലേക്കുംവരെ വണ്ണം കുറയ്ക്കുന്ന ഈ സര്‍ജറി വ്യാപിച്ചുകൊണ്ടിരിക്കുന്നു.
എന്തുകൊണ്ടാണ് കേരളീയര്‍ മഹാരോഗികളും മാറാരോഗികളുമായിത്തീരുന്നത് എന്ന ചോദ്യത്തിന് ഒരുത്തരമേയുള്ളൂ.  ജീവിത-ഭക്ഷണശൈലികളില്‍  സംഭവിച്ച പ്രതികൂലമായ മാറ്റങ്ങള്‍തന്നെ. മലയാളികളുടെ പരമ്പരാഗത ജീവിതശൈലിയിലെ ഗുണമേന്മകളെ സൗകര്യപൂര്‍വം ഉപേക്ഷിച്ച് അനാരോഗ്യകരമായ 'ന്യൂജെന്‍' ശീലങ്ങള്‍ സ്വീകരിച്ചപ്പോള്‍ ആരോഗ്യപരിപാലനത്തിന്റെ സന്തുലിതാവസ്ഥ താളം തെറ്റുകതന്നെ ചെയ്തു.
അര്‍ബുദബാധ വിഷലിപ്തമായ ഭക്ഷണപദാര്‍ത്ഥങ്ങള്‍ കഴിക്കുന്നതിന്റെ പരിണതഫലമാണെന്ന് അടുത്തകാലത്തു നടന്ന പല നിരീക്ഷണങ്ങളും തെൡിച്ചു. പച്ചക്കറികളിലും പഴവര്‍ഗങ്ങളിലും  തളിക്കുന്ന കീടനാശിനികള്‍, മാംസത്തില്‍ കുത്തിവയ്ക്കുന്ന മരുന്നും ഹോര്‍മോണുകളും, മത്സ്യം കേടാകാതിരിക്കാന്‍ ചേര്‍ക്കുന്ന അമോണിയ ഇവയൊന്നുമില്ലാതെ മലയാളികള്‍ക്കു ശുദ്ധമായ മറ്റെന്തു ഭക്ഷണം ലഭിക്കുമിന്ന്? അത്യാഹിതങ്ങളോ അപകടങ്ങളോ സംഭവിക്കുമ്പോള്‍ മാത്രം കഷ്ടിച്ച് എത്തിനോക്കുന്ന ഭരണാധികാരികള്‍! ഹോട്ടലുകളിലും പൊതുസ്ഥലത്തും വില്‍ക്കപ്പെടുന്ന ഭക്ഷണപദാര്‍ത്ഥങ്ങള്‍ക്കുമേല്‍ യാതൊരു 'ക്വാളിറ്റി കണ്‍ട്രോള്‍' നിബന്ധനകളും ചുമത്താത്ത ഒരു ഭരണകൂടം ഇന്ത്യയിലല്ലാതെ മറ്റെവിടെയുണ്ട്?  രോഗങ്ങള്‍ പകര്‍ച്ചവ്യാധികള്‍പോലെ വന്നിട്ട് മരണഭീതിയോടെ നെട്ടോട്ടമോടുന്നതിനു പകരം  അതിനെ പ്രതിരോധിക്കുന്ന ക്രിയാത്മകമാര്‍ഗങ്ങളാരായാന്‍ ശ്രദ്ധ ചെലുത്തുന്ന എന്തു സംവിധാനമുണ്ടിവിടെ? ഹൃദ്രോഗം 85 ശതമാനംവരെ പ്രതിരോധിക്കാനുള്ള മാര്‍ഗങ്ങള്‍ ഗവേഷണനിരീക്ഷണങ്ങളിലൂടെ കണ്ടുപിടിക്കപ്പെട്ടിട്ടുണ്ടെന്നു പറഞ്ഞാല്‍ അതെന്തൊക്കെയാണെന്നു ചോദിച്ചുവരുന്നവര്‍ എത്ര പേരുണ്ട്?  സംശയിക്കേണ്ട, ആരോഗ്യകേരളത്തിന്റെ പ്രയാണം അപകടങ്ങളിലേക്കുതന്നെ. ഇതിനു നാം വലിയ വില കൊടുക്കേണ്ടി വരും!
നരവംശശാസ്ത്രജ്ഞരുടെ കണ്ടുപിടിത്തങ്ങളുടെ വെളിച്ചത്തില്‍ മനുഷ്യന്‍ അടിസ്ഥാനപരമായി  സസ്യഭുക്കാണെന്നും, എന്നാല്‍, സാഹചര്യങ്ങളുടെ സമ്മര്‍ദ്ദത്താല്‍ മാംസവും ഭക്ഷിക്കാന്‍ നിര്‍ബന്ധിതനായെന്നും തെളിവുകള്‍ സ്ഥിരീകരിക്കുന്നു.  ഉഷ്ണപ്രദേശങ്ങളിലുള്ളവര്‍ സസ്യാഹാരം കൂടുതലായി കഴിച്ചപ്പോള്‍ തണുപ്പുള്ള പ്രദേശങ്ങളിലുള്ളവര്‍ കടുത്ത ശീതകാലത്തെ അതിജീവിക്കാനുള്ള  പരിചയായി കൂടുതല്‍ കൊഴുപ്പടങ്ങിയ മാംസാഹാരത്തില്‍ അഭയം തേടി. ഭക്ഷണം വിശപ്പകറ്റാന്‍ മാത്രമല്ല, ആസ്വദിക്കാനുംകൂടിയുള്ളതാണെന്ന തിരിച്ചറിവിലൂടെ മനുഷ്യന്‍ ഭക്ഷണശാസ്ത്രത്തിനു പുതിയ നിര്‍വചനങ്ങള്‍ നല്‍കി. അങ്ങനെയാണ് നാവില്‍ രസമൂറുന്ന ആധുനികപാചകകലകള്‍ ജന്മംകൊണ്ടത്.
അപ്പോള്‍ പ്രകൃതിതത്ത്വങ്ങള്‍ക്കു വിപരീതമായി പോഷണശാസ്ത്രത്തെ മാറ്റിമറിച്ച മനുഷ്യനു കാലാന്തരത്തില്‍ രോഗപീഡകള്‍ ഒന്നൊന്നായി വന്നുപെടുമെന്നു പറയുന്നതായിരിക്കും ശരി. വിശപ്പു മാറ്റാന്‍ മാത്രമല്ല, ആസ്വദിക്കാന്‍കൂടിയുള്ളതാണു ഭക്ഷണം എന്ന ചിന്ത ആധുനികമനുഷ്യനെ രോഗാതുരതയിലേക്കു വലിച്ചിഴച്ചു. വിചിത്രമായ ഭക്ഷണവിഭവങ്ങള്‍ക്കു പിറകേ  അവന്‍ വെറിപൂണ്ട് ഓടിത്തുടങ്ങി. വാഗ്ഭടന്റെ  അഷ്ടാംഗഹൃദയത്തില്‍ പറയുന്നതു കേള്‍ക്കുക: 'സര്‍വേഷാമേവ രോഗാണാം നിദാനം കുപിതാ മലാ:, തല്‍പ്രകോപസ്യതു പ്രോക്തം വിവിധാഹിത സേവനം' - എല്ലാ രോഗങ്ങള്‍ക്കും കാരണം കുപിതങ്ങളായ ദോഷങ്ങളാണ്. അവയുടെ കോപത്തിനുള്ള കാരണമാകട്ടെ അഹിതങ്ങളായ ആഹാരവിഹാരങ്ങളും.
മനുഷ്യശരീരവ്യവസ്ഥയെ താങ്ങിനിര്‍ത്തി, അതിനു സന്തുലിതവും സുദൃഢവുമായ ആരോഗ്യം പ്രദാനം ചെയ്യുന്ന നാലു സ്തംഭങ്ങളായി ആയുര്‍വേദാചാര്യന്മാര്‍ വിശേഷിപ്പിക്കുന്നത് ഭക്ഷണം, ഉറക്കം, വ്യായാമം, മിതമായ ലൈംഗികത എന്നിവയാണ്. ഇവയുടെ ലഭ്യത സമുചിതമായാല്‍ സമ്പൂര്‍ണമായ സ്വാസ്ഥ്യമാണ് ഫലം. മറിച്ചായാല്‍ രോഗാതുരതയിലേക്കു ശരീരം വലിച്ചഴയ്ക്കപ്പെടും. ഈ നാലു സ്തംഭങ്ങളില്‍ പ്രഥമസ്ഥാനത്ത് ഭക്ഷണം സ്ഥാനംപിടിച്ചിരിക്കുന്നു. കാരണം, മനുഷ്യജീവന്റെ ഊര്‍ജസ്രോതസ്സ് ഭക്ഷണം തന്നെ. ശരീരയന്ത്രം കേടുപാടു കൂടാതെ പ്രവര്‍ത്തിക്കാന്‍ ആഹാരലഭ്യത സമൃദ്ധവും സന്തുലിതവുമാകണം.
ഭക്ഷണച്ചിട്ടകളിലുള്ള മലയാളിയുടെ ആക്രാന്തം പ്രസിദ്ധമാണ്. എപ്പോഴും വെട്ടിവിഴുങ്ങാന്‍ സന്നദ്ധമാണ് മലയാളിയുടെ ആമാശയം. എന്നാല്‍, എത്രകണ്ടു കഴിക്കണമെന്നതിനെപ്പറ്റി  വാഗ്ഭടന്റെ അഷ്ടാംഗഹൃദയത്തില്‍ പറയുന്നുണ്ട്, വയറിന്റെ പകുതി നിറയാന്‍ മാത്രം ഖരപദാര്‍ത്ഥങ്ങളും  കാല്‍ഭാഗം നിറയാന്‍ മാത്രം ദ്രാവകാഹാരങ്ങളും കഴിക്കാം. വയറിലുള്ള ബാക്കി ഭാഗം ഒഴിച്ചിടണം. ഭക്ഷണം ശരീരത്തിന് അമൃതാണ്. അതു ഗുണത്തിലും അളവിലും കഴിക്കേണ്ട രീതിയില്‍ ആസ്വദിച്ചാല്‍ സമ്പൂര്‍ണാരോഗ്യമാണു ഫലം, മറിച്ചായാല്‍ രോഗങ്ങളും.