സി. സോണിയ തെരേസ് ഡി.എസ്.ജെ.
ഡല്‍ഹി നഗരപരിധിയിലെ ലാഡോസറായി അന്ധേരിയ മോഡിലുള്ള സീറോമലബാര്‍ ദേവാലയം ബ്ലോക്ക് ഡവലപ്‌മെന്റ് ഓഫീസറുടെ നിര്‍ദേശപ്രകാരം തകര്‍ത്തതായുള്ള വാര്‍ത്ത ജൂലൈ 12 തിങ്കളാഴ്ച സമൂഹമാധ്യമങ്ങളിലൂടെയാണ് പൊതുസമൂഹം അറിഞ്ഞത്. നടുക്കമുളവാക്കുന്ന വാര്‍ത്തകള്‍ക്കും ദൃശ്യങ്ങള്‍ക്കും പിന്നാലെ പലവിധ വിശദീകരണങ്ങളുമെത്തി. കയ്യേറ്റസ്ഥലം ഒഴിപ്പിച്ചു എന്ന രീതിയിലാണ് പ്രധാനമായും വിശദീകരണങ്ങള്‍ പ്രത്യക്ഷപ്പെട്ടത്. എന്നാല്‍, ഒരു വ്യാഴവട്ടക്കാലമായി നിയമാനുസൃതമായിത്തന്നെ ഉപയോഗിച്ചുകൊണ്ടിരുന്ന സ്ഥലമാണ് അത് എന്ന വാസ്തവം മനസ്സിലാക്കി ഈ വിഷയത്തെ സമീപിച്ചാല്‍ ആരോപണങ്ങള്‍ക്ക് ഒരു മറുവശം കൂടിയുണ്ടെന്നു വ്യക്തമാകും.
ഡല്‍ഹിയില്‍ വിവിധ സേവനമേഖലകളില്‍ പ്രവര്‍ത്തനനിരതരായിരിക്കുന്ന വലിയൊരുവിഭാഗം മലയാളികളായ കത്തോലിക്കര്‍ അംഗങ്ങളായ ഇടവകയാണ് ലാഡോസറായി ലിറ്റില്‍ ഫ്ളവര് ഇടവക. ഈ കൊവിഡ് കാലത്ത് ആരോഗ്യരംഗത്ത് സ്തുത്യര്‍ഹമായി സേവനം ചെയ്തുകൊണ്ടിരിക്കുന്ന നഴ്സുമാരാണ് അവരില്‍ നല്ലൊരു വിഭാഗം. നിര്‍ണായകമായ പ്രവര്‍ത്തനമേഖലകളിലായിരുന്ന് രാജ്യസേവനം നടത്തിവരുന്ന ഒരു വിഭാഗത്തെയാണ് ശത്രുതാപരമായ നീക്കത്തിലൂടെ ഭരണകൂടം മുറിവേല്പിച്ചിരിക്കുന്നത് എന്നുള്ളത് നിസ്സാരമായ കാര്യമല്ല. ഈ സംഭവത്തെത്തുടര്‍ന്നു നടന്ന ചര്‍ച്ചകള്‍ക്കിടയില്‍, അമ്മയെ തല്ലിയാലും രണ്ടുണ്ട് പക്ഷം എന്ന ചൊല്ലിനെ അന്വര്‍ത്ഥമാക്കുന്ന രീതിയില്‍ ക്രൈസ്തവരുടെ വിവിധ വാദഗതികളും കാണപ്പെട്ടു. ഉടമസ്ഥാവകാശമില്ലാത്ത സ്ഥലം കൈവശം വച്ച് ദൈവാലയത്തിനായി ഉപയോഗിച്ചു എന്ന ആരോപണമാണ് മുഖ്യമായും രൂപതയ്ക്കും ഇടവകയ്ക്കും എതിരേ ഉയര്‍ന്നത്. സംഭവുമായി ബന്ധപ്പെട്ട് ഫരീദാബാദ് രൂപത ഇറക്കിയ വിശദീകരണക്കുറിപ്പും മെത്രാനും വിമര്‍ശിക്കപ്പെട്ടു. വാസ്തവം വ്യക്തമായി മനസ്സിലാക്കാതെയാണ് പലരും ഈ വിഷയത്തില്‍ അഭിപ്രായപ്രകടനങ്ങള്‍ നടത്തിയത്.
ഈ വിഷയത്തില്‍ ഉയരുന്ന ചോദ്യങ്ങള്‍ക്കും ആശയക്കുഴപ്പങ്ങള്‍ക്കും വ്യക്തത നല്‍കാന്‍ ശ്രമിക്കുകയാണ് ഇവിടെ.
1. ദൈവാലയം സ്ഥിതിചെയ്യുന്ന സ്ഥലത്തിന്റെ ഉടമസ്ഥാവകാശം സംബന്ധിച്ച ആരോപണങ്ങളുടെ വാസ്തവമെന്ത്?
ഡല്‍ഹിയിലെ സീറോ മലബാര്‍ ഇടവകകളില്‍ പ്രമുഖ സ്ഥാനമുള്ള ഒന്നാണ് ലാഡോസറായി ലിറ്റില്‍ ഫഌര്‍ ഇടവക. നാനൂറില്‍പരം മലയാളികുടുംബങ്ങള്‍ അവിടെയുണ്ട്. പ്രശസ്തമായ കുത്തബ് മിനാറിന്റെ സമീപമാണ് ഈ പ്രദേശം. ഭൂമി പതിറ്റാണ്ടുകളായി കൈവശം വച്ചുപോരുകയും കൈവശാവകാശത്തിന്റേതായ പരിഗണനകള്‍ പൊതുവെ എല്ലാവര്‍ക്കും ലഭിക്കുകയും ചെയ്യുന്ന ഒരു പ്രദേശമാണിത്. അതായത്, ലാഡോസറായിയിലെ ഒട്ടേറെ കെട്ടിടങ്ങള്‍, വീടുകള്‍, സ്ഥാപനങ്ങള്‍ തുടങ്ങിയവയ്ക്കൊന്നും പൂര്‍ണമായ ഉടമസ്ഥാവകാശമില്ല. എന്നുവച്ച് കൈവശാവകാശം ഇല്ലാതെ വരുന്നുമില്ല. ഡല്‍ഹി നഗരപരിധിയിലെ മിക്കവാറും പ്രദേശങ്ങളും ഇങ്ങനെയാണ്. അത്തരം പ്രദേശങ്ങളില്‍ ക്രൈസ്തവദേവാലയങ്ങള്‍ മാത്രമല്ല, ധാരാളം മോസ്‌കുകളും അമ്പലങ്ങളും മറ്റു സ്ഥാപനങ്ങളും സ്ഥിതിചെയ്യുന്നുണ്ട്. ലാഡോസറായിയില്‍ സ്ഥിതിചെയ്തിരുന്ന സീറോമലബാര്‍ ദേവാലയംപോലെതന്നെ അതേ രീതിയില്‍ ആ പരിസരങ്ങളില്‍ നിലനില്‍ക്കുന്ന മറ്റു മതസ്ഥരുടെയും അകത്തോലിക്കരുടേതുമായ ആരാധനാലയങ്ങള്‍ പലതുണ്ട്. ലിറ്റില്‍ ഫ്ളവര് ദൈവാലയത്തോടു ചേര്‍ന്നുതന്നെ ഒരു മോസ്‌കും ഒരു പ്രൊട്ടസ്റ്റന്റ് ആരാധനാലയവുമുണ്ട്. ഇവിടെ സ്ഥലം കൈവശം വച്ച് ഉപയോഗിക്കുന്ന കാര്യത്തില്‍ ലിറ്റില്‍ ഫ്ളവര് ഇടവകയുടെ അവകാശം മാത്രം ചോദ്യം ചെയ്യപ്പെടുന്നത് ദുരൂഹമാണ്. ചില വര്‍ഷങ്ങള്‍ക്കുമുമ്പ് ഇതേ ആരോപണങ്ങള്‍ ലിറ്റില്‍ ഫഌര്‍ ഇടവക നേതൃത്വത്തിനെതിരേ ഉയര്‍ന്നതിനെത്തുടര്‍ന്ന് കേസ് കോടതിയില്‍ എത്തിയപ്പോള്‍, മറ്റാര്‍ക്കും ബാധകമല്ലാത്ത നിയമം കത്തോലിക്കാദൈവാലയത്തിനുമേല്‍ മാത്രം അടിച്ചേല്‍പ്പിക്കാന്‍ പാടില്ല എന്ന നിര്‍ദേശം കോടതിയില്‍നിന്ന് ഉണ്ടായിട്ടുള്ളതാണ്. മാത്രമല്ല, ഈ വിഷയത്തില്‍ മനുഷ്യാവകാശക്കമ്മീഷനും ഇടപെടുകയും അവിടെ ആരാധന നടത്താനുള്ള അവകാശത്തെ ചോദ്യംചെയ്യാന്‍ പാടില്ല എന്ന നിര്‍ദേശം നല്‍കുകയും ചെയ്തിട്ടുണ്ട്. അതിനാല്‍, ഉടമസ്ഥാവകാശം സംബന്ധിച്ച ആരോപണങ്ങള്‍ അടിസ്ഥാനരഹിതമാണ്. മറ്റെല്ലാവര്‍ക്കും നിരുപാധികം ഉപയോഗിക്കാന്‍ അനുമതിയുണ്ടായിരിക്കെ, ഒരു കത്തോലിക്കാദേവാലയത്തിനു മാത്രം അനുമതി നിഷേധിക്കപ്പെടുന്നത് എന്തുകൊണ്ട് എന്നതാണ് ഇവിടെ ചര്‍ച്ച ചെയ്യപ്പെടേണ്ടത്.
2. സ്ഥലത്തിന്റെ ഉടമസ്ഥാവകാശം സംബന്ധിച്ച കേസുകളില്‍ കോടതിയുടെ നിലപാട് എന്തായിരുന്നു?
ലാഡോസറായി ലിറ്റില്‍ ഫഌര്‍ ഇടവകയുടെ സ്ഥലം ഉടമസ്ഥതയുമായി ബന്ധപ്പെട്ട് കോടതിയുടെ പരിഗണനയില്‍ നിലവില്‍ കേസുകളില്ല. മറ്റെല്ലാവര്‍ക്കും തങ്ങളുടെ ആവശ്യങ്ങള്‍ക്ക് ഈ ഭാഗത്തുള്ള സമാനസ്വഭാവമുള്ള ഭൂമി ഉപയോഗിക്കാന്‍ കഴിയുന്നപക്ഷം അതിനുള്ള അവകാശം ലിറ്റില്‍ ഫഌര്‍ ഇടവകയ്ക്കും ഉണ്ട്. അതിനാല്‍ ആ ദൈവാലയം മാത്രമായി പൊളിക്കാന്‍ പാടില്ല എന്നും ആവശ്യമായ സംരക്ഷണം ദൈവാലയത്തിനു നല്‍കണമെന്നുമായിരുന്നു ഹൈക്കോടതി നിര്‍ദേശം. ആ പ്രദേശത്തെ സ്ഥലവിനിയോഗവുമായി ബന്ധപ്പെട്ട് മറ്റൊരു പോളിസി സര്‍ക്കാര്‍ സ്വീകരിക്കാത്ത പക്ഷം ഏതുരീതിയിലും ഭൂമി വിനിയോഗിക്കുന്നതിന് മറ്റാരെയുംപോലെതന്നെ ഇടവകയ്ക്കുള്ള അവകാശത്തെ കോടതി മാനിച്ചിരുന്നു. ഇപ്പോഴുണ്ടായ നിയമനടപടികള്‍ തികച്ചും അപ്രതീക്ഷിതമായിരുന്നു. വൈകിയവേളയില്‍ നോട്ടീസ് ലഭിച്ചപ്പോള്‍പോലും കോടതിയുടെയും മനുഷ്യാവകാശക്കമ്മീഷന്റെയും നിര്‍ദേശങ്ങളെ മറികടന്ന് ഉടനടി ഒരു പൊളിച്ചുനീക്കല്‍ ഉണ്ടാകുമെന്ന് ആരും കരുതിയിരുന്നില്ല.
3. പൊളിച്ചുനീക്കലിന്റെ ഉത്തരവാദിത്വം ആര്‍ക്ക്?
ജൂലൈ ഏഴാംതീയതിയിലെ ഡേറ്റ് വച്ച് നോട്ടീസ് ഇഷ്യൂ ചെയ്തിരിക്കുന്നത് ഡല്‍ഹി സര്‍ക്കാരിനു കീഴിലുള്ള ബ്ലോക്ക് ഡവലപ്‌മെന്റ് ഓഫീസര്‍ (ബിഡിഒ) ആണ്. എന്നാല്‍, ലാന്‍ഡ് സംബന്ധമായ നടപടികള്‍ക്കു പരമാധികാരമുള്ളതും പോളിസികള്‍ സ്വീകരിക്കുന്നതും കേന്ദ്രസര്‍ക്കാരിനു കീഴിലുള്ള ഡല്‍ഹി ഡവലപ്‌മെന്റ് അതോറിറ്റി (ഡിഡിഎ) ആണ്. അതിനാല്‍, ഇത്തരമൊരു നടപടി ഡിഡിഎയുടെ അറിവില്ലാതെ നടക്കുമെന്നു കരുതാനാവില്ല. പ്രത്യേകിച്ച്, ഇടവകദൈവാലയത്തിന് സംരക്ഷണം നല്‍കാനുള്ള നിര്‍ദേശം ഹൈക്കോടതിയും മനുഷ്യാവകാശക്കമ്മീഷനും നല്‍കിയിട്ടുണ്ടായിരിക്കെ ബ്ലോക്ക് ഡവലപ്‌മെന്റ് ഓഫീസര്‍ക്ക് തനിച്ച് ഇത്തരമൊരു തീരുമാനം സ്വീകരിക്കാന്‍ കഴിയില്ല.
4. പള്ളി പൊളിച്ചുനീക്കാനുള്ള തീരുമാനം തിടുക്കത്തില്‍ സ്വീകരിച്ചതെന്തിന്?
ഏതാനും വര്‍ഷങ്ങള്‍ക്കുമുമ്പ് ചില തര്‍ക്കങ്ങളെയും ആരോപണങ്ങളെയും തുടര്‍ന്ന് ലാഡോസറായിയിലെ സ്ഥലത്തിന്റെ കൈവശാവകാശവിഷയത്തില്‍ കോടതി ഇടപെടുകയും, ദൈവാലയം പൊളിക്കുന്നതു നീതീകരിക്കാനാവില്ല എന്ന നിലപാടു സ്വീകരിക്കുകയും ചെയ്തിരുന്നു. അതോടൊപ്പം, ദേശീയ മനുഷ്യാവകാശക്കമ്മീഷനും ഈ വിഷയത്തില്‍ ഇടപെട്ടിരുന്നതാണ്. ആ പ്രദേശത്തുള്ള രണ്ടായിരത്തോളം വരുന്ന സീറോമലബാര്‍ വിശ്വാസികള്‍ ആരാധനയ്ക്കായി ഒത്തുകൂടിയിരുന്ന ആ സ്ഥലത്തിനുമേലുള്ള മറ്റ് അവകാശവാദങ്ങള്‍ നീങ്ങി എന്ന ധാരണയില്‍ തുടരവേയാണ് അപ്രതീക്ഷിതമായി കഴിഞ്ഞ ദിവസം കെട്ടിടങ്ങള്‍ പൊളിച്ചുമാറ്റപ്പെടുന്നത്. അവിടെയുള്ള ഇതര വിഭാഗങ്ങളെക്കുറിച്ചില്ലാത്ത ആരോപണം എങ്ങനെ കത്തോലിക്കാദൈവാലയത്തെ കുറിച്ചുമാത്രം ഉണ്ടായി എന്ന ചോദ്യം ഇവിടെ ഉയര്‍ന്നു നില്‍ക്കുന്നു. അവിടെ ഒരു കത്തോലിക്കാക്കൂട്ടായ്മ രൂപപ്പെടുന്നതിനോടു യോജിക്കാന്‍ കഴിയാത്ത ചിലര്‍ ഇതിനു പിന്നില്‍ പ്രവര്‍ത്തിച്ചിട്ടുണ്ട് എന്ന സൂചനകളുണ്ട്. സ്ഥലമാഫിയകളുടെ ഇടപെടലുകളും ചൂണ്ടിക്കാണിക്കപ്പെടുന്നു. ഫാ. സ്റ്റാന്‍ സ്വാമിയുടെ മരണത്തെത്തുടര്‍ന്നുണ്ടായ പ്രതികരണങ്ങള്‍ ഇത്തരമൊരു കത്തോലിക്കാവിരുദ്ധനീക്കത്തിലേക്കു ചില രാഷ്ട്രീയശക്തികളെ നയിച്ചിട്ടുമുണ്ടാകാം. എന്തുതന്നെയായാലും, കത്തോലിക്കാസഭയോടുള്ള വിരോധമാണ് ഇവിടെ പ്രകടമായിരിക്കുന്നത് എന്നുള്ളത് നിസ്തര്‍ക്കമാണ്.
5. ലാഡോസറായിയിലെ സ്ഥലത്തിന് ലിറ്റില്‍ഫ്‌ളവര്‍ ഇടവകയ്ക്ക് അവകാശമുണ്ടോ?
ഉണ്ട് എന്നാണ് ഉത്തരം. കഴിഞ്ഞ നാല്പതോളം വര്‍ഷമായി, ആദ്യം ഒരു ഇടവകക്കാരനും തുടര്‍ന്ന് പന്ത്രണ്ടു വര്‍ഷമായി ഇടവകയും കൈവശമായി വച്ചിരിക്കുന്നതും ഉപയോഗിക്കുന്നതുമായ സ്ഥലമാണ് ഇത്. നിയമാനുസൃതമായ രീതിയില്‍ നികുതികള്‍ അടയ്ക്കുകയും മറ്റും ചെയ്തുപോന്നിരുന്നു. ലാഡോസറായി ഏരിയയില്‍ ഇപ്രകാരം സ്ഥലം കൈവശം വച്ചുപയോഗിക്കുന്ന അനേകം വ്യക്തികളും പ്രസ്ഥാനങ്ങളുമുണ്ട്. ഫ്‌ളാറ്റുകളും വിവിധ ആരാധനാലയങ്ങളും പണിതുയര്‍ത്തപ്പെട്ടിട്ടുണ്ട്. ഇപ്രകാരമുള്ള സ്ഥലവിനിയോഗങ്ങളൊന്നും അനധികൃതകയ്യേറ്റമെന്ന പേരില്‍ ഒഴിപ്പിക്കാനുള്ള ശ്രമങ്ങള്‍ ഇതുവരെ ഉണ്ടായിട്ടില്ല. അത്തരത്തില്‍ എല്ലാവര്‍ക്കും അവരവരുടെ കൈവശമുള്ള സ്ഥലം ഉപയോഗിക്കാന്‍ അനുവാദമുള്ളപക്ഷം ലിറ്റില്‍ ഫഌര്‍ ഇടവകയ്ക്കും അതിനുള്ള അവകാശമുണ്ട്. ആ അവകാശത്തെ മാനിക്കണമെന്നുതന്നെയാണ് ഹൈക്കോടതിയും മനുഷ്യാവകാശക്കമ്മീഷനും നിര്‍ദേശിച്ചിട്ടുള്ളതും.
