ഇക്കഴിഞ്ഞ ദിവസം കേരളത്തിലെ ഒരു പ്രമുഖമലയാളദിനപത്രത്തില്‍ വന്ന ഒരു പ്രധാന വാര്‍ത്ത ഏറെ ആശങ്കാജനകമായ ഒരു ചിന്താവിഷയമാണെന്നു പറയാതെ വയ്യ. ''വാങ്ങുന്നതെല്ലാം മരുന്നല്ല'' എന്ന തലക്കെട്ടില്‍ വന്ന ആ വാര്‍ത്ത (മലയാള മനോരമ - 2025 നവംബര്‍ 24)യില്‍ പറയുന്നത്, രണ്ടു വര്‍ഷത്തിനിടെ സംസ്ഥാനത്തെ 5 ജില്ലകളില്‍ ഡ്രഗ് കണ്‍ട്രോള്‍വിഭാഗം നടത്തിയ പരിശോധനയില്‍ 5.2 കോടി രൂപ വിലവരുന്ന ഗുണനിലവാരമില്ലാത്ത മരുന്നുകള്‍ കണ്ടെത്തിയെന്നതാണ്. നാം കൊട്ടിഘോഷിക്കുന്ന ''ആരോഗ്യകേരള''ത്തെ അഥവാ ''സുന്ദരകേരള'' ത്തെ ലജ്ജിപ്പിക്കുന്ന  വാര്‍ത്ത!
    വല്ലപ്പോഴും മാത്രം നടത്തുന്ന പരിശോധനയില്‍ തെളിഞ്ഞത് കോടികളുടെ തട്ടിപ്പെങ്കില്‍, നിലവാരമില്ലാത്ത മരുന്നുകള്‍ ഇതിന്റെ എത്രയോ മടങ്ങ് വിപണിയില്‍ ഉണ്ടാകുമെന്ന ആശങ്കയാണ് ആ വാര്‍ത്ത ഉയര്‍ത്തുന്ന ചോദ്യം. കേവലം അഞ്ചു ജില്ലകളിലെ കണക്കെടുത്തപ്പോള്‍ ഇതാണു സ്ഥിതിയെങ്കില്‍ മറ്റ് 9 ജില്ലകളിലെ കണക്കുകൂടി ചേര്‍ക്കുമ്പോള്‍ മരുന്നുവിപണിയിലെ തട്ടിപ്പിന്റെ വ്യാപ്തി ഊഹിക്കയേ വേണ്ടൂ. വൈറല്‍പനി, ഹൃദ്രോഗം തുടങ്ങിയ രോഗങ്ങള്‍ക്കുള്‍പ്പെടെ നല്‍കുന്ന മരുന്നുകളില്‍പോലും ഗുണനിലവാരമില്ലാത്തവ കടന്നുകൂടിയിട്ടുണ്ടെന്നാണ് ഡ്രഗ് കണ്‍ട്രോള്‍വിഭാഗം  വിവരാവകാശനിയമപ്രകാരം വെളിപ്പെടുത്തിയിരിക്കുന്നത്. എത്രയോ ഗുരുതരമായ സ്ഥിതിവിശേഷമാണിതെന്നു നാം ചിന്തിക്കണം.
    മരുന്നുകളുടെ ഉപയോഗത്തില്‍ കേരളം മുമ്പന്തിയിലാണെന്നുള്ളതു പണ്ടേ പ്രസിദ്ധമാണ്. ഏറ്റവും പുതിയ കണക്കനുസരിച്ച്  ഏകദേശം 13,000 കോടിയുടെ മരുന്നുകള്‍ പ്രതിവര്‍ഷം കേരളം തിന്നുന്നു അഥവാ വിഴുങ്ങുന്നു! എന്നിട്ടോ? അസുഖങ്ങള്‍ക്കു കുറവുണ്ടോ? ഇവിടെ ആശുപത്രികള്‍ക്കു പഞ്ഞമില്ലെന്ന്  എല്ലാവരും സമ്മതിക്കും. പൊതുജനാരോഗ്യസംവിധാനവും കേമംതന്നെ. പക്ഷേ, എത്രയെല്ലാം  നേട്ടങ്ങള്‍ കൈവരിച്ചിട്ടുണ്ടെങ്കിലും ആരോഗ്യരംഗത്തു വലിയ തകര്‍ച്ചയാണ് ഇന്നു  നമ്മുടെ നാട് അഭിമുഖീകരിക്കുന്നതെന്നു സൂക്ഷ്മപരിശോധനയില്‍ മനസ്സിലാകും. പഴയ രോഗങ്ങളുടെ തിരിച്ചുവരവ്, പുതിയ രോഗങ്ങളുടെ ആധിക്യം, ജീവിതശൈലീരോഗങ്ങളുടെ വര്‍ധന, മദ്യപാനം, ലഹരിപദാര്‍ഥങ്ങളുടെ ഉപയോഗം. വര്‍ധിച്ചുവരുന്ന ആത്മഹത്യകള്‍, ഏറിക്കൊണ്ടിരിക്കുന്ന ചികിത്സാച്ചെലവുകള്‍ എന്നിങ്ങനെ നോക്കിയാല്‍ ഒട്ടും മെച്ചമല്ല നമ്മുടെ സ്ഥിതി. തീര്‍ന്നില്ല; ശുദ്ധമായ കുടിവെള്ളത്തിന്റെ  അപര്യാപ്തത, മാലിന്യത്തിന്റെ വലിയ തോതിലുള്ള വര്‍ധന, അന്തരീക്ഷമലിനീകരണം, കീടനാശിനികളുടെ അമിതോപയോഗം, പരിസ്ഥിതിയിലും  കാലാവസ്ഥയിലും വന്ന മാറ്റങ്ങള്‍ തുടങ്ങി മറ്റു പ്രതിസന്ധികള്‍ വേറെ കിടക്കുന്നു!
    മേല്പറഞ്ഞ പ്രതിസന്ധികളിലെ മുഖ്യയിനമാണ് അമിതമായ ഔഷധസേവ. ആ ഔഷധസേവയുടെ 'വിശേഷ'മാണല്ലോ ഇപ്പോള്‍ പുതിയ വാര്‍ത്തയിലൂടെ പുറത്തുവന്നിരിക്കുന്നത്: കഴിക്കുന്ന മരുന്നൊന്നും മരുന്നല്ലത്രേ. ആരോഗ്യരംഗത്തു കൊടികുത്തിവാഴുന്ന അഴിമതിക്കും അനാസ്ഥയ്ക്കും ഉത്തരവാദിത്വമില്ലായ്മയ്ക്കും ഇതില്‍ക്കൂടുതല്‍ ഒരു ഉദാഹരണം ആവശ്യമുണ്ടോ? അഞ്ചു ജില്ലകളില്‍നിന്നു മാത്രമായാണ് ഈ 5.2 കോടിയുടെ തട്ടിപ്പു കണ്ടെത്തിയതെന്നു നാമോര്‍ക്കണം. മറ്റു ജില്ലകളിലെ കണക്കു ലഭ്യമല്ലാത്തത്, പരിശോധന കാര്യക്ഷമമല്ലാത്തതിനാലാണെന്ന് ഉദ്യോഗസ്ഥര്‍ തന്നെ സമ്മതിക്കുന്നു.
നിലവാരമില്ലാത്ത മരുന്നുകളില്‍ സര്‍ക്കാര്‍ വിതരണം ചെയ്യുന്നവയുമുണ്ട് എന്നതാണ് ഏറ്റവും ലജ്ജാകരമായ കാര്യം. സംസ്ഥാനസര്‍ക്കാരിന്റെ സ്ഥാപനമായ കേരള മെഡിക്കല്‍ സര്‍വീസസ് കോര്‍പറേഷന്‍ 2004 ല്‍ പ്രമേഹം, തലകറക്കം, വെര്‍ട്ടിഗോ തുടങ്ങിയ രോഗങ്ങള്‍ക്ക് പാലക്കാട് ജില്ലയില്‍ വിതരണം ചെയ്ത 4.39 കോടി രൂപയുടെ മരുന്നിനു ഗുണനിലവാരമില്ലെന്നു കണ്ടെത്തിയെന്നു വിവരാവകാശമറുപടിയിലുണ്ട്. ഇവ ഡ്രഗ്  കണ്‍ട്രോള്‍ വിഭാഗം പിടിച്ചെടുക്കുകയും ചെയ്തു. അതുപോലെതന്നെ, സംസ്ഥാനത്ത് ഏകദേശം 24,000 മെഡിക്കല്‍ സ്റ്റോറുകള്‍ പ്രവര്‍ത്തിക്കുന്നുണ്ടെന്നാണു കണക്ക്. ഇവയില്‍ പരിശോധന നടത്താന്‍ ആകെയുള്ളത് അമ്പതോളം ഡ്രഗ് ഇന്‍സ്‌പെക്ടര്‍മാര്‍ മാത്രം! ഇവര്‍ എത്ര സ്ഥാപനങ്ങള്‍ പരിശോധിക്കും? പകുതിയോളം മെഡിക്കല്‍ സ്റ്റോറുകളില്‍ വര്‍ഷത്തിലൊരിക്കല്‍പ്പോലും പരിശോധന നടക്കുന്നില്ലെന്നാണു വിവരം. ഇനി പരിശോധിക്കുന്നവയില്‍ത്തന്നെ, മരുന്നു കണ്ടെടുത്ത്, കെമിക്കല്‍ പരിശോധന കഴിഞ്ഞ്, ആ മരുന്നിന്റെ ബാച്ച് മുഴുവന്‍ നശിപ്പിക്കാന്‍ ശ്രമം തുടങ്ങുമ്പോഴേക്കും മരുന്നുകളെല്ലാം  വിറ്റഴിയുകയും ചെയ്യും. എന്തൊരു ദുരവസ്ഥയെന്നു ചിന്തിക്കുക.
മറ്റു സംസ്ഥാനങ്ങളില്‍നിന്നു നൂറു കണക്കിനു മരുന്നുകമ്പനികളാണ് വിപണിയില്‍ മരുന്നെത്തിക്കുന്നത്. ഇതിലൂടെ രംഗപ്രവേശം ചെയ്യുന്നവയില്‍ വൈറല്‍പനിക്കുള്ള വ്യാജന്‍വരെ പ്രമുഖ കമ്പനികളുടെപേരില്‍ കണ്ടെത്തിയെന്നാണു പുതിയ വെളിപ്പെടുത്തല്‍. കോട്ടയത്തു മാത്രം 67 ഇനം മരുന്നുകളാണ് ഗുണനിലവാരമില്ലാത്തതെന്നു കണ്ടെത്തി തടഞ്ഞതെന്നു നാമറിയണം.
   എന്താണിതിനു പരിഹാരം? 'സിസ്റ്റ' ത്തെ പഴിചാരി രക്ഷപ്പെടാന്‍ ശ്രമിക്കാതെ കുത്തഴിഞ്ഞ ഈ ആരോഗ്യമേഖല നേരാംവണ്ണം നിലനിര്‍ത്താനുള്ള ഉത്തരവാദിത്വം സര്‍ക്കാര്‍ കാണിക്കണം. മരുന്നുകളുടെ ഗുണനിലവാരം ഉറപ്പാക്കണം. നിലവാരമില്ലാത്ത മരുന്നുകളുടെ വരവും പോക്കും എവിടെനിന്ന് എവിടേക്കെന്നു പരിശോധിച്ചു കണ്ടെത്തി, വ്യാജമരുന്നുകമ്പനികളെയും അതിനു കുടപിടിക്കുന്ന മരുന്നുമാഫിയകളെയും നിലയ്ക്കു നിര്‍ത്തണം. ഇതു ജനങ്ങളുടെ ജീവല്‍പ്രശ്‌നമാണെന്ന ബോധം സര്‍ക്കാരിനുണ്ടെങ്കില്‍ എത്രയുംവേഗം അതിനുള്ള ചര്‍ച്ചകളും നടപടികളും ആരംഭിക്കണം. ഒപ്പം മരുന്നുസേവയെക്കുറിച്ച് ശരിയായ ഒരു അവബോധം പൊതുജനങ്ങളും ആര്‍ജിച്ചെടുക്കണം. ഡോക്ടറുടെ നിര്‍ദേശമില്ലാതെ മരുന്നുകള്‍ കഴിക്കുകയോ ഡോസ് കൂടിയ അളവില്‍ കഴിക്കുകയോ  തെറ്റായ കാരണങ്ങള്‍ക്കായി ഉപയോഗിക്കുകയോ അരുതെന്നാണല്ലോ ആരോഗ്യവിദഗ്ധരുടെ ഉപദേശം. പക്ഷേ, അത് അനുസരണയോടെ ഉള്‍ക്കൊണ്ട് നാം മഹിമയോടെ വാങ്ങിക്കഴിക്കുന്ന പല മരുന്നുകളിലും  മരുന്നിനുപോലും മരുന്നില്ലാത്ത വ്യാജന്മാരും ഉണ്ടാവാമെന്ന് ആരും മറക്കരുത്.