സാര്‍, ഇയാള്‍ എട്ടുലിറ്റര്‍ കൊക്കോകോള ഒരു ദിവസം കുടിക്കും. ഷുഗറിന്റെ മരുന്ന് എത്ര കഴിച്ചാലും അതു താഴില്ല. ഇടയ്ക്കിടയ്ക്ക് ഹോസ്പിറ്റലില്‍ പോകണം. എവിടെപ്പോയാലും ഇയാള്‍ എന്തെങ്കിലും പ്രശ്‌നമുണ്ടാക്കും. അവര്‍ക്കെതിരേ കേസു കൊടുക്കും. നിലവില്‍ അന്‍പതിലധികം കേസുകളുണ്ട്.'' ഇത്രയും കേട്ടുകഴിഞ്ഞപ്പോള്‍ എന്റെ മുഖം മാറുന്നത് ഷൈജ ശ്രദ്ധിച്ചു. ''സാര്‍ മൊത്തം കാര്യങ്ങള്‍ കേട്ടുഴിയുമ്പോള്‍ ഇനിയും ഞെട്ടും.  ഇയാള്‍ക്ക് എന്നെ വിശ്വാസമാണെന്ന് നാട്ടുകാരോടു പറയും. പക്ഷേ, എന്നെ ഭയങ്കരസംശയമാണ്. സിഗരറ്റ് വലിച്ചുകൊണ്ടാണ് ഇയാള്‍ ഞാനുമായി ലൈംഗികബന്ധത്തില്‍ ഏര്‍പ്പെടുക. കത്തിച്ച സിഗരറ്റുകൊണ്ടെന്നെ കുത്തിയാലേ ഇയാള്‍ക്കു നിര്‍വൃതിയുള്ളൂ...'' 
   ''സാറിനറിയുമോ, ഇയാള്‍ എവിടെന്നെങ്കിലും പെണ്ണുങ്ങളെ വളയ്ക്കും. രാത്രി മുഴുവന്‍ അവരുമായി സംസാരിക്കും. ഇതില്‍ മിക്കവരും എന്റെ ഭര്‍ത്താവു നേരിട്ടു കണ്ടിട്ടുള്ളവരല്ല. നേരിട്ടു കണ്ടാല്‍ ആരും ഇയാളുടെ പിറകേ പോകില്ല. ഷുഗര്‍ കൂടിയിട്ട് ദേഹം മുഴുവന്‍ പൊട്ടിയാണിരിക്കുന്നത്.'' ഇത്രയും കേട്ടപ്പോള്‍ ഞാന്‍ ഷൈജയോടു ചോദിച്ചു, ''പിന്നെ എന്തിനാണ് ഇയാളുടെ കൂടെ കഴിയുന്നത്?'' അവര്‍ എന്റെ ചോദ്യത്തിനുതന്ന മറുപടി വിചിത്രമായി തോന്നി. ''സാര്‍ ഞങ്ങള്‍ക്കു രണ്ടു മക്കളാണ്. എന്റെ തെറ്റുകൊണ്ടാണ് പപ്പാ ഇങ്ങനെ ആയത് എന്നാണ്  അവര്‍ പറയുന്നത്!'' ''അതെന്താ അവര്‍ അങ്ങനെ പറയാന്‍ കാരണം?'' ഞാന്‍ ആകാംക്ഷയോടെ ചോദിച്ചു. ''ഞാന്‍ രണ്ടുവര്‍ഷം മക്കള്‍ ചെറുതായിരുന്നപ്പോള്‍ ബഹറിനു പോയിരുന്നു. ഇവിടുത്തെ സാമ്പത്തികഞെരുക്കം കാരണം അവിടെ ഒരു മലയാളിയുടെ വീട്ടില്‍ ജോലിക്കു പോയതായിരുന്നു. നല്ല സാലറിയും കിട്ടി. അതുകൊണ്ട് കടവും വീട്ടി. മക്കളു പറയുന്നത് അന്നു ഞാന്‍ പപ്പയെയും മക്കളെയും ഇട്ടിട്ടു പോയതുകൊണ്ടാണ് ഇതൊക്കെ സംഭവിച്ചത് എന്നാണ്. ഷൈജ മേല്‍സൂചിപ്പിച്ച കാര്യം പറഞ്ഞുനിര്‍ത്തിയത് കരഞ്ഞുകൊണ്ടായിരുന്നു. ''ഞാന്‍ നന്നാകണമെന്ന് എന്റെ മക്കള്‍ പറയുന്നതുകൊണ്ടാണ് ഞാനിന്ന് സാറിന്റെ അടുത്ത് കൗണ്‍സലിങ്ങിന് എത്തിയിരിക്കുന്നത്. എന്റെ മക്കളുടെ സന്തോഷത്തിനുവേണ്ടി.'' ഷൈജയുടെ അനുജത്തിയുടെ ഭര്‍ത്താവ് ഉയര്‍ന്ന തസ്തികയിലുള്ള ഒരു ഗവണ്‍മെന്റുദ്യോഗസ്ഥനായതിനാല്‍ അദ്ദേഹത്തിന്റെ നിര്‍ബന്ധപ്രകാരം ഷൈജയുടെ ഭര്‍ത്താവ് ഗോപിയും കൗണ്‍സലിങ്ങിന് എത്തിയിരുന്നു. ഗോപിയോടു സംസാരിച്ചപ്പോള്‍ ഷൈജ പറഞ്ഞതൊക്കെ സത്യമെന്നു മനസ്സിലായി. പക്ഷേ, അയാള്‍ പറയുന്നത് തന്റെ ഭാര്യയ്ക്കു സ്‌നേഹമില്ലാത്തിനാലാണ് ഇങ്ങനെയൊക്കെ ചെയ്യുന്നത് എന്നാണ്.
സത്യം അറിയാന്‍ മക്കളുടെ അടുത്തേക്ക്!
ആദ്യത്തെ കൗണ്‍സലിങ് സെഷനുശേഷം ഇവരുടെ മക്കളെ കണ്ടു. ഇവര്‍ക്കു മാതാവിനെയും പിതാവിനെയും ഒരുപോലെ ഇഷ്ടമാണ്. അവര്‍ ഒന്നിച്ച് സന്തോഷത്തോടെ ജീവിക്കണമെന്ന് അവര്‍ ആഗ്രഹിക്കുന്നു. അപ്പന്റെ പ്രവൃത്തികളോട് അവര്‍ക്ക് ഒട്ടുമേ യോജിപ്പില്ല. അത് അവര്‍ പ്രത്യക്ഷത്തില്‍ പറയുന്നില്ല. കാരണം, അപ്പന്‍ പകയുടെ ആളാണ്. വൈരാഗ്യം വച്ചുകൊണ്ടിരിക്കും. അവര്‍ അമ്മയുടെ വേദന മനസ്സിലാക്കുന്നുണ്ട്. അവര്‍ രണ്ടുപേരും ആവശ്യപ്പെട്ടത് അപ്പനെ നന്നാക്കിയെടുക്കണമെന്നായിരുന്നു.
പ്രശ്‌നപരിഹാരത്തിനായി 
മറ്റു കുടുംബാംഗങ്ങള്‍ക്കൊപ്പം!
ഈയൊരു പ്രശ്‌നപരിഹാരത്തിനായി അടുത്ത കുടുംബാംഗങ്ങളെ കണ്ടും ഇയാളുടെ പ്രശ്‌നം എന്താണ് എന്നു വിവരിച്ചു. ഹോസ്പിറ്റലൈസേഷന്‍ ആവശ്യമെന്ന് അറിയിച്ചു. ബലമായി ഇദ്ദേഹത്തെ കാഞ്ഞിരപ്പള്ളിക്കടുത്തുള്ള ഒരു മെന്റല്‍ ഹെല്‍ത്ത് ഹോസ്പിറ്റലില്‍ അഡ്മിറ്റാക്കാന്‍ തീരുമാനിച്ചു. ബന്ധുക്കള്‍ അതിവിദഗ്ധമായി അതു നടപ്പാക്കി. ഒന്നരമാസസമയമെടുത്തു ഇയാള്‍ പ്രശ്‌നങ്ങളില്‍നിന്നും പുറത്തു കടക്കാന്‍. ഇന്നയാള്‍ ഭാര്യയ്ക്കും മക്കള്‍ക്കുമൊപ്പം സുഖമായി ജീവിക്കുന്നു. മാസത്തില്‍ രണ്ടു പ്രാവശ്യമുള്ള കൗണ്‍സലിങ്ങ് സെഷനുകള്‍ ഇവര്‍ മുടക്കാറില്ല!
എന്തായിരുന്നു ഗോപിയുടെ പ്രശ്‌നം?
ഗോപിക്ക് പലതരത്തിലുള്ള മാനസികപ്രശ്‌നങ്ങള്‍ ഉണ്ടായിരുന്നു. ഒപ്പം ശാരീരികപ്രശ്‌നങ്ങളും. ഒബ്‌സസീവ് കംപള്‍സീവ് ഡിസോര്‍ഡര്‍ ((OCD)), ബോര്‍ഡര്‍ ലൈന്‍ പേഴ്‌സണാലിറ്റി ഡിസോര്‍ഡര്‍ (BPD), നാര്‍സിസിസ്റ്റിക് പേഴ്‌സണാലിറ്റി ഡിസോര്‍ഡര്‍(NPD), ഡിപ്രഷന്‍ എന്നിവയൊക്കെ ഇദ്ദേഹത്തില്‍ പ്രകടമായിരുന്നു. അനാരോഗ്യകരമായ ശീലങ്ങളും ശാരീരികപ്രശ്‌നങ്ങളും നിരവധിയായിരുന്നു. ഇയാള്‍ ഇത്രയും സങ്കീര്‍ണമായ പ്രശ്‌നങ്ങളുടെ അടിമയാകാന്‍ രണ്ടു കാര്യങ്ങള്‍ പ്രധാനമായിരുന്നു.
1. പാരമ്പര്യഘടകങ്ങള്‍
2. സാഹചര്യങ്ങള്‍
ഗോപിയുടെ പിതാവിന്റെ പിതാവ് മാനസികപ്രശ്‌നങ്ങളും സ്വഭാവവൈകല്യങ്ങളും ഉള്ള വ്യക്തിയായിരുന്നു. ഗോപിയുടെ പിതാവ് അദ്ദേഹത്തിന്റെ ചെറുപ്പത്തില്‍ത്തന്നെ മരണമടഞ്ഞിരുന്നു. ഗോപി വളര്‍ന്നത് പിതാവിന്റെ പിതാവിന്റെ (മുത്തച്ഛന്‍) ദുര്‍മാതൃകകള്‍ കണ്ടുകൊണ്ടാണ്. അബദ്ധധാരണകളുടെ ഒരു മനുഷ്യനായിരുന്നു ഗോപിയുടെ മുത്തച്ഛന്‍. ക്രൂരമായ പ്രവൃത്തികള്‍ അദ്ദേഹത്തിന് ഹരമായിരുന്നു. അയാളുടെ രണ്ടു ഭാര്യമാര്‍ ആത്മഹത്യ ചെയ്തിരുന്നു. ഗോപി അയാളെ ഒരു പരിധിവരെ മോഡല്‍ (http://en.wikipedia.org/wiki/modeling-psychology)
എന്തുകൊണ്ട് ഗോപിയെ ഹോസ്പിറ്റലിലേക്ക് അയച്ചു?
എല്ലാ മാനസികപ്രശ്‌നങ്ങള്‍ക്കും കൗണ്‍സലിങ്‌കൊണ്ടു മാത്രം പരിഹാരം ലഭിക്കില്ല. അതിന് മെഡിറ്റേഷനും ആവശ്യമാണ്. അതുപോലെതന്നെ മാനസികപ്രശ്‌നങ്ങള്‍ക്ക് മരുന്നു കഴിക്കുന്നവര്‍ക്ക് കൗണ്‍സലിങ് നിര്‍ബന്ധമാണുതാനും. ചില മാരകമായ ശാരീരികരോഗങ്ങള്‍ ഉള്ളവര്‍ക്കും കൗണ്‍സലിങ് ആവശ്യമാണ്. മാനസികപ്രശ്‌നങ്ങള്‍ക്കു ഹോസ്പിറ്റലില്‍ പോകുന്നതും മരുന്നു കഴിക്കുന്നതും ശാരീരികരോഗങ്ങള്‍ക്കു ഹോസ്പിറ്റലില്‍ പോകുന്നതുപോലെയും മരുന്നു കഴിക്കുന്നതുപോലെയുംതന്നെയാണ്. അതിനെ ഭയക്കേണ്ട ആവശ്യമില്ല. മാനസികപ്രശ്‌നങ്ങള്‍ പലപ്പോഴും തലച്ചോറിലെ കെമിക്കല്‍ വാഹകരുമായി (Chemical Messengers - Neurotransmitters)  ബന്ധപ്പെടുന്നതുകൂടിയാണ്. അതില്‍ത്തന്നെ പലപ്പോഴും കെമിക്കല്‍വാഹകരില്‍ വരുത്തേണ്ട മാറ്റങ്ങള്‍ മരുന്നുകളിലൂടെയേ സാധ്യമാകൂ. ഇതു വിലയിരുത്തി, പഠിച്ച്, ശരിയായ പ്രശ്‌നങ്ങള്‍ കണ്ടെത്തി, ട്രീറ്റ്‌മെന്റ് നിര്‍ണയിക്കേണ്ടത് സൈക്യാട്രിസ്റ്റുകളാണ്. ആയതിനാല്‍ ചില സാഹചര്യങ്ങളില്‍ ഹോസ്പിറ്റല്‍ അഡ്മിഷന്‍ തന്നെ ആവശ്യമായി വരും. മരുന്നിനൊപ്പം കൗണ്‍സലിങ് എന്ന തത്ത്വം ഒരിക്കലും മറക്കാന്‍ പാടില്ലതാനും.
ഗോപി ഹോസ്പിറ്റലില്‍ അഡ്മിറ്റായില്ലായിരുന്നുവെങ്കില്‍ എന്തു സംഭവിക്കുമായിരുന്നു?
ഇത്തരത്തിലുള്ള പലരും സ്വമേധയാ, ഹോസ്പിറ്റലില്‍ പോകില്ല. എന്നാല്‍, ചിലരെ ബലപ്രയോഗത്തിലൂടെ ഹോസ്പിറ്റലില്‍ എത്തിക്കേണ്ടതായി വരും. (മാനസികപ്രശ്‌നം ഉള്ളവരെത്തന്നെയാണോ ഹോസ്പിറ്റലില്‍ ബന്ധുക്കള്‍ എത്തിക്കുന്നത് എന്ന് ഹോസ്പിറ്റല്‍ അധികൃതര്‍ ഉറപ്പുവരുത്തും. കാരണം, ഇത്തരം അഡ്മിഷനുകള്‍ സ്വാര്‍ത്ഥതാത്പര്യങ്ങള്‍ക്കുവേണ്ടി ചില ബന്ധുക്കള്‍ നടത്തിയ അനുഭവങ്ങള്‍ ഉണ്ട്. ഗോപിയെ ഇത്തരത്തിലാണ് ഹോസ്പിറ്റലില്‍ എത്തിച്ചത്. ഗോപി ഹോസ്പിറ്റലില്‍ എത്തിയില്ലായിരുന്നവെങ്കില്‍ ഒരു പക്ഷേ, അവര്‍ വിവാഹമോചനത്തിലേക്കു കടക്കുമായിരുന്നു. ഇവിടെ ഇവരുടെ കുട്ടികളുടെ ഇടപെടല്‍, ഭാര്യയുടെ സഹിഷ്ണുത, ബന്ധുക്കളുടെ വളരെ പോസിറ്റീവായ മനോഭാവം ഇവയെല്ലാം പ്രശ്‌നപരിഹാരത്തിനും സഹായിച്ചു. ഓര്‍ക്കുക, പലരുടെയും പ്രശ്‌നങ്ങള്‍ കൂട്ടുത്തരവാദിത്വത്തോടെ ശ്രമിച്ചാല്‍ പരിഹരിക്കപ്പെടും.