*
പാലാ: പാസ്റ്ററല്‍ കൗണ്‍സിലും പ്രസ്ബിറ്ററല്‍ കൗണ്‍സിലും ബിഷപ്പിന്റെ രണ്ടു ചിറകുകളാണെന്നും കൗണ്‍സിലംഗങ്ങള്‍ക്ക് സഭയെ പടുത്തുയര്‍ത്തുന്നതില്‍ കൂട്ടുത്തരവാദിത്വമുണ്ടെന്നും സീറോ മലബാര്‍ സഭ മേജര്‍ ആര്‍ച്ചുബിഷപ് മാര്‍ റാഫേല്‍ തട്ടില്‍. പാലാ സെന്റ് തോമസ് കത്തീദ്രല്‍ പാരിഷ് ഹാളില്‍ രൂപതയിലെ പതിന്നാലാം പാസ്റ്ററല്‍ കൗണ്‍സിലിന്റെയും പ്രസ്ബിറ്ററല്‍ കൗണ്‍സിലിന്റെയും ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം.
പാലാ രൂപത പ്രഥമ ബിഷപ് മാര്‍ സെബാസ്റ്റ്യന്‍ വയലിലിന്റെ സ്വര്‍ഗപ്രവേശനത്തിന്റെ മുപ്പത്തിയൊമ്പതാം വാര്‍ഷികദിനത്തില്‍ മാര്‍ തട്ടിലിന്റെ മുഖ്യകാര്‍മികത്വത്തില്‍ നടന്ന വിശുദ്ധകുര്‍ബാനയ്ക്കും ഒപ്പീസിനും ശേഷമാണ് ഉദ്ഘാടനസമ്മേളനം നടന്നത്. ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിച്ചു.
പാസ്റ്ററല്‍ കൗണ്‍സില്‍ ചെയര്‍മാനായി ചൂണ്ടച്ചേരി എന്‍ജിനീയറിങ് കോളജ് പ്രിന്‍സിപ്പല്‍ ഡോ. വി.പി. ദേവസ്യാ വള്ളിക്കാവുങ്കലിനെയും സെക്രട്ടറിയായി അഡ്വ. സിജി ആന്റണി തെക്കേടത്തിനെയും നിയമിച്ചു. പ്രസ്ബിറ്ററല്‍ കൗണ്‍സില്‍ സെക്രട്ടറിയായി ഫാ. മാത്യു ആലപ്പാട്ടുമേടയില്‍ നിയമിതനായി.
സമ്മേളനത്തില്‍ മാര്‍ ജോസഫ് പള്ളിക്കാപറമ്പിലിന്റെ സാന്നിധ്യവുമുണ്ടായിരുന്നു. മുഖ്യവികാരി ജനറാള്‍ മോണ്‍. ജോസഫ് തടത്തില്‍, രൂപതാ ചാന്‍സര്‍ റവ. ഡോ. ജോസഫ് കുറ്റിയാങ്കല്‍ എന്നിവര്‍ പ്രസംഗിച്ചു. വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. സെബാസ്റ്റ്യന്‍ വേത്താനത്ത്, മോണ്‍. ജോസഫ് കണിയോടിക്കല്‍, രൂപത പ്രൊക്യൂറേറ്റര്‍ റവ. ഡോ. ജോസഫ് മുത്തനാട്ട്, റവ. ഡോ. കുര്യന്‍ മുക്കാംകുഴി, കത്തീദ്രല്‍ വികാരി റവ. ഡോ. ജോസ് കാക്കല്ലില്‍ എന്നിവര്‍ നേതൃത്വം നല്‍കി. മീറ്റിങ്ങില്‍ റവ. ഡോ. ആന്‍ഡ്രൂസ് മേക്കാട്ടുകുന്നേല്‍ തയ്യാറാക്കിയ രണ്ടാം വത്തിക്കാന്‍ സൂനഹദോസിന്റെ '20 ദൈവശാസ്ത്രജ്ഞന്മാര്‍' എന്ന പുസ്തകം പ്രകാശനം ചെയ്തു.
