യൂദയായില്‍ രാജാവായി സ്ഥാനമേറ്റ സോളമന്റെ മകന്‍ റഹോബോവാം അന്യദേവന്മാരെ ആരാധിക്കുകയും കര്‍ത്താവിന്റെ മുമ്പില്‍ തിന്മ പ്രവര്‍ത്തിക്കുകയും ചെയ്തു. യൂദാ പാപം ചെയ്ത് തങ്ങളുടെ പിതാക്കന്മാരേക്കാള്‍ കൂടുതല്‍ അവിടുത്തെ പ്രകോപിപ്പിച്ചു. അവര്‍ പൂജാഗിരികളും സ്തംഭങ്ങളുമുണ്ടാക്കി എല്ലാ കുന്നുകളുടെയും മുകളിലും വൃക്ഷങ്ങളുടെ ചുവട്ടിലും അഷേരാപ്രതിഷ്ഠകള്‍ സ്ഥാപിക്കുകയും ചെയ്തു. കര്‍ത്താവ് ഇസ്രയേല്‍ജനത്തിന്റെ  മുമ്പില്‍നിന്ന് ആട്ടിയകറ്റിയ ജനതകളുടെ എല്ലാ മ്ലേച്ഛതകളിലും അവര്‍ മുഴുകി (1 രാജാക്കന്മാര്‍ 14:22-24).
ഭരണം സുസ്ഥാപിതമായപ്പോള്‍ റഹോബോവാമും ഇസ്രയേല്‍ജനവും കര്‍ത്താവിന്റെ നിയമം ഉപേക്ഷിച്ചു. അവര്‍ കര്‍ത്താവിനോട് അവിശ്വസ്തത കാണിച്ചതിനാല്‍ റഹോേബാവാമിന്റെ അഞ്ചാം ഭരണവര്‍ഷം ഈജിപ്തുരാജാവായ ഷീഷാക്ക്  1,200 രഥങ്ങളും 60,000 കുതിരപ്പടയാളികളുമായി ജറുസലെമിനെ ആക്രമിച്ചു. ലിബിയരും സൂക്കിയരും എത്യോപ്യരുമായി  അസംഖ്യം ആളുകളും അവനോടൊത്തുണ്ടായിരുന്നു. അവര്‍ യൂദയായിലെ സുരക്ഷിതനഗരങ്ങള്‍ കീഴടക്കുകയും ജറുസലെമിനെ ആക്രമിക്കുകയും ചെയ്തു. ദൈവാലയത്തിലെയും കൊട്ടാരത്തിലെയും നിധികളും സോളമന്‍ നിര്‍മിച്ച സുവര്‍ണപരിചകളും അവര്‍ കവര്‍ന്നെടുത്തു. എല്ലാം അവര്‍ കൊണ്ടുപോയി (1 രാജാക്കന്മാര്‍ 14:25-26, 2 ദിനവൃത്താന്തം 12:1-4).
ഇസ്രയേലില്‍ ഭരണം നടത്തിയ ജറോബോവാം കര്‍ത്താവില്‍നിന്നകലുകയും സ്വര്‍ണംകൊണ്ടു രണ്ടു കാളക്കുട്ടികളെ നിര്‍മിച്ച് അവയെ ആരാധിക്കാന്‍ ജനങ്ങളെ പ്രേരിപ്പിക്കുകയും ചെയ്തു. അവന്‍ ജനത്തോടു പറഞ്ഞു: ''നിങ്ങള്‍ ജറുസലേമിലേക്കു പോകേണ്ടാ, ഇസ്രയേല്‍ജനമേ, ഇതാ, ഈജിപ്തില്‍നിന്നു നിങ്ങളെ മോചിപ്പിച്ച ദേവന്മാര്‍.'' അവന്‍ അവയിലൊന്നിനെ ബഥേലിലും ഒന്നിനെ ദാനിലും പ്രതിഷ്ഠിച്ചു. ഇതു പാപമായിത്തീര്‍ന്നു. അവന്‍ പൂജാഗിരികളുണ്ടാക്കി ലേവിഗോത്രത്തില്‍പെടാത്തവരെ പുരോഹിതരാക്കി (1 രാജാക്കന്മാര്‍ 12:28-31).
റഹോബോവാമിന്റെ മകള്‍ മാഖായുടെ മകന്‍ അബിയാമിന്റെ ഭരണകാലത്ത് യൂദായും ഇസ്രയേലും തമ്മില്‍ യുദ്ധമുണ്ടായി. യൂദായുടെ നാലുലക്ഷം വീരയോദ്ധാക്കള്‍ ഇസ്രയേലിന്റെ 8 ലക്ഷം യുദ്ധവീരന്മാരുമായി ഏറ്റുമുട്ടി. മുന്നിലും പിന്നിലും ആക്രമണമുണ്ടായപ്പോള്‍ യൂദാസൈന്യം കര്‍ത്താവിനോടു നിലവിളിച്ചു. പുരോഹിതന്മാര്‍ കാഹളമൂതി. യൂദാസൈന്യം പോര്‍വിളി നടത്തി. അവര്‍ ആര്‍ത്തുവിളിച്ചപ്പോള്‍ അബിയാമിന്റെയും യൂദായുടെയും മുമ്പില്‍ ജറോേബാവാമിനെയും ഇസ്രയേലിനെയും ദൈവം തോല്പിച്ചു. ഇസ്രയേലിലെ അഞ്ചുലക്ഷം യോദ്ധാക്കള്‍ അവിടെ മരിച്ചുവീണു (1 ദിനവൃത്താന്തം 13:14-17). അബിയാമും ജറോബോവാമും തമ്മില്‍ ജീവിതകാലം മുഴുവന്‍ യുദ്ധം നടന്നു.
അബിയാമിന്റെ പിന്‍ഗാമിയായി ഭരണമേറ്റ അവന്റെ പുത്രന്‍ ആസാ 41 വര്‍ഷം യൂദയായില്‍ രാജാവായിരുന്നു. ആസാ ദൈവമായ കര്‍ത്താവിന്റെ ദൃഷ്ടിയില്‍ നീതിയും നന്മയും പ്രവര്‍ത്തിച്ചു. അവന്‍ അന്യദേവന്മാരുടെ ബലിപീഠങ്ങളും പൂജാഗിരികളും നീക്കം ചെയ്തു. സ്തംഭങ്ങള്‍ ഇടിച്ചുതകര്‍ത്തു. അഷേരാപ്രതിഷ്ഠകള്‍ വെട്ടിവീഴ്ത്തി. യൂദാനിവാസികളോട് തങ്ങളുടെ പിതാക്കന്മാരുടെ ദൈവമായ കര്‍ത്താവിനെ അന്വേഷിക്കാനും അവിടുത്തെ നിയമങ്ങളും പ്രമാണങ്ങളും അനുസരിക്കാനും കല്പിച്ചു. അവന്റെ കാലത്ത് രാജ്യത്ത് സമാധാനം നിലനിന്നു (2 ദിനവൃത്താന്തം 14:2-5,  1 രാജാക്കന്മാര്‍ 15:9-12).
ആസാ രാജാവിന്റെ പിതാമഹി മാഖാ, അഷേരാദേവതയുടെ മ്ലേച്ഛവിഗ്രഹം ഉണ്ടാക്കിയതിനാല്‍ അവളെ അമ്മറാണി  എന്ന സ്ഥാനത്തുനിന്നു മാറ്റി. ആസാ ആ വിഗ്രഹം വെട്ടിമുറിച്ചു കഷണങ്ങളാക്കി കിദ്രോണ്‍ തോട്ടിനരികെവച്ചു ചുട്ടുകളഞ്ഞു. പൂജാഗിരികള്‍ ഇസ്രയേലില്‍നിന്നു നീക്കം ചെയ്തില്ലെങ്കിലും ജീവിതകാലം മുഴുവനും  ആസാ ഹൃദയവിശുദ്ധി പാലിച്ചു. തന്റെ പിതാവും താനും കാഴ്ചവച്ച സ്വര്‍ണവും വെള്ളിയും പാത്രങ്ങളും  അവന്‍ ദൈവാലയത്തിലേക്കു കൊണ്ടുവന്നു. അവന്റെ 35-ാം ഭരണവര്‍ഷംവരെ യുദ്ധമൊന്നും ഉണ്ടായില്ല (2 ദിനവൃത്താന്തം 15:16-19).
ആസായുടെ 36-ാം ഭരണവര്‍ഷം  യൂദായ്‌ക്കെതിരേ യുദ്ധത്തിനുവന്ന ഇസ്രയേല്‍രാജാവായ ബാഷായെ നേരിടാന്‍ സിറിയാരാജാവായ ബന്‍ഹദാദുമായി സഖ്യമുണ്ടാക്കി ഇസ്രയേലിനെ തോല്പിച്ച ചരിത്രം 2 ദിനവൃത്താന്തം 16-ാം അധ്യായത്തില്‍ വിവരിക്കുന്നുണ്ട്. ആഹാബിന്റെ ഭരണകാലത്തും ബെന്‍ഹദാദ് ഇസ്രയേലിനെ ആക്രമിച്ചു. മുപ്പത്തിരണ്ടു നാടുവാഴികളും തങ്ങളുടെ കുതിരകളോടും രഥങ്ങളോടുംകൂടെ അവന്റെ പക്ഷംചേര്‍ന്ന് സമരിയയെ വളഞ്ഞു. ഒരു പ്രവാചകന്‍ വഴി കര്‍ത്താവ് ആഹാബിനോടു പറഞ്ഞു: ''ഈ മഹാസൈന്യത്തിന്റെമേല്‍ നിനക്കു ഞാന്‍ വിജയം നല്‍കും.'' കര്‍ത്താവ് അരുള്‍ചെയ്തതുപോലെ ഇസ്രയേല്‍ വിജയം കണ്ടു. പിന്നീടു വസന്തകാലത്തും സിറിയയുടെ ആക്രമണമുണ്ടായി. ചെറിയ സൈന്യമായിരുന്നിട്ടും ഇസ്രയേലിനു സിറിയയെ തോല്‍പിക്കാന്‍ കഴിഞ്ഞു.
ഏലിയായും ഏലീഷായും
ആഹാബ് ഇസ്രയേലില്‍ രാജാവായിരിക്കുമ്പോഴായിരുന്നു പ്രവാചകരായ ഏലിയായുടെയും ഏലീഷായുടെയും രംഗപ്രവേശം. ഏകദേശം ബി സി 870 നും 810 നും ഇടയിലായിരുന്നു അവരുടെ പ്രവചനകാലം. ആഹാബ് സീദോന്‍ രാജാവിന്റെ മകള്‍ ജസെെബലിനെ വിവാഹം ചെയ്യുകയും ബാല്‍ദേവനെ ആരാധിക്കുകയും ചെയ്തു. സമരിയായില്‍ താന്‍ പണിത ബാല്‍ക്ഷേത്രത്തില്‍ ബാലിന് അവന്‍ ഒരു ബലിപീഠം സ്ഥാപിച്ചു. അവന്‍ ഒരു അഷേരാപ്രതിഷ്ഠയും ഉണ്ടാക്കി. തന്റെ മുന്‍ഗാമികളെക്കാളധികമായി ആഹാബ് ഇസ്രയേലിന്റെ ദൈവമായ കര്‍ത്താവിനെ പ്രകോപിപ്പിച്ചു. ഏലിയാപ്രവാചകന്‍ ആഹാബിനോടു പറഞ്ഞു: ''ഞാന്‍ സേവിക്കുന്ന ഇസ്രയേലിന്റെ ദൈവമായ കര്‍ത്താവാണേ, വരുംകൊല്ലങ്ങളില്‍ ഞാന്‍ പറഞ്ഞല്ലാതെ മഞ്ഞോ മഴയോ പെയ്യുകയില്ല (1 രാജാക്കന്മാര്‍ 16:31-33; 17:1).
കര്‍ത്താവ് അരുള്‍ചെയ്തപ്രകാരം ഏലിയാ ജോര്‍ദാനു കിഴക്കുള്ള കെറീത്ത് അരുവിക്കുസമീപം ഒളിച്ചുതാമസിച്ചു. അവിടുന്നു കല്പിച്ചതനുസരിച്ച് കാക്കകള്‍ കാലത്തും വൈകിട്ടും അവന് അപ്പവും മാംസവും കൊണ്ടുവന്നുകൊടുത്തു. കെറീത്ത് അരുവിയില്‍നിന്ന്  അവന്‍ വെള്ളംകുടിച്ചു (1 രാജാക്കന്മാര്‍ 17:2-6). ഏലിയാപ്രവാചകന്‍ പ്രവചിച്ചതുപോലെ മൂന്നു വര്‍ഷത്തെ കടുത്ത വരള്‍ച്ചയ്ക്കുശേഷമേ ഇസ്രയേലില്‍ മഴ പെയ്തുള്ളൂ. ബാല്‍ദേവനെ ആരാധിച്ചിരുന്ന പ്രവാചകരെ വെല്ലുവിളിച്ചുകൊണ്ട് കര്‍ത്താവായ ദൈവത്തിനു ബലിയര്‍പ്പിക്കുന്ന ഏലിയാപ്രവാചകന്റെ ധീരചരിതം 1 രാജാക്കന്മാര്‍ 18-ാം അധ്യായത്തില്‍ സവിസ്തരം പ്രതിപാദിച്ചിട്ടുണ്ട്. ഏലിയായുടെ തീക്ഷ്ണമായ പ്രാര്‍ഥന കേട്ട കര്‍ത്താവില്‍നിന്ന് അഗ്നിയിറങ്ങി ബലിവസ്തുവും വിറകും കല്ലും മണ്ണും ദഹിപ്പിക്കുകയും ചാലിലെ വെള്ളം വറ്റിക്കുകയും ചെയ്തു. ഇതുകണ്ട ജനം സാഷ്ടാംഗം വീണു വിളിച്ചുപറഞ്ഞു: ''കര്‍ത്താവു തന്നെ ദൈവം! കര്‍ത്താവു തന്നെ ദൈവം!'' (1 രാജാക്കന്മാര്‍ 18:38-39). ബാലിനെ ആരാധിച്ചിരുന്ന 450 പ്രവാചകന്മാരെയും അഷേരായുടെ 400 പ്രവാചകന്മാരെയും ഇസ്രയേല്‍ജനവും ഏലിയാപ്രവാചകനും ചേര്‍ന്നു പിടികൂടുകയും കിഷോണ്‍അരുവിക്കു സമീപം കൊണ്ടുപോയി വധിക്കുകയും ചെയ്തു.
ഇതിനിടെ, അയല്‍ക്കാരനായ നാബോത്തിന്റെ മുന്തിരിത്തോട്ടം സ്വന്തമാക്കാന്‍ അവനെ കല്ലെറിഞ്ഞു കൊല്ലിച്ച ആഹാബിനുമേല്‍ ഏലിയാപ്രവാചകന്‍വഴി കര്‍ത്താവായ ദൈവം ചൊരിയുന്ന ശാപവാക്കുകള്‍ ഹൃദയസ്പര്‍ശിയാണ്: ''നാബോത്തിന്റെ രക്തം നായ്ക്കള്‍ നക്കിക്കുടിച്ച സ്ഥലത്തുവച്ചുതന്നെ നിന്റെ രക്തവും നായ്ക്കള്‍ നക്കിക്കുടിക്കും. കര്‍ത്താവിന്റെ സന്നിധിയില്‍ തിന്മ പ്രവര്‍ത്തിക്കാന്‍ നീ നിന്നെത്തന്നെ വിറ്റിരിക്കുന്നു. ഞാന്‍ നിന്നെ നിര്‍മാര്‍ജനം ചെയ്യും. ജസ്രേലിന്റെ അതിര്‍ത്തിക്കുള്ളില്‍ വച്ച് ജസെബെലിനെ നായ്ക്കള്‍ തിന്നും. ആഹാബിന്റെ ഭവനത്തില്‍ വച്ചു മരിക്കുന്നതുവരെ നായ്ക്കള്‍ ഭക്ഷിക്കും, നാട്ടിന്‍പുറത്തുവച്ചു മരിക്കുന്നവരെ പറവകളും''(1 രാജാക്കന്മാര്‍ 21:19-24).
സിറിയയുമായുള്ള ഘോരയുദ്ധത്തില്‍ മാരകമായി പരിക്കേറ്റു മരണമടഞ്ഞ ആഹാബിന്റെ രക്തം ഒഴുകിയിറങ്ങിയ രഥം കഴുകിയ വെള്ളം നായ്ക്കള്‍ കുടിച്ചതായും  വിശുദ്ധഗ്രന്ഥത്തില്‍ രേഖപ്പെടുത്തിയിട്ടുണ്ട്. ഏലിയായുടെ പ്രവചനംപോലെ തന്നെയായിരുന്നു ജസെബെലിന്റെ അന്ത്യവും. ഇസ്രയേല്‍രാജാവായിരുന്ന യേഹുവിന്റെ ഭടന്മാര്‍ കിളിവാതിലിലൂടെ താഴേക്ക് എറിഞ്ഞുകൊന്ന ജസെബെലിന്റെ ശരീരം നായ്ക്കള്‍ ഭക്ഷിച്ചു.
മരിച്ചുപോയ രണ്ടു ബാലന്മാരെ  പ്രവാചകരായ ഏലിയായും എലീഷായും ഉയിര്‍പ്പിക്കുന്ന സംഭവങ്ങളും പ്രാധാന്യമേറിയവയാണ്. കര്‍ത്താവ് അരുള്‍ചെയ്തതിന്‍പ്രകാരം സീദോനിലെ സറേഫാത്തിലെ ഒരു വിധവയുടെ വീട്ടില്‍ ഏലിയ താമസിക്കവെ അവളുടെ രോഗിയായ മകന്‍ രോഗം മൂര്‍ച്ഛിച്ച് ശ്വാസംനിലച്ചു. ബാലനെ കൈകളിലെടുത്ത് താന്‍ പാര്‍ക്കുന്ന മുറിയിലെ കട്ടിലില്‍കിടത്തി ഏലിയാ ഉച്ചത്തില്‍ പ്രാര്‍ഥിച്ചു: ''എന്റെ ദൈവമായ കര്‍ത്താവേ, ഇവന്റെ ജീവന്‍ തിരികെ കൊടുക്കണമേ!'' കര്‍ത്താവ് ഏലിയായുടെ പ്രാര്‍ഥന കേട്ടു. കുട്ടിക്കു പ്രാണന്‍ വീണ്ടുകിട്ടി; അവന്‍ ജീവിച്ചു (1  രാജാക്കന്മാര്‍ 17:17:22).
വാര്‍ദ്ധക്യത്തില്‍ തങ്ങള്‍ക്കു ജനിച്ച മകന്‍ മരിച്ചതില്‍ അതീവദുഃഖിതരായിരുന്ന ഷൂനേംകാരായ വൃദ്ധദമ്പതികളുടെ നിരന്തരമായ അപേക്ഷ നിരസിക്കാന്‍ എലീഷയ്ക്കായില്ല. 'എലീഷ ഭവനത്തില്‍ ചെന്നപ്പോള്‍ കുട്ടി കിടക്കയില്‍ മരിച്ചുകിടക്കുന്നതുകണ്ടു. ഉള്ളില്‍ക്കയറി വാതിലടച്ച പ്രവാചകന്‍ കര്‍ത്താവിനോടു പ്രാര്‍ഥിച്ചു. അനന്തരം കിടക്കയില്‍കയറി തന്റെ വായ് കുട്ടിയുടെ വായോടും തന്റെ കണ്ണുകള്‍ അവന്റെ കണ്ണുകളോടും തന്റെ കൈകള്‍ അവന്റെ കൈകളോടും ചേര്‍ത്തുവച്ച് അവന്റെമേല്‍ കിടന്നു. 
കുട്ടി ഏഴുപ്രാവശ്യം തുമ്മിയതിനുശേഷം കണ്ണുതുറന്നു' (2 രാജാക്കന്മാര്‍ 4:32-35).
ഏലിയായും എലീഷായും ഗില്‍ഗാലില്‍നിന്നു ദീര്‍ഘദൂരംയാത്ര ചെയ്ത് ജോര്‍ദാന്‍ നദിക്കരെയെത്തിയപ്പോഴായിരുന്നു ഏലിയാ സ്വര്‍ഗത്തിലേക്കു സംവഹിക്കപ്പെട്ടത്. അവര്‍ സംസാരിച്ചുകൊണ്ടുപോകുമ്പോള്‍ അതാ ഒരു ആഗ്നേയരഥവും ആഗ്നേയാശ്വങ്ങളും അവരെ വേര്‍പെടുത്തി. ഏലിയാ ഒരു ചുഴലിക്കാറ്റില്‍ സ്വര്‍ഗത്തിലേക്കുയര്‍ന്നു. എലീഷാ അതുകണ്ടു നിലവിളിച്ചു. ''എന്റെ പിതാവേ! എന്റെ പിതാവേ! ഇസ്രയേലിന്റെ രഥങ്ങളും സാരഥികളും!'' പിന്നെ അവന്‍ ഏലിയായെ കണ്ടില്ല. അവന്‍ വസ്ത്രം കീറി (2 രാജാക്കന്മാര്‍ 2:11-12).
എലീഷാപ്രവാചകന്‍ സിറിയയിലെ രാജാവിന്റെ കുഷ്ഠരോഗബാധിതനായ സൈന്യാധിപനായ നാമാനു രോഗസൗഖ്യം നല്‍കുമ്പോള്‍ കര്‍ത്താവായ ദൈവത്തെ പുകഴ്ത്തുന്നതും, മാനസാന്തരപ്പെട്ട് കര്‍ത്താവില്‍ വിശ്വസിക്കുന്നതും 2 രാജാക്കന്മാര്‍ 5-ാം അധ്യായത്തില്‍ വായിക്കാനാകും. ''ഭൂമിയില്‍ ഇസ്രയേലിന്റേതല്ലാതെ മറ്റൊരു ദൈവമില്ലെന്ന് ഞാന്‍ ഇപ്പോള്‍ അറിയുന്നു. ഇനിമേല്‍ കര്‍ത്താവിനല്ലാതെ മറ്റൊരു ദൈവത്തിനും അങ്ങയുടെ ദാസന്‍ ദഹനബലിയോ കാഴ്ചയോ അര്‍പ്പിക്കുകയില്ല (2 രാജാക്കന്മാര്‍ 5:15-17).
ഹോസിയാ ഇസ്രയേല്‍ രാജാവായിരിക്കെയാണ് യൂദായില്‍ ഹെസക്കിയാ ഭരണമേറ്റത്. ദാവീദിനെപ്പോലെ അവന്‍ കര്‍ത്താവിന്റെ മുമ്പില്‍ നീതി പ്രവര്‍ത്തിച്ചു. അവന്‍ പൂജാഗിരികള്‍ നശിപ്പിക്കുകയും സ്തംഭങ്ങളും അഷേരാപ്രതിഷ്ഠകളും തകര്‍ക്കുകയും ചെയ്തു. മോശ ഉണ്ടാക്കിയ ഓട്ടുസര്‍പ്പത്തിന്റെ മുമ്പില്‍ ഇസ്രയേല്‍ ധൂപാര്‍ച്ചന നടത്തിയതിനാല്‍ അവന്‍ അതു തകര്‍ത്തു. മുന്‍ഗാമികളോ പിന്‍ഗാമികളോ ആയ യൂദാരാജാക്കന്മാരിലാരും അവനെപ്പോലെ വിശ്വസ്തനായിരുന്നില്ല. അവിടുന്നു മോശയ്ക്കു നല്‍കിയ  കല്പനകള്‍ പാലിക്കുകയും അവിടുത്തെ പിന്‍തുടരുകയും ചെയ്തു. കര്‍ത്താവ് അവനോടുകൂടെയുണ്ടായിരുന്നു. അവന്റെ ഉദ്യമങ്ങളെല്ലാം ഐശ്വര്യപൂര്‍ണമായി. അവന്‍ അസ്സീറിയാ രാജാവിനെ എതിര്‍ത്തു. അവനെ സേവിച്ചില്ല. അവന്‍ ഫിലിസ്ത്യരെ ഗാസയുടെ അതിര്‍ത്തിവരെയും, കാവല്‍ഗോപുരം മുതല്‍ സുരക്ഷിതനഗരം വരെയും നിഗ്രഹിച്ചു (2 രാജാക്കന്മാര്‍ 18:3-8).

(തുടരും)